ທ່ານ ຄຳໄມ ເໝືອນສິດທິດາ ເປັນເຈົ້າຂອງສວນກ້າເບ້ຍໄມ້ ຕັ້ງຢູ່ໂພນມ່ວງ ເມືອງນາຊາຍທອງ ນະຄອນຫຼວງວຽງຈັນ ແລະ ໄດ້ຮັບເປັນຄອບຄົວຕົວແບບຂອງເມືອງນາຊາຍທອງ ໃນດ້ານການກ້າເບ້ຍໄມ້ເປັນສິນຄ້າ ໄດ້ກ່າວວ່າ: ໃນເມື່ອກ່ອນໄດ້ເປັນພະນັກງານລັດ ມາຮອດປີ 2000 ໄດ້ລາອອກມາສ້າງເສດຖະກິດຄອບຄົວ ຫຼັງຈາກນັ້ນ ກໍ່ໄດ້ນຳພາຄອບຄົວປະກອບອາຊີບເປັນຊາວກະສິກອນ ໂດຍການເຮັດສວນກ້າເບ້ຍໄມ້ ເພາະໄດ້ແນມເຫັນວ່າອາຊີບດັ່ງກ່າວ ແມ່ນຈະສາມາດນຳພາຄອບຄົວໃຫ້ມີຢູ່ມີກິນໄດ້ ເຊິ່ງໃນເບື້ອງຕົ້ນໄດ້ເຮັດສວນກ້າເບ້ຍໄມ້ໃນເນື້ອທີ່ໜຶ່ງໄລ່ ສາມາດກ້າເບ້ຍໄມ້ໄດ້ປີໜຶ່ງ ແສນ ຫາສອງແສນເບ້ຍ ໂດຍໄດ້ກ້າເບ້ຍໄມ້ແບບຮອບວຽນ ແລະ ໃນປັດຈຸບັນເຫັນວ່າທ່າແຮງຄວາມຕ້ອງການເບ້ຍໄມ້ສູງຂຶ້ນ ຍ້ອນການຊີ້ນຳຂອງພັກ-ລັດ ໄດ້ລະດົມໃຫ້ປະຊາຊົນປູກຕົ້ນໄມ້ ຈຶ່ງໄດ້ຂະຫຍາຍສວນອອກເປັນ 4 ເຮັກຕາກວ່າ ໄດ້ກ້າເບ້ຍໄມ້ ປະກອບມີ ໄມ້ປະດັບ ໄມ້ມົງຄຸນ ໄມ້ກິນໝາກກິນໃບ ແລະ ໄມ້ອຸດສາຫະກຳ ເບ້ຍໄມ້ທຸກປະເພດທີ່ກ່າວມານີ້ ແມ່ນລ້ວນແລ້ວແຕ່ໄດ້ຮັບຄວາມນິຍົມຈາກລູກຄ້າ.
ສຳລັບທຶນທີ່ນຳມາລົງທຶນໃນການດຳເນີນທຸລະກິດນີ້ ແມ່ນປະກອບມີທຶນສ່ວນຕົວ ແລະ ໄດ້ກູ້ຢືມຈາກທະນາຄານ ໂດຍໄດ້ນຳໃຊ້ທຶນສູງສົມຄວນ ແລະ ສຳລັບລາຍຮັບທີ່ໄດ້ມາແມ່ນໄດ້ພຽງແຕ່ກຸ້ມກິນ ໃນການເຮັດສວນກ້າເບ້ຍໄມ້ນີ້ໄດ້ໃຊ້ແຮງງານຫຼັກ 18 ຄົນ. ສຳລັບຕະຫຼາດຫຼັກໆໃນການຈຳໜ່າຍເບ້ຍໄມ້ຂອງສວນດັ່ງກ່າວນີ້ ແມ່ນກຸ່ມບໍລິສັດຕ່າງໆ ມາສັ່ງໃຫ້ກ້າເບ້ຍໄມ້ ແລະ ອີກສ່ວນໜຶ່ງໄດ້ມີແມ່ຄ້າມາຊື້ໄປຂາຍຕໍ່ ສຳລັບປີນີ້ໄດ້ວາງຄາດໝາຍຜະລິດເບ້ຍໄມ້ໃຫ້ໄດ້ 850.000 ເບ້ຍ ເພື່ອໃຫ້ສາມາດຕອບສະໜອງການສັ່ງຈອງຂອງລູກຄ້າ ແລະ ສຳລັບປີ 2014 ກໍ່ສາມາດຜະລິດເບ້ຍໄມ້ຈຳໜ່າຍໄດ້ 7 ແສນເບ້ຍ.
ພາຍຫຼັງໄດ້ຫັນມາປະກອບອາຊີບນີ້ ເຫັນວ່າສະພາບຄອບຄົວດີຂຶ້ນ ລູກໄດ້ຮ່ຳຮຽນ ການດຳລົງຊີວິດໃນຄອບຄົວດີຂຶ້ນເປັນກ້າວໆ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ