ແມງໄມ້ທີ່ມີປະໂຫຍດ

ແມງເຕົ່າທອງ 

ແມງເຕົ່າທອງມີຄວາມຍາວ ປະມານ 5 ມີລີແມັດ. ເປັນແມງໄມ້ນ້ອຍທີ່ງາມ. ແມງເຕົ່າທອງມີຫຼາຍຊະນິດ. ມີສີສັນທີ່ຫຼາກຫຼາຍນັບແຕ່ສີເຫຼືອງ, ສົ້ມ, ແດງ ແລະ ດໍາ.ພວກມັນກິນເພ້ຍ ແລະ ເພ້ຍຫອຍໂດຍສະເພາະແມ່ນຕົວອ່ອນຂອງແມງເຕົ່າທອງໄດ້ຜົນດີຫຼາຍໃນການກໍາຈັດສັດຕູພືດເຫຼົ່ານີ້. ເມື່ອທ່ານພົບເຫັນຕົວອ່ອນຕາມພືດຂອງທ່ານຢ່າໃຊ້ຢາປາບສັດຕູພືດໃດໆເພາະພວກມັນຈະເຮັດໜ້າທີ່ຂອງພວກມັນເພື່ອທ່ານ.

ແມງເຕົ່າທອງ

ແມງຊ້າງປີກໃສ

ແມງຊ້າງປີກໃສທີ່ແກ່ເຕັມທີ່ຈະຍາວປະມານ1.5 ຊັງຕີແມັດ, ສີຂຽວ ແລະ ປີກໃສ. ໂຕອ່ອນຂອງມັນຄ້າຍຄືສັດປະ ຫຼາດຂະໜາດນ້ອຍທັງໂຕແກ່ ແລະ ໂຕອ່ອນ ຈະລ່າຫາເພ້ຍຫອຍ, ເພ້ຍ, ໄຮ, ເພ້ຍແປ້ງ, ເພ້ຍໄຟ ແລະ ແມງມີ່ຂາວ. ໂຕອ່ອນຈະຫິວຕະຫຼອດ ແລະ ສາມາດກິນສັດຕູພືດໄດ້ເຖິງ 60 ໂຕໃນໜຶ່ງຊົ່ວໂມງ

ແມງຊ້າງປີກໃສ

ແມງວັນລາຍ

ແມງວັນລາຍເປັນແມງໄມ້ທີ່ມີປະໂຫຍດຫຼາຍທີ່ສຸດໃນວົງຕະກຸນໃຫຍ່ບາງສາຍພັນຈະໂຕໃຫຍ່ ແລະ ຄ້າຍຄືເຜິ້ງ. ບາງສາຍພັນມີແອວກິ່ວ ແລະ ຄ້າຍຄືຕໍ່ໂຕແກ່ຈະບິນເວີ່ນເທິງອາກາດ ແລະ ກິນເກສອນ ແລະ ນໍ້າຫວານຈາກດອກໄມ້. ໂຕອ່ອນຈະມີປະສິດທິພາບຫຼາຍໃນການກິນເພ້ຍເປັນອາຫານ. ໂຕອ່ອນຂອງແມງວັນລາຍໜຶ່ງໂຕຈະກິນເພ້ຍໄດ້ປະມານ 900 ໂຕ ກ່ອນທີ່ມັນຈະແກ່ໂຕເຕັມທີ່.

ແມງວັນລາຍ

ແຕນບຽນ (ຕໍ່ນ້ອຍ) 

ແຕນຊະນິດນີ້ມີຫຼາຍສາຍພັນ. ພວກມັນຈະມີຂະໜາດຍາວຕັ້ງແຕ່ 1.5 ມີລີແມັດເຖິງ 50 ມີລີແມັດ, ແຕ່ສ່ວນໃຫຍ່ຈະມີລໍາຕົວຈ່ອຍບາງ. ຕາມປົກກະຕິສີຂອງພວກມັນຈະແມ່ນສີດໍາຫາສີນໍ້າຕານ. ບາງຊະນິດທີ່ຄ້າຍຄືຕໍ່ຈະມີລໍາຕົວຈ່ອຍ,ແອວກິ່ວ ແລະ ປີກໃສພວກມັນສາມາດເປັນແມ່ກາຝາກຂອງເພ້ຍ ແລະ ບົ້ງໂດຍພວກມັນຈະວາງໄຂ່ໃສ່ຕາມລໍາຕົວຂອງສັດຕູພືດເຫຼົ່ານັ້ນ. ເວລາທີ່ມັນຝັກໄຂ່ໂຕອ່ອນຂອງມັນກໍ່ຈະກິນສັດຕູພືດເປັນອາຫານ

ແມງຢ້າງຊີ້ນ (ແມງເພັດສະຄາດ)

ໂຕແກ່ແມງຢ້າງຊີ້ນເຕີບໂຕເຕັມທີ່ຈະມີຂະໜາດຍາວເຖິງ 12 ມີລີແມັດ. ມີສີດໍາ, ນໍ້າຕານ ຫຼື ຂຽວ. ມີຕາໃຫຍ່ຢູ່ເທິງຫົວທີ່ລີບນ້ອຍ ແລະ ມີຂາໜ້າທີ່ໃຫຍ່ມີຂົນ ເປັນໜາມເພື່ອຈັບເຫຍື່ອ. ພວກມັນຈະຈັບເພ້ຍ, ບົ້ງ, ແມງໄມ້ປີກແຂງ, ຈັກຈັ່ນ ແລະ ແມງອື່ນໆເປັນອາຫານ.

ແມງຢ້າງຊີ້ນ

ແມງກິນເພ້ຍ (ແມງດອກໄມ້ ຫຼື ແມງໂຈນສະຫຼັດ)

ແມງກິນເພ້ຍ ເປັນແມງໄມ້ທີ່ມີຂະໜາດນ້ອຍຫຼາຍ, ຍາວປະມານ 3 ມີລີແມັດ. ທັງໂຕແກ່ ແລະ ໂຕອ່ອນ ກິນເພ້ຍໄຟ, ເພ້ຍ, ໄຮ ແລະ ບົ້ງເປັນອາຫານ. ສ່ວນໃຫຍ່ພວກມັນຈະມັກກິນເພ້ຍໄຟ, ໂຕໃຫຍ່ໜຶ່ງໂຕສາມາດກິນເພ້ຍໄຟ
ໂຕອ່ອນໄດ້ເຖິງ 5-20 ໂຕຕໍ່ວັນ.

ແມງກິນເພ້ຍ

ດ້ວງດິນ (ແມງດິນ)

ດ້ວງດິນມີຫຼາຍຊະນິດ. ໂຕແກ່ມີຄວາມຍາວເຖິງ 2.5 ຊັງຕີແມັດ. ເຄື່ອນທີ່ໄວ ແລະ ມີສີດໍາແກມຟ້າອ່ອນ. ຕອນກາງເວັນພວກມັນຈະລີ້ຢູ່ຕາມກ້ອນຫີນ ແລະ ວັດຖຸອື່ນໆ. ສ່ວນໃຫຍ່ຂອງພວກມັນເປັນສັດທີ່ກິນຊີ້ນ ໂດຍສະເພາະແມ່ນມັກກິນບົ້ງ ແລະ ຫອຍທາກ, ນອກນັ້ນພວກມັນຍັງກິນເພ້ຍ, ແມງຫາງດີດ ແລະ ໄຮເປັນອາຫານ.

ດ້ວງດິນ