ຜັກຕຳນິນເປັນພືດພັນພື້ນບ້ານທີ່ຄົນທົ່ວໄປທີ່ຮູ້ຈັກກັນມາດົນນານ
ເປັນພືດຜັກທີ່ມີຄຸນຄ່າທາງໂພຊະນາການຫຼາຍສາມາດເອົາໄປປຸງແຕ່ງເປັນອາຫານໄດ້ຫຼາຍຊະນິດເຊັ່ນ:
ແກງຈືດ, ລວກກັບແຈ່ວ
ຫຼື ລວກກັບປົນປາກໍແຊບ ແລະ ສາມາດນຳໄປປຸງອາຫານຫຼາຍໆຢ່າງ
ໃນອະດີດພວກເຮົາບໍ່ຈຳເປັນຕ້ອງປູກຜັກຕຳນິນເອົາໄວ້ກິນເອງ
ເນື່ອງຈາກວ່າຕຳນິນມັກພົບເຫັນທົ່ວໄປຕາມປ່າ ຕາມຟຸ່ມໄມ້ເຕ້ຍ ຫຼື
ວ່າຟຸ່ມໄມ້ແຫ້ງຕາຍ ລວມທັງຂຶ້ນຕາມຮົ້ວ.
ໃນປະຈຸບັນເຮົາບໍ່ຄອຍເຫັນຜັກຕຳນິນຕາມຮົ້ວອີກແລ້ວ
ຈະເຫັນກໍສະເພາະໃນທີ່ຫົກເຮື່ອ, ດິນເປົ້າວ່າງ ຫຼື
ເຫັນຕາມສວນປູກຜັກຕຳນິນທີ່ໄວ້ເພື່ອຄ້າຂາຍເທົ່ານັ້ນ ສະນັ້ນ
ຖ້າຢາກມີຜັກຕຳນິນໄວ້ກິນເອງ ຫຼື
ຂາຍເປັນສິນຄ້າຈະຮຽນຮູ້ວິທີປູກໄວ້ກໍດີ.
ວິທີການປູກ ແລະ ບົວລະບັດຮັກສາ
ການປູກຕຳນິນນັ້ນມີສອງວິທີຄື
ວິທີປູກໂດຍການເພາະເມັດຕຳນິນນັ້ນເປັນວິທີງ່າຍໆ
ພຽງແຕ່ກຽມດິນຄືກັບປູກຜັກທົ່ວໄປກຽມຝຸ່ນຊີວະພາບ ຫຼື ວ່າຝຸ່ນກໍໄດ້
ຫຼັງຈາກນັ້ນກໍນຳເອົາໝາກຕຳນິນທີ່ແກ່ສີແດງແກະເອົາແຕ່ແກ່ນ (ເມັດຕຳນິນ)
ອອກມາຫວ່ານລົງດິນທີ່ກຽມໄວ້ແລ້ວເອົາດິນໂຮຍປົກໄວ້ ຫຼື
ໃຊ້ໃບໄມ້ແຫ້ງປົກໄວ້ບາງໆຫົດນ້ຳໃຫ້ມີຄວາມຊຸ່ມເຊົ້າແລ້ງ
ເພາະຕຳນິນເປັນພືດທີ່ມັກດິນທີ່ມີຄວາມຊຸ່ມ
ແຕ່ຢ່າໃຫ້ຫົດຫຼາຍເກີນເຫດເພາະຈະເຮັດໃຫ້ເມັດຕຳນິນເນົ່າ.
ເວລາຕົ້ນງອກຂຶ້ນມາປະມານ 5
ຊັງຕີແມັດ ຕຳນິນກໍເລີ່ມມີມືເກາະ
ສະນັ້ນໃຫ້ເຮັດຮາວໃຫ້ເພື່ອເປັນບ່ອນເກາະກາຍຂອງຕຳນິນ
ການທີ່ເຮັດຮາວໃຫ້ນັ້ນຕ້ອງມີຄວາມສູງລະດັບ 1 ຊັງຕີແມັດຂຶ້ນໄປ ແຕ່ບໍ່ຄວນສູງເກີນ 3 ແມັດ
ເພາະຈະບໍ່ສະດວກໃນການເກັບຍອດຕຳນິນ.
ຜັກຕຳນິນຕ້ອງໄດ້ຮັບແສງແດດຕະຫຼອດທັງວັນ
ໃຫ້ມີລົມພັດຜ່ານໄດ້
ເພາະຜັກຕຳນິນຈະສັງເຄາະແສງແດດຄາຍອາຍນ້ຳໄດ້ເຕັມທີ່
ຄວນປ່ອຍໃຫ້ມົດແດງຂຶ້ນ ເພາະຈະຊ່ວຍກິນເພ້ຍ ແລະ
ແມງໄມ້ທີ່ຈະກັດກິນຕຳນິນ.
ວິທີທີ
2
ຄື ປູກໂດຍນຳເອົາຕົ້ນທີ່ແກ່ພໍສົມຄວນມາຕັດໃຫ້ຍາວ 15-20
ຊັງຕີແມັດ ມາປັກລົງໃນດິນທີ່ກຽມໄວ້ແລ້ວ(ລັກສະນະຂັ້ນຕອນການປູກຄືກັນກັບການປູກທີ່ນຳເອົາແກ່ນມາປູກ)
ພໍຈະເລີນເຕີບໂຕເຕັມທີ່ປະມານ 1 ເດືອນ
ກໍສາມາດເກັບເອົາຍອດມາປຸງເປັນອາຫານໄດ້.
ຢ່າງໃດກໍຕາມ
ເພື່ອໃຫ້ຜັກຕຳນິນແຕກຍອດອອກໃບໄດ້ຕະຫຼອດປີ ເຮົາຕ້ອງໝັ່ນເກັບຍອດຢູ່ສະເໝີ
ໃນຂະນະດຽວກັນນັ້ນໃຫ້ໃສ່ຝຸ່ນເພື່ອຊ່ວຍເພີ່ມອາຫານໃນດິນປະມານເດືອນລະຄັ້ງ
ແລະ ຕ້ອງໝັ່ນຫົດນ້ຳສະໜ່ຳສະເໝີໃນໄລຍະໜ້າແລ້ງ, ໜ້າໜາວ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ