ແກ່ນພັນ

ການກ້າແກ່ນແນວປູກ

ສຳລັບແກ່ນແນວບາງຊະນິດແມ່ນຕ້ອງໃຊ້ວິທີການກ້າທີ່ພິເສດສະເພາະຈິ່ງສາມາດແຕກງອກອອກມາໄດ້. ແຕ່ແກ່ນແນວທຸກຊະນິດແມ່ນຕ້ອງການສິ່ງຕ່າງໆລຸ່ມນີ້:

• ນ້ຳ. ກ່ອນຈະນຳເອົາແກ່ນໄປກ້າໃຫ້ເອົາແກ່ນແນວແຊ່ນ້ຳໄວ້ຄືນໜຶ່ງ. ຖ້າທ່ານໃຊ້ນ້ຳຮ້ອນ (ແຕ່ບໍ່ແມ່ນນ້ຳຟົດ) ແຊ່ແກ່ນແນວ, ມັນຈະຊ່ວຍຂ້າແມ່ພະຍາດ ແລະ ສັດຕູພືດທີ່ຕິດມານຳແກ່ນນັ້ນ. ວິທີນີ້ມັນຍັງຊ່ວຍໃຫ້ແກ່ນແນວທີ່ໄດ້ມາຈາກອາຈົມສັດ (ແກ່ນທີ່ຜ່ານທ້ອງສັດ) ແຕກງອກອອກມາໄດ້. ເພື່ອໃຫ້ແນ່ໃຈວ່າວິທີນີ້ຈະໄດ້ຜົນກໍ່ໃຫ້ທົດລອງເອົາແນວພືດສອງສາມແກ່ນແຊ່ນ້ຳຮ້ອນ ແລ້ວເອົາໄປກ້າເບິ່ງ ຫາກມັນອອກກໍ່ແມ່ນໄດ້ຜົນ.
• ອາກາດ. ຖ້າຫາກດິນແຈບແກ່ນ ຫຼື ດິນທີ່ມີນ້ຳແຊ່ປຽກຕະຫຼອດເວລາ, ແກ່ນພືດກໍ່ຈະບໍ່ອອກ ເພາະວ່າມັນບໍ່ມີອາກາດພຽງພໍ.
• ແສງແດດ. ມີແກ່ນແນວຈຳນວນໜຶ່ງ, ໂດຍສະເພາະແກ່ນແນວທີ່ມາຈາກທາງພາກເໜືອ ເຊິ່ງເປັນບ່ອນທີ່ມີພູມອາກາດແຕກຕ່າງກັນໄປຕາມຊ່ວງໄລຍະເວລາຂອງປີ, ແມ່ນຈະແຕກງອກອອກມາກໍ່ຕໍ່ເມື່ອມັນໄດ້ຮັບແສງສະຫວ່າງທີ່ພຽງພໍເທົ່ານັ້ນ.
• ອຸນຫະພູມທີ່ເໝາະສົມ. ຍ້ອນວ່າພືດພັນແຕ່ລະຊະນິດແມ່ນມີລະດູປູກທີ່ແຕກຕ່າງກັນ, ພືດແຕ່ລະຊະນິດກໍ່ຈະແຕກງອກອອກມາໄດ້ດີທີ່ສຸດຕາມອຸນຫະພູມ ແລະ ໄລຍະເວລາທີ່ເໝາະສົມທີ່ແຕກຕ່າງກັນໄປໃນແຕ່ລະໆດູການ

ການປູກແກ່ນແນວ

ຕາມທຳມະດາແລ້ວ ການປູກແກ່ນແນວມີຢູ່ 2 ວິທີຄື: (1) ປູກແກ່ນໃນສວນກ້າເບັ້ຍກ່ອນ,ຫຼື (2) ເອົາແກ່ນໄປປູກເລີຍ. ທ່ານຈະເລືອກໃຊ້ວິທີໃດນັ້ນມັນກໍ່ຂຶ້ນກັບຊະນິດພືດທີ່ທ່ານຕ້ອງການ, ສະພາບອາກາດທີ່ເໝາະສົມແກ່ການປູກ ແລະ ພື້ນທີ່ສຳລັບກ້າວ່າມີ ຫຼື ບໍ່

ການເອົາແກ່ນແນວໄປປູກເລີຍ

ແກ່ນແນວພືດທີ່ມີຂະໜາດໃຫຍ່ກວ່າແມ່ນເໝາະສົມໃນການນຳເອົາໄປປູກລົງດິນປູກຝັງເລີຍ ເພາະວ່າຮາກຂອງພວກມັນຂະຫຍາຍໄວ ແລະ ຫາກຍ້າຍມັນໄປປູກອີກບາດໜຶ່ງມັນກໍ່ຈະເຮັດໃຫ້ຮາກຂອງມັນເກີດຄວາມເສຍຫາຍໄດ້ງ່າຍ. ຂຸດຂຸມປູກໃຫ້ເລິກ 2 ຫຼື 3 ເທື່ອຂອງຂະໜາດຂອງແກ່ນພືດທີ່ຈະປູກນັ້ນ. ເອົາແກ່ນພືດ 2 ຫາ 3 ແກ່ນປ່ອນລົງໄປໃນຂຸມນັ້ນແລ້ວກໍ່ປິດປາກຂຸຸມໄວ້.ສຳລັບແກ່ນພືດທີ່ມີຂະໜາດນ້ອຍຫຼາຍ ແມ່ນຄວນໃຫ້ຫວ່ານໃຫ້ ທົ່ວພື້ນທີ່ໆຈະປູກນັ້ນ. ເພື່ອປ້ອງກັນບໍ່ໃຫ້ເມັດພືດຕິດກັນໃນເວລາຫວ່ານ ກ່ອນຈະຫວ່ານນັ້ນແມ່ນໃຫ້ເອົາແກ່ນແນວພືດປົນກັບຂີ້ຊາຍສາກ່ອນ. ຫຼັງຈາກຫວ່ານແກ່ນພືດແລ້ວ ໃຫ້ເອົາແນວປົກ ຫຼື ດິນປົກເປັນຊັ້ນບາງໆໄວ້. ພ້ອມນີ້ກໍ່ໃຫ້ໃຊ້ລູກກິ້ງມາກິ້ງເທິງພື້ນທີ່ຫວ່ານນັ້ນເບົາໆເພື່ອໃຫ້ແກ່ນແຈບລົງໄປໃນດິນ ເຊິ່ງຈະເປັນການຊ່ວຍໃຫ້ມັນແຕກງອກອອກມາໄດ້ງ່າຍຂຶ້ນ.

ການກ້າແກ່ນໃນສວນກ້າ

ການກ້າແກ່ນໃນສວນກ້ານັ້ນເປັນການຊ່ວຍໃຫ້ແກ່ນແນວແຕກງອກອອກມາດ້ວຍການຄວບຄຸອຸນຫະພູມ, ນ້ຳ ແລະ ສັດຕູພືດ. ການເອົາເບັ້ຍພືດທີ່ກ້າໃນສວນກ້າໄປປູກໃນພື້ນທີ່ໆຫາກໍ່ເອົາຫຍ້າອອກໝົດແລ້ວນັ້ນເປັນການຊ່ວຍໃຫ້ຕົ້ນເບັ້ຍນັ້ນສາມາດນຳໃຊ້ນ້ຳ ແລະ ດິນໄດ້ຢ່າງມີປະສິດທິພາບ.