ຊາວກະສິກອນທຸກຄົນແມ່ນຕ້ອງການນ້ຳໃນການປູກຝັງລ້ຽງສັດ. ຖ້າທ່ານອາໄສຢູ່ໃນພື້ນທີ່ໆແຫ້ງແລ້ງ, ວິທີການທີ່ດີທີ່ສຸດໃນການຮັກສານ້ຳກໍ່ຄືປູກພືດທ້ອງຖິ່ນໃສ່ໃນຕອນດິນຂອງທ່ານ ຫຼື ປູກພືດທີ່ຕ້ອງການນ້ຳພຽງແຕ່ໃນລະດູຝົນເທົ່ານັ້ນ. ຝຸ່ນຂຽວ ແລະ ແນວປົກໜ້າດິນຊ່ວຍເກັບນ້ຳໄວ້ໃນດິນ, ແນວກັ້ນຊ່ວຍຮັກສານ້ຳໄວ້ໂດຍການສະລໍນ້ຳບໍ່ໃຫ້ໄຫຼໄວຫຼາຍ. ສ່ວນວິທີການປະຢັດນ້ຳແບບອື່ນໆມີດັ່ງຕໍ່ໄປນີ້:
● ລະບົບນ້ຳຢອດ ແມ່ນການໃຫ້ນ້ຳພືດຜັກໂດຍໃຫ້ນ້ຳຢອດອອກມາໃສ່ພືດຜັກຈາກທໍ່ທີ່ວາງໄວ້ເທິງ ຫຼື ໄວ້ພື້ນດິນ. ການໃຫ້ນ້ຳວິທີນີ້ແມ່ນປະຢັດນ້ຳຫຼາຍ ແລະຮັກສາດິນບໍ່ໃຫ້ເສຍຫາຍໄດ້ຫຼາຍກວ່າການໃຫ້ນ້ຳ (ຫົດ) ລົງມາກະທົບໃສ່ໜ້າດິນ.
● ປູກພືດໄມ້ເປັນຮົ່ມ ເພື່ອປົກປ້ອງພືດຜັກແລະດິນຈາກການແຜດເຜົາ ຂອງແສງແດດ. ຕົ້ນໄມ້ບາງຊະນິດດູດເອົານ້ຳຈາກພື້ນດິນຂຶ້ນມາໜ້າດິນ ເຊິ່ງເປັນການຊ່ວຍໃຫ້ພືດພັນທີ່ຮາກສັ້ນມີນ້ຳໃຊ້.
● ປູກພືດຜັກໃຫ້ຖີ່ກັນ ເພື່ອເປັນຮົ່ມປົກຄຸມໜ້າດິນ ຊ່ວຍໃຫ້ໜ້າດິນຊຸ່ມຢູ່ສະເໝີ. ອາກາດທີ່ຢູ່ລະຫວ່າງພືດເຫຼົ່ານັ້ນກໍ່ມີອາຍນ້ຳຢູ່ໜ້ອຍໜຶ່ງ ຊຶ່ງສາມາດຊ່ວຍບໍ່ໃຫ້ພືດຜັກຫ່ຽວແຫ້ງ.ສິ່ງນີ້ເກີດຂຶ້ນໄດ້ໂດຍການປູກພືດຝຸ່ນຂຽວ ຫຼື ໂດຍການປູກພືດທັນຍາຫານຫຼາຍໆຊະນິດນຳກັນໃນທີ່ດິນຕອນດຽວກັນ.
● ການປູກພືດເປັນແຖວສະຫຼັບກັນ (ໝາຍເຖິງການປູກພືດຊະນິດຕ່າງກັນສະຫຼັບກັນເປັນແຖວຍາວຕາມແລວແນວກັ້ນ) ເພື່ອຊ່ວຍໃຫ້ພືດເຫຼົ່ານັ້ນໄດ້ແບ່ງປັນຄວາມຊຸ່ມນຳກັນ. ພືດປູກປົກໜ້າດິນກໍ່ປູກເບື້ອງເທິງຂອງແນວກັ້ນ ແລະ ສຳລັບພືດທີ່ໃຫ້ຮົ່ມນ້ອຍກໍ່ປູກໄວ້ທາງກ້ອງຂອງມັນ. ນ້ຳທີ່ກັກເກັບໄວ້ໄດ້ໂດຍພືດປົກຄຸມດິນທີ່ສູງກວ່ານັ້ນກໍ່ຖືກແບ່ງປັນໃຫ້ກັບພືດຜັກທີ່ຢູ່ຂ້າງລຸ່ມນັ້ນ.● ການນຳນ້ຳທີ່ໃຊ້ຊຳລະລ້າງຕ່າງໆມາໃຊ້ຫົດສວນຄົວ
● ການປົກປັກຮັກສາພື້ນທີ່ອ່າງໂຕ່ງ ເພື່ອສະໜອງນ້ຳໃຫ້ປະຊາຊົນ ແລະ ພືດທັນຍາຫານຕ່າງໆ ໄດ້ຫຼາຍຂຶ້ນ
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ