ວັດສະດຸປົກຄຸມດິນ

ມັນຈະເປັນການດີທີ່ສຸດ ສຳລັບໜ້າດິນ ຫາກມີສິ່ງປົກຫຸ້ມມັນໄວ້ ເຖິງຈະເປັນໃນລະດູປູກຝັງ ກໍ່ຕາມ. ສິ່ງທີ່ໃຊ້ປົກຫຸ້ມໜ້າດິນ ນີ້ອາດຈະເປັນວັດສະດຸອັນໃດກໍ່ໄດ້. ວັດສະດຸທີ່ປົກໜ້າດິນ ນີ້ຈະຮັກສາຄວາມຊຸ່ມໃຫ້ກັບດິນ, ຄວບຄຸມຫຍ້າ ແລະ ປ້ອງກັນການເຈື່ອນຂອງດິນ. ສິ່ງ ເສດເຫຼືອຈາກຕົ້ນພືດຕ່າງໆ ເຊັ່ນ: ກົກສາລີ, ເຟືອງ, ເຄືອໝາກຖົ່ວ, ຫຼື ແມ່ນແຕ່ຫຍ້າກໍ່ສາມາດເປັນສິ່ງທີ່ປົກຫຸ້ມໜ້າດິນໄດ້ດີທີ່ສຸດ, ເພາະວ່າສາມາດປະໃຫ້ພວກມັນເນົ່າຢູ່ກັບບ່ອນປູກຝັງນັ້ນເລີຍ ເພື່ອໃຫ້ກາຍເປັນຝຸ່ນທີ່ເພີ່ມສານອິນຊີໃຫ້ກັບດິນ. ບັນດາຫຍ້າຕ່າງໆກໍ່ສາມາດນຳມາໃຊ້ປົກໜ້າດິນໄດ້ເຊັ່ນກັນ ແຕ່ຕ້ອງໄດ້ຕັດເອົາມາກ່ອນທີ່ພວກມັນຈະມີແກ່ນ ເພື່ອປ້ອງກັນພວກມັນເກີດກັບຄືນມາໃໝ່. ໃຊ້ແນວມາປົກດິນໃຫ້ໜາບໍ່ເກີນ 10 ຊມ, ຖ້າໜາເກີນກວ່ານີ້ຫຼາຍມັນກໍ່ຈະເກັບຄວາມຊຸ່ມໄວ້ຫຼາຍ ແລະ ສາມາດພາໃຫ້ເກີດພະຍາດແກ່ພືດຜັກໄດ້.



ຝຸ່ນສັດ (ຝຸ່ນຄອກ)
ຝຸ່ນສັດສາມາດຕອບສະໜອງທາດບຳລຸງລ້ຽງທຸກຢ່າງທີ່ດິນຕ້ອງການ ແລະ ຊ່ວຍປັບປຸງ ເນື້ອດິນ, ໂຄງສ້າງຂອງດິນ ແລະ ໃຫ້ຄວາມອຸດົມສົມບູນແກ່ດິນ. ແຕ່ໃນທາງກັບກັນ ຝຸ່ນເຄມີສະໜອງທາດບຳລຸງລ້ຽງໃຫ້ກັບພືດພຽງແຕ່ສອງ ຫຼື ສາມຊະນິດເທົ່ານັ້ນ ແລະ ກໍ່ຍັງບໍ່ ໄດ້ຊ່ວຍປັບປຸງດິນ.ໃນການນຳໃຊ້ຝຸ່ນສັດນີ້ກໍ່ມີສິ່ງທີ່ຕ້ອງໄດ້ເອົາໃຈໃສ່ຢູ່ຈຳນວນໜຶ່ງ. ການໃຊ້ຝຸ່ນສັດໃນປະລິມານທີ່ຫຼາຍເກີນໄປກໍ່ຈະພາໃຫ້ມີທາດບຳລຸງລ້ຽງສະສົມກັນຂຶ້ນໃນດິນຫຼາຍໂພດ ແລະ ສາມາດພາໃຫ້ເກີດມົນລະພິດກັບນ້ຳຕາມຫ້ວຍຮ່ອງໄດ້. ຝຸຸ່ນສັດສົດກໍ່ມີແມ່ພະຍາດທີ່ສາມາດພາໃຫ້ເກີດການເຈັບເປັນໄດ້. ບໍ່ໃຫ້ເອົາຝຸ່ນສັດສົດໄວ້ໃກ້ກັບຫ້ວຍນ້ຳລຳທານ. ໃຫ້ລ້າງມື ແລະ ຊັກເຄື່ອງນຸ່ງຂອງຖືໃຫ້ສະອາດທຸກໆຄັ້ງຫຼັງຈາກໃສ່ຝຸ່ນສັດແລ້ວ.



ຝຸ່ນຈາກສິ່ງເສດເຫຼືອຈາກຮ່າງກາຍຄົນ (ຂີ້ ແລະ ຍ່ຽວ)
ຍ່ຽວຂອງຄົນກໍ່ສາມາດເປັນຝຸ່ນໄດ້ ແລະ ຖ້ານຳໃຊ້ຕາມວິທີການທີ່ເໝາະສົມ ຂີ້ຄົນກໍ່ສາມາດເປັນຝຸ່ນທີ່ສາມາດເພີ່ມສານອິນຊີໃຫ້ກັບດິນໄດ້ເຊັ່ນກັນ. ແຕ່ວ່າຂີ້ ແລະ ຍ່ຽວຄົນນັ້ນມີແມ່ພະຍາດອັນຕະລາຍທີ່ສາມາດພາໃຫ້ເກີດພະຍາດກັບຄົນໄດ້ ຖ້າຫາກນຳໃຊ້ບໍ່ຖືກວິທີ. (ສຳລັບວິທີການນຳໃຊ້ຂີ້ຍ່ຽວຂອງຄົນເປັນຝຸ່ນປັບປຸງຜົນຜະລິດພືດທັນຍາຫານຢ່າງປອດໄພ

ຝຸ່ນໝັກ
ຝຸ່ນໝັກແມ່ນເປັນຝຸ່ນທຳມະຊາດທີ່ໝັກຈາກເສດອາຫານ, ສິ່ງເສດເຫຼືອຈາກພືດທັນຍາ ຫານ, ຫຍ້າ ແລະ ຝຸ່ນສັດ. ການໃສ່ຝຸ່ນໝັກເປັນວິທີການໜຶ່ງທີ່ເພີ່ມທາດບຳລຸງລ້ຽງໃຫ້ກັບດິນ. ການທີ່ຈະເຮັດຝຸ່ນໝັກໃສ່ພື້ນທີ່ປູກຝັງອັນກວ້າງໃຫຍ່ນັ້ນແມ່ນຕ້ອງໄດ້ອອກແຮງງານໜັກຈິ່ງຈະພຽງພໍ, ສະນັ້ນ ຝຸ່ນໝັກຈິ່ງມັກນຳມາໃຊ້ໃນເນື້ອທີ່ປູກຝັງຕອນນ້ອຍຫຼາຍກວ່າ
ຝຸ່ນໝັກແມ່ນຖືກນຳໄປໃຊ້ໃນຫຼາຍຮູບແບບ ເຊັ່ນ:

•  ເອົາຝຸ່ນໝັກເຕັມຊວ້ານໃສ່ລົງຮອງພື້ນຂຸມກ່ອນປູກຕົ້ນໄມ້ກິນໝາກ.
• ເມື່ອທ່ານກ້າແກ່ນພືດໃຫ້ເອົາຝຸ່ນໝັກກຳໜຶ່ງປົນກັບດິນໃນຂຸມ.
• ເອົາຝຸ່ນໝັກໃສ່ຢາຍໄວ້ເທິງໜ້າດິນກ່ອນຈະໄຖ ຫຼື ຂຸດປີ້ນໜ້າດິນ.
• ໃນເວລາທີ່ພືດກຳລັງໃຫຍ່ ໃຫ້ເອົາຝຸ່ນໝັກຢາຍອ້ອມເປັນວົງອ້ອມຕາມກິ່ງກ້ານຂອງພືດ ແລະ ຖ້າແມ່ນຕົ້ນໄມ້ກໍ່ໃຫ້ເອົາໃສ່ຢາຍໄປຕາມຂອບຂອງຮົ່ມຕົ້ນໄມ້ໃນເວລາທ່ຽງວັນ. ຈາກນັ້ນກໍ່ເອົາດິນປົກໄວ້ໜ້ອຍໜຶ່ງ. ພືດຈະຄ່ອຍດູດຊັບເອົາທາດບຳລຸງລ້ຽງຈາກຝຸ່ນນັ້ນເທື່ອລະໜ້ອຍໃນເວລາທີ່ນ້ຳພາເອົາທາດບຳລຸງລ້ຽງນັ້ນລົງໄປຫາຮາກ.

ນ້ຳຝຸ່ນໝັກ
ຝຸ່ນໝັກສາມາດນຳເຮັດໃຫ້ເປັນຝຸ່ນຊະນິດນ້ຳເພື່ອເປັນຝຸ່ນໃຫ້ກັບພືດຜັກຕ່າງໆ ແລະ ໃຊ້ເພື່ອຄວບຄຸມສັດຕູພືດຕ່າງໆ. ເອົາຝຸ່ນໝັກຈຳນວນໜຶ່ງຫໍ່ໃສ່ໃນຜ້າ ແລະ ມັດໄວ້. ເອົາຫໍ່ຝຸ່ນນັ້ນແຊ່ໄວ້ໃນຄຸນ້ຳປະໄວ້ 7 ຫາ 14 ມື້. ເມື່ອນ້ຳແຊ່ນັ້ນກາຍເປັນສີນ້ຳຕານ ກໍ່ໃຫ້ເອົາຖົງນັ້ນອອກມາໄຂ ແລະ ເອົາໄປໃສ່ບ່ອນປູກພືດຜັກ. ສ່ວນນ້ຳແຊ່ຝຸ່ນໝັກນັ້ນກໍ່ເອົາໄປສີດ ຫຼື ໃສ່ບົວຫົດໃສ່ໃບພືດຜັກ ຕ່າງໆ. ຫຼັງຈາກໃຊ້ແລ້ວໃຫ້ລ້າງມືທຸກໆຄັ້ງ.