Solanum spp.
ຄຸນຄ່າທາງໂພຊະນາການ
ໝາກເຂືອເປັນພືດທີ່ມີໄຍອາຫານສູງ ແລະ ໃຫ້ພະລັງງານຕໍ່າ. ເປືອກຂອງໝາກເຂືອ ມີຄຸນນະສົມບັດໃນການຕ້ານອະນຸມູນອິດສະຫຼະ, ບາງສາຍ ພັນຍັງສາມາດຊ່ວຍໃນການຄວບຄຸມນໍ້າຕານໃນເລືອດ ແລະ ຄວບຄຸມຄວາມດັນເລືອດນໍາອີກ.
ວິທີການກິນໝາກເຂືອ
ໝາກເຂືອຈະຖືກເອົາໄປປຸງແຕ່ງອາຫານປະເພດແກງກະລີ່, ແຈ່ວ ແລະ ເອາະຫຼາມ, ໝາກເຂືອຍັງນິຍົມກິນດິບກັບອາຫານພື້ນບ້ານຂອງລາວເຊັ່ນ: ລາບ ແລະ ຕໍາໝາກຫຸ່ງ.
ຄໍາແນະນໍາ ສໍາລັບການຂະຫຍາຍພັນ
ວິທີທີ່ດີທີ່ສຸດ ແມ່ນກ້າແກ່ນໃສ່ຖາດ ຫຼື ໂຖກ້າແກ່ນ. ຝັງແກ່ນລົງເລິກປະມານ 5 -10 ມີລີແມັດ. ໝາກເຂືອຈະອອກຈາວ ພາຍຫຼັງກ້າແກ່ນປະມານ12 ອາທິດ. ຕົ້ນໝາກເຂືອຕ້ອງການອຸນຫະພູມສູງ ແລະ ແສງແດດກ້າເພື່ອເຕີບໃຫຍ່ຢ່າງເຕັມທີ່. ຄວນເອົາເບ້ຍໄປປູກພາຍຫຼັງທີ່ມີອາຍຸໄດ້ 6 - 8 ອາທິດ. ຄວນປູກຕົ້ນໝາກເຂືອຫ່າງກັນປະມານ 40 - 50 ຊັງຕີແມັດ. ໃນໄລຍະກ້າ ແລະ ບົງເບ້ຍ, ບໍ່ຄວນຫົດນໍ້າຫຼາຍໂພດ. ບໍ່ມີສິ່ງອື່ນໃດທີ່ຈະສາມາດທໍາລາຍຕົ້ນໝາກເຂືອທີ່ຍັງອ່ອນໄດ້ ນອກຈາກການຫົດນໍ້າທີ່ຫຼາຍເກີນໄປ.
ວິທີເບິ່ງແຍງຮັກສາ
ໝາກເຂືອບໍ່ຕ້ອງການ ການເບິ່ງແຍງຫຼາຍ. ໃຫ້ຫົດນໍ້າເປັນບາງຊ່ວງເວລາ, ແລ້ວປະໃຫ້ດິນແຫ້ງປະມານສອງສາມວັນກ່ອນຈຶ່ງຫົດນໍ້າອີກກໍໄດ້. ແຕ່ໝາກເຂືອເປັນພືດທີ່ຫິວອາຫານຫຼາຍ, ສະນັ້ນຄວນຈະໃຫ້ຝຸ່ນຢ່າງພຽງພໍ ແລະ ໃຊ້ນໍ້າສະກັດຊີວະພາບຫົດປົນກັບນໍ້າທໍາມະດາສອງຄັ້ງຕໍ່ເທື່ອ.
ບັນຫາທີ່ອາດຈະເກີດຂຶ້ນ
ຖ້າຫົດນໍ້າໝາກເຂືອຫຼາຍໂພດ ອາດຈະເຮັດໃຫ້ຮາກຂອງມັນຕິດເຊື້ອລາໄດ້ງ່າຍ.
ການເກັບກ່ຽວ
ໝາກເຂືອສາມາດຖືກເກັບກ່ຽວໄດ້ ພາຍຫຼັງທີ່ປູກລົງໜານໄດ້ 3 ເດືອນ. ຖ້າຕົ້ນໝາກເຂືອຫາກໄດ້ຢູ່ໃນສະພາບທີ່ອໍານວຍ, ມັນກໍຈະສືບຕໍ່ອອກດອກ ແລະ ໝາກ. ເພື່ອການບໍລິໂພກທີ່ມີຄຸນນະພາບຄວນຈະກິນໝາກເຂືອໃນຕອນທີ່ມັນກໍາລັງເຕີບໃຫຍ່ພໍດີກ່ອນທີ່ແກ່ນຂອງມັນຈະຂະຫຍາຍໃຫຍ່. ຫຼັງຈາກເກັບກ່ຽວແລ້ວ, ໝາກເຂືອສາມາດເກັບຮັກສາໄວ້ໄດ້ ເຖິງ 10 ວັນ ໃນບໍລິເວນທີ່ເຢັນ. ໝາກເຂືອຈະໃຫ້ຜົນຜະລິດທີ່ແຕກຕ່າງກັນໄປຕາມສາຍພັນ, ໂດຍປົກກະຕິຈະອອກຜົນຜະລິດ 2 - 4 ກິໂລກຣາມ ຕໍ່ໜຶ່ງຕາແມັດ.
ການນໍາໃຊ້ດ້ານອື່ນໆ
ຮາກຂອງໝາກເຂືອສາມາດນໍາໃຊ້ເພື່ອປິ່ນປົວອາການໄອ, ພະຍາດຫືດ, ເຈັບລຳໄສ້, ກິນເຂົ້າບໍ່ແຊບ ແລະອາການແໜ້ນໜ້າເອິກ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ