ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງານ ກະຊວງແຮງງານ ແລະ ສະຫວັດດີການ-ສັງຄົມ (ຮສສ) ພ້ອມດ້ວຍຕາງໜ້າສູນກາງສະຫະພັນກຳມະບານລາວ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ຖະແຫຼງກ່ຽວກັບການຈັດຕັ້ງປະຕິບັດ ຕາມແຈ້ງການແນະນຳຂອງກະຊວງ ຮສສ ກ່ຽວກັບການປັບປຸງຄ່າແຮງງານຂັ້ນຕ່ຳຢູ່ ສປປ ລາວ ສະບັບເລກທີ 808/ຮສສ ລົງວັນທີ 9 ກຸມພາ 2015 ຕໍ່ສື່ມວນຊົນ ໃນວັນທີ 18 ກຸມພາ 2015 ຢູ່ກະຊວງ ຮສສ ວ່າ: ໂດຍເຫັນໄດ້ຄວາມຈຳເປັນຂອງຄ່າຄອງຊີບ ຫຼື ລາຄາສິນຄ້າເພື່ອການອຸປະໂພກ ແລະ ບໍລິໂພກຕ່າງໆເພີ່ມຂຶ້ນ ເຊິ່ງໄດ້ສົ່ງຜົນກະທົບໂດຍກົງ ຕໍ່ການດຳລົງຊີວິດຂັ້ນພື້ນຖານຂອງຊາວຜູ້ອອກແຮງງານທີ່ມີລາຍໄດ້ຕ່ຳ ການເຮັດວຽກໃຫ້ຜູ້ອື່ນ ພ້ອມທັງເປັນການພັດທະນາ ແລະ ຍົກລະດັບທາງດ້ານປະສິດທິພາບຂອງແຮງງານໃຫ້ສູງຂຶ້ນ ແກ້ໄຂບັນຫາການຂາດແຄນແຮງງານໃນຂະແໜງການຜະລິດບາງຂະແໜງການ ແລະ ສ້າງແຮງຈູງໃຈໃຫ້ແກ່ແຮງງານລາວ ເຂົ້າສູ່ຕຳແໜ່ງງານທີ່ຕະຫຼາດແຮງງານຕ້ອງການ ແລະ ດຶງດູດເອົາແຮງງານລາວ ທີ່ໄປອອກແຮງງານຢູ່ຕ່າງປະເທດ ທີ່ບໍ່ຖືກຕ້ອງຕາມກົດໝາຍ ໃຫ້ກັບມາສູ່ຕະຫຼາດແຮງງານນັບມື້ນັບຫຼາຍຂຶ້ນ ສະນັ້ນ ອົງການທັງສາມຝ່າຍຄື: ກະຊວງ ຮສສ ສູນກາງສະຫະພັນກຳມະບານລາວ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ຈຶ່ງໄດ້ເຫັນດີເປັນເອກະພາບກັນ ດຳເນີນຄົ້ນຄວ້າກ່ຽວກັບຄ່າແຮງງານຢູ່ ສປປ ລາວ ເປັນຄັ້ງທີ 6 ເຊິ່ງປະກອບມີຫຼາຍຂັ້ນຕອນ ຈາກນັ້ນ ກະຊວງແຮງງານ ໃນນາມທີ່ເປັນຕາງໜ້າໃຫ້ອົງການສາມຝ່າຍ ຈຶ່ງນຳສະເໜີຜົນຂອງການພິຈາລະນາ ແລະ ເຫັນດີຮ່ວມກັນມານຳສະເໜີຕໍ່ລັດຖະບານ ຫຼັງຈາກນັ້ນ ລັດຖະບານລາວ ກໍ່ຮັບຮອງເອົາການປັບລະດັບຄ່າແຮງງານຂັ້ນຕ່ຳສຸດຢູ່ ສປປ ລາວ ຈາກ 626.000 ກີບຕໍ່ເດືອນ ມາເປັນ 900.000 ກີບຕໍ່ເດືອນ ເຊິ່ງມີຜົນບັງຄັບໃຊ້ແຕ່ວັນທີ 1 ເມສາ 2015 ເປັນຕົ້ນໄປ.
ການປັບປຸງຄ່າແຮງງານຄັ້ງນີ້ ກໍ່ເບິ່ງຫຼາຍປັດໄຈເທົ່າທີ່ຈະມີຂໍ້ມູນສະໜອງໃຫ້ ແຕ່ປັດໄຈຕົ້ນຕໍທີ່ໃຊ້ໃນການຕັດສິນລະດັບ 900.000 ກີບນີ້ ແມ່ນມາຈາກຄວາມຈຳເປັນທີ່ແທ້ຈິງ ໃນການດຳລົງຊິວິດຂອງຜູ້ອອກແຮງງານ ລະດັບຄ່າແຮງງານໂດຍສະເລ່ຍພາຍໃນປະເທດ ຄ່າຄອງຊີບລະດັບການປ່ຽນແປງດ້ານລາຄາ ເພື່ອເຮັດໃຫ້ການກຳນົດຄ່າແຮງງານຢູ່ປະເທດເຮົາມີຄວາມຖືກຕ້ອງ ສອດຄ່ອງ ແລະ ຍຸຕິທຳ.
ຄ່າແຮງງານຂັ້ນຕ່ຳສຸດ ມີເປົ້າໝາຍນຳໃຊ້ສຳລັບຜູ້ອອກແຮງງານ ທີ່ເຮັດວຽກໃນຫົວໜ່ວຍການຜະລິດ ທຸລະກິດ ຫຼື ບໍລິການຂອງທຸກພາກສ່ວນເສດຖະກິດ-ສັງຄົມ ຜູ້ເຮັດວຽກນອກລະບົບ ແລະ ໃນຄົວເຮືອນ ທີ່ຍັງບໍ່ມີສີມື ບໍ່ທັນມີຄວາມຊຳນານງານ ແລະ ບໍ່ມີວຸດທິທາງວິຊາຊີບໃດໆ ຍົກເວັ້ນຜູ້ອອກແຮງງານທີ່ເຮັດວຽກນຳອົງການຕ່າງປະເທດ ທີ່ມີລະບຽບການສະເພາະ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ