ສະພາບແວດລ້ອມ (Ecology) ທີ່ມີຜົນຕໍ່ຫຍ້າ

ສະພາບແວດລ້ອມ (Ecology)
1. ຄວາມຍາວຂອງວັນ (Length of day)
ຫຍ້າເມືອງຮ້ອນສ່ວນໃຫຍ່ມີຄວາມໄວຕໍ່ແສງ ແລະ ສ່ວນໃຫຍ່ເປັນຈໍາພວກວັນສັ້ນ. ໝາຍຄວາມວ່າ: ຫຍ້າຈະອອກ ດອກໃນລະດູວັນສັ້ນ ເຊັ່ນ: ລະດູໝາວ ແລະ ການອອກດອກຈະຊ້າຖ້າຫາກວັນຍາວຂື້ນ.ການອອກດອກຊ້າ ຫຼື ໄວຈະມີຜົນຕໍ່ຜົນຜະລິດຂອງສັດ. ຖ້າວ່າຫຍ້າອອກດອກຊ້າຈະເຮັດໃຫ້ມີການຈະເລີນເຕີບໂຕຢູ່ສ່ວນຕົ້ນ ແລະ ໃບຫຼາຍ ເຮັດໃຫ້ສັດມີອາຫານກິນຢ່າງພຽງພໍ.
2. ແສງ (Light)
ແສງເປັນແຫຼ່ງພະລັງງານທີ່ສຳຄັນເພາະພືດຈະໃຊ້ເຂົ້າໃນຂະບວນການສັງເຄາະແສງ (Photosynthesis). ຜະ ລິດຕະພັນທໍາອິດທີ່ໄດ້ຈາກການສັງເຄາະແສງ ຄື:‘carbohydrate’ ເຊີ່ງຈະຖືກແປຮູບເປັນ ທາດຊີ້ນ (protein), ໄຂມັນ ແລະ ຜະລິດຕະພັນອື່ນໆໃນຂັ້ນຕອນຕໍ່ໄປ. ແສງຈະຖືກໃຊ້ເຂົ້າໃນຂະບວນການສັງເຄາະແສງຂອງພືດ ປະມານ 1-5% ຂອງປະລິມານແສງທັງໝົດທີ່ຜ່ານເຂົ້າມາຫາຕົ້ນພືດ ຫຼືອາດຈະຖືກໃຊ້ເຖີງ 3-10% ຖ້າພືດມີປະລິມານໃບ (leaf area index) ທີ່ເໝາະສົມ. ຫຍ້າເມືອງຮ້ອນມີປະສິດຕິພາບໃນການໃຊ້ແສງ (conversion light energy) ສູງກວ່າຫຍ້າເມືອງໜາວ. ກ່າວຄື: ເມື່ອການສັງເຄາະແສງຂອງຫຍ້າເຖີງຈຸດອີມຕົວແລ້ວ, ຫຍ້າເມືອງຮ້ອນຍັງສາມາດໃຊ້ແສງໄດ້ອີກ ປະມານ 5-6% ໃນຂະນະທີ່ຫຍ້າເມືອງໜາວມີພຽງ 2-3%



3. ອຸນຫະພູມ (Temperature)
ອຸນນະພູມທີ່ເໝາະສົມຕໍ່ຫຍ້າເມືອງຮ້ອນແມ່ນ 30-35 ໍC ແລະ ສຳລັບຫຍ້າເມືອງໜາວແມ່ນ ປະມານ 20-25 ໍC. ການຈະເລີນເຕີບໂຕຈະຢຸດສະຫງັກເມື່ອອຸນຫະພູມຫຼຸດລົງ ປະມານ 10-15 ໍC ແລະ ຈະຕາຍເມື່ອເຖີງຈຸດທີ່ເປັນນໍ້າກ້າມ (frost).
4. ຄວາມຊຸ່ມ (Humidity)
ຫຍ້າຈະແພ່ຂະຫຍາຍໄດ້ດີໃນພື້ນທີ່ທີ່ມີຄວາມຊຸ່ມຊື່ນພຽງພໍເຊີ່ງພື້ນທີ່ທີ່ເໝາະສົມຕໍ່ການຈະເລີນເຕີບໂຕຂອງຫຍ້າເມືອງຮ້ອນ ຄວນມີປະລິມານນໍ້າຝົນສະເລ່ຍຢ່າງໜ້ອຍສຸດແມ່ນ 1,000 mm/ປີຂື້ນໄປ