ຫຍ້າເອັນຢືດ

ຫຍ້າເອັນຢືດ
Plantago major



ຄຸນຄ່າທາງໂພຊະນາການ 
ຫຍ້າເອັນຢືດ ປະກອບມີທາດເບຕາແຄໂຣທີນ, ວິຕາມິນບີ, ວິຕາມິນຊີ ຢ່າງຫຼວງຫຼາຍ ເຊິ່ງທັງໝົດລ້ວນແຕ່ເປັນທາດບໍາລຸງຮ່າງກາຍ ແລະ ຊ່ວຍຕໍ່ຕ້ານກັບໂລກໄພໄຂ້ເຈັບຕ່າງໆ.

ວິທີນໍາໃຊ້ ເພື່ອການປິ່ນປົວ
ສໍາລັບ ແມງໄມ້ຕອດ ແລະ ບາດແຜ, ໃຊ້ນໍ້າຢາງຈາກໃບສົດ ຫຼື ເອົາໃບມາຍ່ອງ ແລ້ວທາໃສ່ຜິວໜັງ. ສໍາລັບເສັ້ນເອັນເຄັ່ງຕຶງ ແລະ ປວດກ້າມຊີ້ນ, ໂລກໜອງໃນ, ເຈັບພົກຍ່ຽວ ແລະ ຄວາມດັນເລືອດ, ສາມາດນໍາໃຊ້ທຸກພາກສ່ວນຂອງພືດ. ເອົາໃບແຫ້ງ 3 ກຣາມ ຫຼື ໃບສົດ 25 ກຣາມ ຕົ້ມໃສ່ກັບນໍ້າເພື່ອດື່ມ. ດື່ມສອງເທື່ອຕໍ່ມື້ຕອນເຊົ້າ ແລະ ຕອນແລງ. ສໍາລັບເລືອດອອກຕາມເຫືອກແຂ້ວ, ເອົາໃບມາຍ່ອງ ແລະ ກົດໃສ່ບໍລິເວນທີ່ເປັນບາດແຜ.

ໄລຍະເວລາ
ຫຍ້າເອັນຢືດເປັນພືດອາຍຸຍືນ. ຖ້າປູກໃນສະພາບ ແລະ ເງື່ອນໄຂທີ່ເໝາະສົມ ລວມທັງດິນທີ່ມີຄວາມຊຸ່ມພຽງພໍ ມັນກໍ່ຈະອອກດອກ ແລະ ແຜ່ຂະຫຍາຍເອງໄປເລື້ອຍໆ. ຖ້າຢູ່ໃນສະພາບສິ່ງແວດລ້ອມທີ່ບໍ່ດີ, ພືດຊະນິດນີ້ຈະບໍ່ອອກດອກ ແລະ ຈະຕາຍພາຍໃນເວລາ 10 -12 ເດືອນ.

ວິທີເບິ່ງແຍງຮັກສາ
ຫຍ້າເອັນຢືດເປັນພືດທີ່ເພາະປູກງ່າຍ. ພວກມັນສາມາດເຕີບໃຫຍ່ໃນສະພາບທີ່ໄດ້ຮັບແສງແດດຢ່າງເຕັມທີ ່ຫຼື ໃນບ່ອນຮົ່ມ, ແລະ ພວກມັນເຕີບໃຫຍ່ຂ້ອນຂ້າງໄວ. ໃຫ້ຫົດນໍ້າມື້ລະເທື່ອ.ຈິ້ມດິນ ແລະ ເຕີມຝຸ່ນບົ່ມເດືອນລະເທື່ອ.

ການເກັບກ່ຽວ
ຫຼັງຈາກປູກແລ້ວ, ມັນຈະໃຊ້ເວລາ 2 - 3 ເດືອນ ກ່ອນທີ່ຈະເກັບໃບອ່ອນໄດ້, ແລະ ແກ່ນຈະສາມາດເກັບໄດ້ ຫຼັງຈາກ 3 - 4 ເດືອນ ການເກັບແກ່ນແມ່ນໃຫ້ເກັບໃນຕອນທ່ຽງ ເວລາທີ່ມັນແຫ້ງດີ.

ຄໍາແນະນໍາ ສຳລັບການຂະຫຍາຍພັນ
ຫຍ້າເອັນຢືດແມ່ນພືດທີ່ເພາະປູກໄດ້ງ່າຍ. ພວກມັນມັກອາກາດທີ່ມີຄວາມຊຸ່ມຊື່ນສູງ ແລະ ສາມາດຂະຫຍາຍພັນ ໂດຍການນໍາໃຊ້ແກ່ນ.

ການນໍາໃຊ້ໃນດ້ານອື່ນໆ
ທ່ານສາມາດເອົາໃບອ່ອນ ມາກິນກັບແຈ່ວໝາກເຜັດ ຫຼື ກັບລາບກໍໄດ້.