ນິເວດວິທະຍາພື້ນຖານ Fundamentals of Ecology

ນິເວດວິທະຍາພື້ນຖານ Fundamentals of Ecology

ສປປ ລາວ ເວົ້າລວມແລ້ວ ເປັນປະເທດທີ່ມີຊັບພະຍາກອນທໍາມະຊາດອຸດົມສົມບູນແລະ ຄຸນນະພາສິ່ງແວດລ້ອມຍັງດີຢູ່ ທຽບໃສ່ປະເທດອ້ອມຂ້າງ ຊຶ່ງເປັນທ່າແຮງອັນສໍາຄັນໃນການພັດທະນາເສດຖະກິດ-ສັງຄົມຂອງປະເທດ. ດັ່ງນັ້ນ ພວກເຮົາທັງໝົດ ຕ້ອງໄດ້ຊ່ວຍກັນປົກປັກຮັກສາເພື່ອໄວ້ເປັນມໍລະດົກແກ່ຄົນລຸ້ນຫຼັງ.

•  ການກ້າວເຂົ້າສູ່ສະຫະສະວັດໃໝ່, ຄວາມຮັບຮູ້ທາງດ້ານວິທະຍາສາດ ແລະ ເຕັກໂນໂລຊີ ໄດ້ຮັບການພັດທະນານັບມື້ນັບວ່ອງໄວ ແລະ ຕໍ່ເນື່ອງ ແລະ ໄດ້ຊຸກຍູ້ໃຫ້ການພັດທະນາເສດຖະກິດ-ສັງຄົມມີການຂະຫຍາຍຕົວຢ່າງວ່ອງໄວເຊັ່ນດຽວກັນ. ແຕ່ວ່າຜົນສະທ້ອນຂອງການເຄື່ອນໄຫວຂອງມະນຸດ ເຮັດໃຫ້ສິ່ງແວດລ້ອມ ແລະ ຊັບພະຍາກອນທໍາມະຊາດເຊື່ອມໂຊມລົງ ເປັນຕົ້ນ ການສູນເສຍຊີວະນານາພັນ, ປ່າໄມ້ຖືກທໍາລາຍ,ແຫຼ່ງນໍ້າຖືກບົກແຫ້ງ, ການເຊື່ອມໂຊມຂອງດິນ, ການເພີ່ມຂຶ້ນຂອງສິ່ງເສດເຫຼືອ, ການເພີ່ມຂຶ້ນຂອງສານເຄມີທີ່ເປັນພິດ, ການເຈືອປົນມົນລະພິດໃນອາກາດ, ນໍ້າ ແລະ ດິນ,ການປ່ຽນແປງດິນຟ້າອາກາດ ແລະ ອື່ນໆ ຊຶ່ງສ້າງຜົນສະທ້ອນຕໍ່ການດໍາລົງຊີວິດ ແລະຊັບສິນຂອງມະນຸດ.
• ປຶ້ມນິເວດວິທະຍາພື້ນຖານຫົວນີ້ ເກີດມາຈາກແຮງບັນດານໃຈ ທີ່ຜູ້ຂຽນເຫັນວ່າເອກະສານໃນສາຂາວິຊານີ້ ທີ່ຂຽນເປັນພາສາລາວແມ່ນມີໜ້ອຍ ແລະ ສ່ວນຫຼາຍທີ່ມີແມ່ນເປັນພາສາຕ່າງປະເທດ ຊຶ່ງສ້າງຄວາມລໍາບາກຕໍ່ຜູ້ທີ່ເລີ່ມສຶກສາຄົ້ນຄວ້າໃນທາງດ້ານນີ້ ດັ່ງນັ້ນ ຈິ່ງເກີດມີແນວຄວາມຄິດຢາກຂຽນປຶ້ມໃນສາຂາວິຊານິເວດວິທະ ຍານີ້ ຂຶ້ນມາ ເພື່ອໃຫ້ນັກນິເວດວິທະຍາທັງຫຼາຍທີ່ກໍາລັງສຶກສາຢູ່ ຫຼື ຜູ້ອື່ນໆ ທີ່ມີຄວາມສົນໃຈທາງດ້ານນິເວດວິທະຍາໄດ້ນໍາໄປໃຊ້ປະໂຫຍດເຊັ່ນ: ເປັນເອກະສານປະກອບການຮຽນ-ການສອນ ແລະ ສາມາດນໍາໃຊ້ເຂົ້າໃນຂົງເຂດວຽກງານດ້ານການອະນຸລັກຊັບພະຍາກອນທໍາມະຊາດໄດ້.
• ໂດຍເນື້ອຫາໃນປຶ້ມຫົວນີ້ປະກອບດ້ວຍສາມສ່ວນ ຄື: ສ່ວນທີໜຶ່ງ ລະບົບນິເວດ(Ecosystem), ວົງຈອນຂອງແຮ່ທາດໃນລະບົບນິເວດ, ຊີວະນານາພັນ ແລະ ຄວາມສໍາຄັນຂອງປ່າຝົນເຂດຮ້ອນ (ປ່າດົງດິບ), ສ່ວນທີສອງ ບັນຫາໄພຂົ່ມຂູ່ຕໍ່ຊີວະນານາພັນແລະ ບັນຫາມົນລະພິດສິ່ງແວດລ້ອມ ແລະ ສ່ວນທີສາມ ບັນຫາໄພຂົ່ມຂູ່ຕໍ່ຊີວະນານາພັນ ແລະ ບັນຫາມົນລະພິດສິ່ງແວດລ້ອມ.
• ເມື່ອຜູ້ອ່ານໄດ້ອ່ານປຶ້ມຫົວນີ້ແລ້ວ ຈະຮັບຮູ້ເຖິງຄວາມສໍາຄັນຂອງລະບົບນິເວດແລະ ບັນຫາສິ່ງແວດລ້ອມ ເຮັດໃຫ້ເກີດຄວາມຫວງແຫນຊັບພະຍາກອນທໍາມະຊາດຫຼາຍຂຶ້ນ ແລະ ອີກດ້ານໜຶ່ງ ເພື່ອເປັນຊ່ອງທາງຊຸກຍູ້ດ້ານການອະນຸລັກ ຊັບພະຍາກອນທໍາມະຊາດ ທີ່ເປັນຊັບສົມບັດອັນລໍ້າຄ່າຂອງຊາດ ກໍ່ຄືຂອງປະຊາຊົນລາວທັງປະເທດໃຫ້ມີຄວາມຢັ້ງຢືນຕະຫຼອດໄປ.