ຜັກໜອກ

ຜັກໜອກ
ຊື່ວິທະຍາສາດ: Centella asiatica(L.) Urb.




           ຜັກໜອກ, ເປັນພືດຫຍ້າ, ມັກເກີດຕາມດິນຊຸ່ມ ຕາມສວນ, ທົ່ງນາ ແລະ ເກີດທົ່ວໄປໃນພື້ນທີ່ທົ່ວປະເທດ, ປະຊາຊົນລາວ ສວນຫຼາຍເກັບມາກິນກັບອາຫານ ແລະ ປຸງແຕ່ງອາຫານໂດຍສະເພາະແມ່ນປະຊາຊົນຊາວພາກເໜືອ ໃຊ້ປະ ກອບເຂົ້າໃນຊຸບຜັກຊຶ່ງແມ່ນອາຫານພື້ນ ເມືອງຢ່າງນຶ່ງທີ່ປະຊາຊົນລາວໃນແຕ່ລະເຂດມັກກິນ. ອີກດ້ານນຶ່ງເວລາເວົ້າເຖິງຜັກໜອກປະຊາຊົນຈະເຂົ້າໃຈ ແລະ ຮູ້ຈັກກັນດີເພາະປະຊາຊົນ ແລະ ຊາວຄ້າຂາຍທັງຫຼາຍໄດ້ເກັບມາຂາຍໃນທ້ອງຕະລາດ ແລະ ໃຊ້ປຸງແຕ່ງເປັນເຄື່ອງດື່ມທີ່ມີສຸຂະພາບດີ ທີ່ຂາຍຕາມຮ້ານ ອາຫານທົ່ວໄປ. ຜັກໜອກຈັດເຂົ້າໃນກຸ່ມພືດຫຍ້າ ເຄືອນ້ອຍເລືອຕາມໜ້າດິນໃບມົນບົ່ງຕັ້ງສາກກັບເຄືອ ມີກັ່ນຍາວ 8-12 ຊັງຕີ ແມັດ, ດອກອອກຕາມຊອກໃບ ສີຂຽວອ່ອນຄ້າຍຄື ຄັນຮົ່ມ. ຜັກໜອກນອກຈາກໃຊ້ເປັນອາຫານແລ້ວ ຍັງມີປະໂຫຍດທາງດ້ານການປິ່ນປົວພະຍາດເຊັ່ນ: ແກ້ອາການອອກຕຸ່ມ, ເບົາຫວານ, ໄຂ້ຮ້ອນ, ເຈັບຫົວ ແລະ ແກ້ເບື່ອອາຫານ.

ແກ້ອາການອອກຕຸ່ມ ແມ່ນເກັບຜັກໜອກສົດປະມານ 1 ກຳມືມາລ້າງໃຫ້ສະອາດ ນຳໄປຕຳໃຫ້ແຫຼກ ແລ້ວເອົາໄປໂພະໃສ່ຕາມຕຸ່ມ

ໄຂ້ຮ້ອນ, ເຈັບຫົວ, ເຈັບຄໍ ແລະ ແກ້ເບື່ອອາຫານ ແມ່ນເກັບຜັກໜອກສົດມາລ້າງໃຫ້ສະອາດປະມານ 1 ກຳໃຫຍ່ ແລ້ວນຳໄປບົດໃສນຳ້ 1 ຈອກເຄິ່ງ ຕອງເອົານຳດື່ມ

ປົວພະຍາດເບົາຫວານ ແມ່ນມີສ່ວນປະສົມດັ່ງນີ້:
1. ຜັກໜອກ                        1 ກຳແຫ້ງ
2. ຜັກໃສ່                            1 ກຳແຫ້ງ
3. ລາຊາບີ                          1 ກຳແຫ້ງ
4. ຫຍ້າໜວດແມວ              1 ກຳແຫ້ງ
5. ສະເອັມດິນ                     1 ກຳແຫ້ງ
6. ໃບໝາກມ່ວງຫິມະພານ   1/4 ກຳແຫ້ງ
7. ໃບກາວບົກ                     1/4 ກຳແຫ້ງ

ວິທີໃຊ້: ເອົາແຕ່ລະຢ່າງປະສົມກັນຕົ້ມກັບນຳ້ 1,5 ລີດ ຕົ້ມຂ້ຽວໃຫ້ຍັງ 1 ລີດ ແບ່ງດື່ມສາມເວລາ ເຊົ້າ, ສວຍ, ແລງ ທຸກໆວັນຈົນກວ່າອາການ ຈະດີຂື້ນ