ການ​ປູກ​ຖົ່ວ​ຂຽວ

ຖົ່ວ­ຂຽວ​ເປັນ​ພືດ​ຕະ­ກຸນ​ຖົ່ວ​ທີ່​ມີ​ຄຸນ­ຄ່າ​ທາງ​ອາ­ຫານ​ສູງ ສາ­ມາດ​ນຳ​ມາ​ບໍ­ລິ­ໂພກ​ໄດ້​ຫຼາຍ​ຮູບ​ການ​ເຊັ່ນ: ຖົ່ວ­ງອກ, ເສັ້ນ​ລ້ອນ, ເຮັດໄສ້​ເຂົ້າ­ໜົມ ແລະ ອື່ນໆ ຊາວ​ລາວ​ປູກ​ຖົ່ວ­ຂຽວ​ມາ​ເປັນ​ເວ­ລາ​ດົນ​ນານແລ້ວ ແຕ່​ວ່າ​ປູກ​ເປັນ​ແບບ​ປະ­ຖົມ​ປະ​ຖານ​ຈິ່ງ​ໄດ້­ຜົນ​ຜະ­ລິດ​ຕ່ຳ ແລະ ບໍ່ແນ່­ນອນ.

ແນວ​ພັນ​ສ່ວນ​ໃຫຍ່​ແມ່ນ​ແນວ​ພັນ​ພື້ນ­ເມືອງ ແລະ ພັນ​ປັບ­ປຸງ ຊຶ່ງມີ 3 ຊະ­ນິດ: ເມັດ​ນ້ອຍ​ສີ­ຂຽວ (ພັນ​ອູ​ທອງ, ກຳ­ແພງ​ແສນ 1 ແລະ 2 ໄຊ​ນາດ 60); ພັນ​ເມັດ​ຂະ­ໜາດ​ກາງ​ມີ​ສີ­ເຫຼືອງ​ປົນ​ຂຽວ; ພັນ​ຖົ່ວຂຽວ​ເມັດ​ດຳ (ພັນ​ອູ​ທອງ) ຖົ່ວ­ຂຽວ​ສາ­ມາດ​ປູກ​ໄດ້​ໃນ​ດິນ​ເກືອບ​ທຸກຊະ­ນິດ ແຕ່​ດິນ­ຊາຍ​ແກມ​ຕົມ​ລະ­ບາຍ​ນ້ຳ​ໄດ້​ດີ​ເໝາະ​ສົມ​ກວ່າ​ໝູ່ ແລະ ຄວນ​ປູກ​ກາງ​ລະ­ດູ­ຝົນ​ຫາ​ຕົ້ນ​ລະ­ດູ​ໜາວ​ຄື ປະ­ມານ​ເດືອນ 9-10 ແລະ ເດືອນ 1-2 ຖົ່ວ­ຂຽວ​ເປັນ​ພືດ​ອາ­ຍຸ​ສັ້ນ​ປະ­ມານ 80-100 ວັນ ຫຼັງ ຈາກ​ປູກ​ກໍ​ສາ­ມາດ​ເກັບ​ກ່ຽວ​ໄດ້.

ວິ­ທີ​ການ​ປູກ​ມີ 2 ວິ­ທີ​ຄື

ສຳ­ລັບ​ການ​ກຽມ​ດິນ​ທີ່​ຈະ​ປູກ​ຖ້າ​ເປັນ​ດິນ​ແຄມ​ນ້ຳ ຊຶ່ງ​ມີ​ສ່ວນ​ປະສົມ​ຂອງ​ດິນ­ຊາຍ, ດິນ​ຕົມ ແລະ ອົງ­ຄະ​ທາດ​ແລ້ວ ກໍ​ສາ­ມາດ​ຂຸດ​ຂຸມ ປູກ​ໄດ້​ເລີຍ​ແຕ່​ຖ້າ​ເປັນ​ດິນ​ສວນ, ດິນ​ນາ​ຄວນ​ກຽມ​ດິນ​ໃຫ້​ລະ­ອຽດ​ພໍສົມ­ຄວນ​ຄື: ສິ່ງ​ສຳ­ຄັນ​ແມ່ນ​ຕ້ອງ​ຈຳ­ກັດ​ຫຍ້າ​ໃຫ້​ມີ​ນ້ອຍ​ທີ່​ສຸດ ແລະ ດິນ​ກໍ​ຄວນ​ຈະ​ລະ­ອຽດ​ຈົນ​ເປັນ​ຜົງ​ພຽງ​ແຕ່​ໃຫ້​ດິນ​ເປັນ​ກ້ອນ​ນ້ອຍໆ​ກໍ ສາ­ມາດ​ປູກ​ໄດ້​ສິ່ງ​ສຳ­ຄັນ​ອີກ​ອັນ​ໜຶ່ງ​ກໍ​ຄື​ລັກ­ສະ­ນະ​ດິນ​ຕ້ອງ​ໃຫ້​ຮາບພຽງ­ພໍ​ສົມ­ຄວນ ເພື່ອ​ໃຫ້​ຖົ່ວ​ຈະ­ເລີນ​ເຕີບ​ໂຕ​ສະ​ໝ່ຳ​ສະ­ເໝີ​ດີ.

ປູກ​ແບບ​ຫວ່ານວິ­ທີ​ນີ້​ເຫັນ​ວ່າ​ມັນ​ຫຼ້າ​ສະໄໝ​ລຳ­ບາກ​ໃນ​ການ​ບົວ­ລະ­ບັດ​ຮັກ­ສາ ສ່ວນ​ວິ­ທີ​ປູກ​ແບບ​ເປັນ​ແຖວ​ເປັນວິ­ທີ​ທີ່​ຍັງ​ນິ­ຍົມ​ກວ່າ​ໝູ່​ເພາະ­ວ່າ ການ​ບົວ­ລະ­ບັດ​ຮັກ­ສາ​ກໍ​ສະ­ດວກ​ສະບາຍ, ການ​ປູກ​ແບບ​ເປັນ​ແຖວ​ໃຫ້​ປູກ​ໄລ­ຍະ​ຫ່າງ​ລະ­ຫວ່າງ​ແຖວ 80 ຊັງ​ຕີ​ແມັດ ໄລ­ຍະ​ຫ່າງ​ລະ­ຫວ່າງ​ຂຸມ​ປະ­ມານ 20 ຊັງ​ຕີ​ແມັດ ໃຫ້​ຢອດ ເມັດ​ຖົ່ວ­ຂຽວ​ຕາມ​ຂຸມ 2-3 ເມັດ​ຕໍ່​ຂຸມ ສິ່ງ​ສຳ­ຄັນ​ໃນ​ການ​ຢອດ​ເມັດ​ບໍ່​ຄວນ​ຢອດ​ເລິກ​ເກີນ 2 ຊັງ​ຕີ​ແມັດ ແລະ ການ​ບົວ­ລະ­ບັດ​ຮັກ­ສາ ສຳລັບຖົ່ວ­ຂຽວ​ແລ້ວ​ບໍ່​ຈຳ­ເປັນ​ແທ້​ບໍ່​ໃສ່​ຝຸ່ນ​ກໍ​ໄດ້ ເພາະ​ຖົ່ວ­ຂຽວ​ສາ­ມາດ​ດູດເອົາ​ທາດ​ອາ­ຫານ​ທີ່​ຈຳ​ປັນ​ໄດ້​ເອງ​ຈາກ​ອາ­ກາດ (ທາດ​ອາ​ຊົດ) ແຕ່​ໃນ​ກໍ­ລະ­ນີ​ຫາກ​ມີ​ຄວາມ​ຈຳ­ເປັນ​ກໍ​ໃສ່​ເລັກ​ນ້ອຍ​ຄື ຝຸ່ນ​ຄອກ​ໃສ່ 1 ກິ​ໂລ​ຕໍ່ 1 ແມັດ​ມົນ­ທົນ, ຝຸ່ນ​ເຄ​ມີ​ຊະ­ນິດ 16-20-00 ໃສ່ 15-20 ກຼາມ​ຕໍ່1 ແມັດ​ມົນ­ທົນ ຫຼື ວ່າ​ປະ­ມານ 1 ບ່ວງ​ແກງ​ຕໍ່ 1 ແມັດ​ມົນ­ທົນ ສິ່ງ​ສຳ­ຄັນ​ໃນ​ເວ­ລາ​ໃສ່​ຝຸ່ນ​ເຄ​ມີ ແຕ່​ລະ​ຊະ­ນິດ​ຕ້ອງ​ເອົາ​ດິນ​ຖົມ​ເພື່ອ​ຫຼີກ­ເວັ້ນ​ການ​ລະ​ເຫີຍ​ໜີ ແລະ ເສຍ​ລ້າ.

ສ່ວນ​ການ​ເສຍ​ຫຍ້າ ແລະ ຖອນ​ແຍກ

ເມື່ອ​ຕົ້ນ​ຖົ່ວ­ຂຽວ​ມີ​ອາ­ຍຸ​ໄດ້ 2-3 ອາ­ທິດ​ແລ້ວຄວນ​ຖອນ​ແຍກ​ຕົ້ນ​ທີ່​ບໍ່​ແຂງ­ແຮງ​ອອກ​ຈົ່ງ​ໄວ້ 1-2 ຕົ້ນ​ຕໍ່​ຂຸມ​ເປັນ​ຢ່າງ​ຫຼາຍ​ຫຼັງ​ຈາກ​ນັ້ນ​ກໍ​ຫຼົກ​ຫຍ້າ ຖ້າ​ປູກ​ໃນ​ລະ­ດູ­ແລ້ງຄວນ​ໃຫ້​ນ້ຳ​ແກ່​ຖົ່ວ­ຂຽວ​ປະ­ມານ 5-7 ມື້ ຕໍ່ 1 ເທື່ອ ຫຼື ຂຶ້ນ​ກັບ​ສະ­ພາບດິນ​ທີ່​ປູກ ຖ້າ​ປູກ​ໃນ​ລະ­ດູ­ຝົນ​ບໍ່​ໃຫ້​ມີ​ນ້ຳ​ຂັງ ເພື່ອ​ບໍ່​ໃຫ້​ຕົ້ນ​ຖົ່ວ­ຂຽວ​ຕາຍ, ຖົ່ວ­ຂຽວ​ມັກ​ມີ​ແມງ­ໄມ້​ລົບ​ກວນ​ສ່ວນ​ໃຫຍ່​ແມ່ນ​ຈຳ­ພວກ​ເພຍ​ອ່ອນ ຊຶ່ງ​ມີ​ທັງ​ລັກ­ສະ­ນະ​ສີ­ຂາວ ແລະ ສີ­ດຳ ທັງ​ສອງ​ຊະ­ນິດ​ນີ້​ແມ່ນ​ມັກ​ເອົາພະ­ຍາດ​ມາ ດັ່ງ­ນັ້ນ​ ຄວນ​ສີດ​ຢາ​ຂ້າ​ແມງ­ໄມ້​ເຊັ່ນ: ຈຳ­ພວກ​ເຊ​ວິນ 85%, ມາ­ລາ​ຊົງ ຫຼື ໂຟ​ລິ​ດອນ ໃນ​ອັດ­ຕາ 1 ບ່ວງ​ແກງ​ຕໍ່​ນ້ຳ 1 ລິດ.