ສົ່ງເສີມການລ້ຽງປາໃນກະຊັງ
ວັນທີ 4 ມັງກອນ 2013 ທີ່ຜ່ານມາ ຢູ່ຫ້ອງປະຊຸມສູນການຄ້າລາວ-ໄອເຕັກ ນະຄອນຫຼວງວຽງຈັນ ພະແນກກະສິກຳ-ປ່າໄມ້ ນະຄອນຫຼວງວຽງຈັນ ຈັດກອງປະຊຸມສຳມະນາກ່ຽວກັບການລ້ຽງປານິນໃສ່ກະຊັງເພື່ອສົ່ງອອກ ໂດຍການເປັນປະທານຮ່ວມຂອງທ່ານ ຈັນທາທິບພະວົງພັນ ຫົວໜ້າພະແນກກະສິກຳ-ປ່າໄມ້ ນະຄອນຫຼວງວຽງຈັນ ທ່ານ ແດນ ວໍລະວົງ ປະທານບໍລິສັດແກຣນເບ ຜູ້ຈຳໜ່າຍອາຫານ ຈຳກັດ (ປະເທດໄທ) ພ້ອມນີ້ຍັງມີນັກສຳມະນາທີ່ມາຈາກຫ້ອງວ່າການປົກຄອງນະຄອນຫຼວງວຽງຈັນ ກົມນຳເຂົ້າ ແລະ ສົ່ງອອກກະຊວງອຸດສາຫະກຳ ແລະ ການຄ້າ ກົມລ້ຽງສັດ ແລະ ການປະມົງ ກະຊວງກະສິກຳ-ປ່າໄມ້ ຫ້ອງການກະສິກຳ ແລະ ປ່າໄມ້ເມືອງແລະ ບັນດາຜູ້ທີ່ລ້ຽງປານິນໃສ່ກະຊັງຈຳນວນໜຶ່ງເຂົ້າຮ່ວມ.ການລ້ຽງປານິນໃສ່ກະຊັງໃນປັດຈຸບັນ ແມ່ນມີທ່າອ່ຽງກ້າວຂຶ້ນເປັນຈຳນວນຫຼາຍ ສາມາດຕອບສະໜອງດ້ານສະບຽງອາຫານໃຫ້ຊາວນະຄອນຫຼວງວຽງຈັນ ໄດ້ເປັນຢ່າງດີ ໃນປີ 2000 ການລ້ຽງປານິນໃສ່ກະຊັງໃນນະຄອນຫຼວງວຽງຈັນ ມີພຽງ 100 ກວ່າກະຊັງ ຍ້ອນຄວາມຕ້ອງການຂອງຜູ້ບໍລິໂພກເພີ່ມຂຶ້ນໃນແຕ່ລະວັນ ແລະ ການດຳເນີນທຸລະກິດນີ້ແມ່ນມີທ່າກ້າວ ຈຶ່ງໄດ້ມີການຖອດຖອນບົດຮຽນຈາກປະເທດເພື່ອນບ້ານ (ປະເທດໄທ) ຜູ້ທີ່ມີປະສົບການມາກ່ອນ ແລະ ຮອດປັດຈຸບັນ ທົ່ວນະຄອນຫຼວງວຽງຈັນ ການລ້ຽງປານິນໃສ່ກະຊັງຕາມລຳແມ່ນ້ຳຂອງ ແລະ ນ້ຳງື່ມ ມີເຖິງ 2000 ກວ່າກະຊັງ ແລະ ສາມາດຕອບສະໜອງທາດຊີ້ນປາ ໃຫ້ຜູ້ບໍລິໂພກໄດ້ປະມານ 34 ໂຕນ/ມື້.ກອງປະຊຸມນີ້ ເພື່ອໃຫ້ບັນດານັກສຳມະນາໄດ້ປຶກສາຫາລືກ່ຽວກັບຄວາມເປັນໄປໄດ້ໃນການລ້ຽງປານິນໃສ່ກະຊັງເພື່ອສົ່ງອອກໄປຕະຫຼາດຕ່າງປະເທດ ແກ້ໄຂບັນຫາປານິນເຫຼືອຕະຫຼາດຂອງຜູ້ທີ່ລ້ຽງປາກະຊັງປະສົບຢູ່ໃນປັດຈຸບັນ ແລະ ເພື່ອສ້າງຈິດສຳນຶກໃຫ້ແກ່ຜູ້ທີ່ລ້ຽງປາກະຊັງຜະລິດຕາມມາດຕະຖານອາຫານສາກົນເທື່ອລະກ້າວ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ