ສ່ວນວິທີເບິ່ງແຍງຮັກສາໝາກກະທັນຄວນຈະມີການຕັດແຕ່ງກິ່ງໃຫ້ເປັນພິເສດຖ້າປ່ອຍໃຫ້ມີກິ່ງກ້ານສາຂາຫຼາຍເກີນໄປຈະເຮັດໃຫ້ໝາກມີຂະໜາດນ້ອຍການຕັດກິ່ງກ້ານອາດໃຊ້ວິທີໄດ້ດັ່ງນີ້: ໝາກກະທັນທີ່ມີອາຍຸບໍ່ເກີນ 2 ປີທີ່ປູກໃໝ່ໄລຍະທຳອິດນັ້ນບາງຕົ້ນຈະມີລັກສະນະເປັນກ້ານດຽວ ຫຼື ສອງກ້ານທີ່ຍາວ ແລະ ກົ່ງລົງດິນຄືຕົ້ນໄມ້ທີ່ເປັນເຄືອໃຫ້ຕັດຍອດປະມານ 30-50 ຊັງຕີແມັດ ເພື່ອໃຫ້ແຕກກິ່ງກ້ານໃໝ່ທີ່ຕັ້ງຊື່ ແລະ ເປັນຟຸ່ມຕ້ອງຕັດແຕ່ງກິ່ງກ້ານຢູ່ໃນກ້ອງຟຸ່ມຂອງຕົ້ນ ສຳລັບກ້ານກິ່ງທີ່ແຕກຈາກກ້ານໃຫຍ່ນັ້ນ ເປັນກ້ານທີ່ຕິດດອກອອກໝາກແຕ່ຈະໃຫ້ໝາກຫຼາຍພຽງແຕ່ໜຶ່ງຄັ້ງໃນຮຸ່ນທຳອິດ ດັ່ງນັ້ນເມື່ອເກັບໝາກແລ້ວຄວນຕັດຖິ້ມເລີຍໂດຍຕັດໃຫ້ກ້ານຕິດກັບກ້ານໃຫຍ່ເພື່ອໃຫ້ເກີດກ້ານຂຶ້ນມາແທນກ້ານເກົ່າ ແລະ ຄວນເຮັດແບບນີ້ຈັກ 3-4 ເທື່ອຕໍ່ປີ.
ສຳລັບໝາກກະທັນມີອາຍຸເກີນ 3 ປີຂຶ້ນໄປຈະຕັດກ້ານອີກແບບໜຶ່ງໂດຍຕັດຈົນໝົດຕົ້ນເຫຼືອແຕ່ຕໍສູງປະມານ 1 ແມັດຈາກລະດັບພື້ນດິນຫຼື ເຫຼືອພຽງກົກໃຫຍ່ໆແລ້ວແຕ່ລັກສະນະຕົ້ນເພື່ອໃຫ້ຕົ້ນໄດ້ແຕກຕາໃໝ່ຂຶ້ນມາ ແລະ ຄວນເຮັດປີລະຄັ້ງໃນລະດູແລ້ງເພາະເປັນໄລຍະໝາກກະທັນບໍ່ເປັນໝາກ ຈາກນັ້ນຈິ່ງບຳລຸງຕົ້ນໃຫ້ດີເມື່ອຕັດແຕ່ງແລ້ວໝາກກະທັນຈະແຕກຕາໃໝ່ ແລະ ອອກຍອດຢ່າງຫຼວງຫຼາຍບໍ່ເປັນລະບຽບໃຫ້ລໍຖ້າແຕ່ລະຕາແຕກຍອດຍາວຈັກ 5 ນິ້ວແລ້ວພິຈາລະນາເບິ່ງວ່າກ້ານໃດສົມບູນ ແລະ ເບີ່ງທິດທາງຂອງແໜງທີ່ຈະເປັນຟຸ່ມ ຈາກນັ້ນຕັດແໜງອອກໃຫ້ເຫຼືອພຽງແຕ່ກ້ານລະ 1-2 ແໜງ ເພື່ອໃຫ້ແໜງເຫຼົ່ານີ້ແຕກອອກ ແລະ ຕິດໝາກ ເຮັດແບບນີ້ໄປຈົນຄົບປີຈິ່ງຕັດໝົດຕົ້ນອີກຄັ້ງ,ສ່ວນວ່າໝາກກະທັນພັນດີຈະໃຫ້ໝາກຜົນພາຍໃນ 1 ປີ ແຕ່ເນື່ອງຈາກໝາກກະທັນເປັນໝາກທີ່ຊ້ຳໄວຈິ່ງຄວນເກັບຢ່າງລະມັດລະວັງ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ