ຖົ່ວແປບ
ເປັນພືດຜັກຊະນິດໜຶ່ງທີ່ປະຊາຊົນລາວເຮົານິຍົມບໍລິໂພກ
ແຕ່ຈະບໍ່ແພ່ຫຼາຍປານໃດ ແລະ ບໍ່ມັກມີຈຳໜ່າຍຕາມທ້ອງຕະຫຼາດ
ຊຶ່ງອາດເປັນເພາະວ່າ ຖົ່ວແປບເປັນພືດທີ່ປູກຂ້ອນຂ້າງຍາກ ແລະ ຕ້ອງການເບິ່ງແຍງຮັກສາ
ແລະ ເອົາໃຈໃສ່ຫຼາຍ.
ເນື່ອງຈາກວ່າ
ຖົ່ວແປບ ເປັນພືດຕະກູນຖົ່ວທີ່ມີທາດໂປຣຕີນຈາກທຳມະຊາດຫຼາຍກວ່າ, ນອກຈາກໂປຣຕີນແລ້ວ
ຍັງມີໃຍອາຫານ, ວິຕາມິນຊີ, ແຄວຊ່ຽມ
ແລະ ຟົດສຟໍຣັສໃນປະລິມານສູງ, ແຕ່ວ່າວິຕາມິນຊີ
ມັກຈະຫາຍຕົວໄປເມື່ອຖືກຄວາມຮ້ອນ, ດັ່ງນັ້ນ ຈິ່ງຄວນຂົ້ວພໍສຸກກໍ່ຮັບປະທານໄດ້ແລ້ວ
ກາກໃຍອາຫານໃນຖົ່ວແປບຊ່ວຍໃນລະບົບຍ່ອຍອາຫານເປັນໄປຕາມປົກກະຕິ
ລວມໄປເຖິງການຂັບຖ່າຍທີ່ສະດວກສະບາຍ ແລະ ເປັນເວລາ.
ຖົ່ວແປບຈັດເປັນພືດປະເພດປີດຽວ, ລຳຕົ້ນຈະເລື້ອພັນຄ້າງຂຶ້ນໄປ
ໂດຍໃຊ້ມືຈັບ, ເປັນພືດຜັກທີ່ມັກອາກາດເຢັນ
ຈິ່ງປູກໄດ້ດີໃນຊ່ວງລະດູໜາວ ແຕ່ຢ່າງໃດກໍຕາມ ຖົ່ວແປບກໍສາມາດຂຶ້ນໄດ້ໃນດິນເກືອບທຸກຊະນິດ
ໂດຍສະເພາະດິນໜຽວ ແລະ ຄວນເປັນດິນທີ່ມີຄວາມເປັນກົດເລັກນ້ອຍ.
ຖົ່ວແປບ
ຊື່ວິທະຍາສາດ Pisum sativum ຈັດຢູ່ໃນຕະກູນຖົ່ວ
ມີຖິ່ນກຳເນີດແຖບປະເທດ ເອທີໂອເປຍ ຕໍ່ມາແພ່ກະຈາຍປູກໃນແຖບເມດິເຕີເລເນຍ, ອາຊີ
ແລະ ເຂດອົບອຸ່ນຕ່າງໆຂອງໂລກ ຖົ່ວແປບເປັນພືດລະດູດຽວ, ມີໃບແບສະລັບ, ປາຍໃບຄົມເປັນມືເກາະ, ການຈະເລີນເຕີບໂຕແບບພຸ່ມ
ຫຼື ຂຶ້ນຄ້າງ ລຳຕົ້ນນ້ອຍເປັນຫຼ່ຽມ, ຮາກເປັນລະບົບຮາກແກ້ວ, ດອກເປັນແບບດອກສົມບູນເພດ
ປະສົມພັນກັນເອງ, ສາມາດແບ່ງປະເພດຂອງຖົ່ວແປບເປັນ 2
ປະເພດເຊັ່ນ: ປະເພດຝັກໜຽວ ແລະ ແຂງ, ແກ່ນໃຫຍ່ ນິຍົມປູກເພື່ອຮັບປະທານແກ່ນ, ສ່ວນອີກຊະນິດໜຶ່ງປູກເພື່ອຮັບປະທານຝັກສົດ
ໂດຍຝັກຈະມີຂະ ໜາດໃຫຍ່ມີປີກ.
ສຳລັບການປູກຖົ່ວແປບ
ດິນຄວນມີລັກສະນະດິນລ້ວນ, ລະບາຍນ້ຳໄດ້ດີ, ມີຄວາມອຸດົມສົມບູນສູງ, ໜ້າດິນເລິກ
ແລະ ຄວນມີ pH ຢູ່ລະຫວ່າງ 5,5-6,5, ອຸນຫະພູມທີ່ເໝາະສົມໃນການຈະເລີນເຕີບໂຕຢູ່ລະຫວ່າງ
13-18 ອົງສາເຊ ຫາກອຸນຫະພູມຕ່ຳກວ່າ 4
ອົງສາເຊ ຫຼື ສູງກວ່າ 29 ອົງສາ ຈະເຮັດໃຫ້ການຈະເລີນເຕີບໂຕຊະງັກ
ແລະ ໃນກໍລະນີທີ່ອຸນຫະພູມສູງກວ່າ 30 ອົງສາເຊ ດອກ, ຝັກຈະຫຼົ່ນ
ແລະ ບໍ່ຄວນປູກໃນສະພາບອາກາດເຢັນ, ມີນ້ຳຄ້າງແຂງ ໂດຍສະເພາະໃນໄລຍະທີ່ດອກບານ
ແລະ ເລີ່ມຕິດຝັກ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ