ຜັກບົ່ວ ແລະ ຜັກທຽມ Allium spp

ຜັກບົ່ວ ແລະ ຜັກທຽມ
Allium spp.

ຄຸນຄ່າທາງໂພຊະນາການ
ຜັກບົ່ວ ແລະ ຜັກທຽມ ປະກອບດ້ວຍວິຕາມິນເອ ແລະ ວິຕາມິນຊີ ໃນປະລິມານສູງ, ແລະ ພວກມັນຍັງມີຄຸນນະສົມບັດ ໃນການຕ້ານການອັກເສບ ໃນລະບົບທາງເດີນອາຫານນໍາອີກ.

ວິທີການກິນ ຜັກບົ່ວ ແລະ ຜັກທຽມ
ຊອຍໃບຜັກບົ່ວດິບ ໃສ່ຍຳສະຫຼັດ, ແກງ ຫຼື ອາຫານປະເພດເສັ້ນ. ເອົາຫົວຜັກບົ່ວ ຫຼື ຫົວຜັກທຽມມາປຸງໃສ່ອາຫານ ເຊັ່ນ: ຕົ້ມ, ລາບ, ແກງກະລີ່ ແລະ ຂົ້ວ ເພື່ອກິນກັບເຂົ້າ.

ຄໍາແນະນໍາ ສຳລັບການຂະຫຍາຍພັນ
ແກ່ນຜັກບົ່ວ ສາມາດຫວ່ານແບບທາງກົງ ໃສ່ໜານໄດ້ເລີຍ. ຫວ່ານປະມານ 50 ແກ່ນ ຕໍ່ໜຶ່ງຕາແມັດຂອງໜານ. ເອົາດິນຈາກຄອກຝຸ່ນບົ່ມມາ ປົກແກ່ນໄວ້ພໍບາງໆ ແລະ ຫົດນໍ້າໜານດ້ວຍຄວາມລະມັດລະວັງ ຫຼັງຈາກຫວ່ານແກ່ນແລ້ວ. ຖ້າຈໍາເປັນ, ທ່ານສາມາດຂັດຈ້ອນເບ້ຍອອກເພື່ອໃຫ້ມັນບາງລົງ ຫຼັງຈາກທີ່ມັນອອກຈາວແລ້ວ, ແຍກມັນອອກຫ່າງກັນປະມານ 7 ຊັງຕີແມັດ. ເພື່ອຂະຫຍາຍພັນຜັກທຽມ, ແກະຫົວກະທຽມອອກເປັນກີບ ຫຼື ງີມ ເອົາໄປປູກໃສ່ໜານເລີຍ, ປູກຫ່າງກັນປະມານ 10 ຊັງຕີແມັດ. ແຕ່ລະງີມທີ່ປູກຈະຂຶ້ນເປັນຫົວໃໝ່.

ວິທີເບິ່ງແຍງຮັກສາ
ຜັກບົ່ວ ແລະ ຜັກທຽມ ເປັນພືດທີ່ຕ້ອງການ ການບົວລະບັດຮັກສາໃນລະດັບຕໍ່າ. ໃຫ້ຫົດນໍ້າທຸກໆ 2 - 3 ວັນ ແລະ ເສຍຫຍ້າເປັນບາງຄັ້ງຄາວ.

ບັນຫາທີ່ອາດຈະເກີດຂຶ້ນ 
ຜັກບົ່ວ ແລະ ຜັກທຽມ ບໍ່ມີສັັດຕູພືດ ແລະ ພະຍາດ. ຖ້າວ່າມັນຖືກຝົນຫຼາຍ ຫຼື ຖືກຫົດນໍ້າຫຼາຍໂພດຈົນດິນປຽກ, ຮາກ, ກ້ານ ແລະ ຫົວ ອາດຈະເນົ່າ.ສະນັ້ນ ບໍ່ຄວນເອົາເຍື່ອຝຸ່ນບົ່ມປົກຫຸ້ມຜັກບົ່ວໜາເກີນໄປ.

ການເກັບກ່ຽວ
ໃບຜັກບົ່ວສາມາດຖືກເກັບໄດ້ພາຍຫຼັງປູກໄດ້ 6 ອາທິດ. ລໍຖ້າປະມານ 8 - 12 ອາທິດ ທ່ານຈະໄດ້ຫົວທີ່ໃຫຍ່ຂຶ້ນ. ເດັດໃບທີ່ຢູ່ຂ້າງລຸ່ມອອກ ແລະ ປະໃບສ່ວນເທິງໄວ້ສອງສາມໃບ ເພື່ອຮັກສາໃຫ້ຕົ້ນສືບຕໍ່ໃຫຍ່ຂຶ້ນ. ຜັກທຽມ ຕ້ອງການໄລຍະປູກທີ່ດົນກ່ວາຜັກບົ່ວຫຼາຍ. ຜັກທຽມພ້ອມທີ່ຈະຖືກເກັບກ່ຽວ ພາຍຫຼັງທີ່ປູກໄດ້ 4 - 6 ເດືອນຫຼັງຈາກທີ່ປູກຜັກທຽມໄດ້ 3 ອາທິດ, ຄວນເຊົາຫົດນໍ້າ ເພື່ອໃຫ້ໃບຂອງມັນເປັນສີເຫຼືອງ ແລະ ຫົວກໍ່ຈະເລີ່ມອອກ. ກ່ອນທີ່ຈະເກັບກ່ຽວ, ຄວນເຮັດໃຫ້ດິນຜ່ອຍເລັກນ້ອຍ ແລ້ວກໍ່ດຶງຫົວຜັກທຽມຂື້ນ, ແຕ່ຕ້ອງລະມັດລະວັງບໍ່ໃຫ້ມັນຂາດຫັກ. ຫຼັງຈາກເກັບກ່ຽວຫົວຜັກແລ້ວ, ເອົາໄປຕາກແດດໃຫ້ແຫ້ງ.

ໄລຍະເວລາ ແລະ ການອອກຜົນຜະລິດ
ຜັກບົ່ວທີ່ເກັບກ່ອນ ຈະໃຫ້ຜົນຜະລິດປະມານ 800 ກຣາມ ຕໍ່ໜຶ່ງຕາແມັດ, ສ່ວນຜັກບົ່ວທີ່ເກັບຊ່ວງຫຼັງ ຈະໃຫ້ຜົນຜະລິດເຖິງ 1200 ກຣາມ ຕໍ່ຕາແມັດ. ສ່ວນຜັກທຽມຈະໃຫ້ຜົນຜະລິດປະມານ 1000 ຫົວ ຕໍ່ຕາແມັດ.