ວິທີການສ້າງສວນກ້າເບ້ຍໄມ

ນິຍາມສວນກ້າເບ້ຍໄມ້

ສວນກ້າແມ່ນຫຍັງ?

ສວນກ້າແມ່ນບ່ອນອະນຸບານ, ຂະຫຍາຍພັນ ແລະ ບ່ອນເກັບລວບລວມພັນໄມ້ຫຼາກຫຼາຍຊະນິດມາເກັບໄວ້ບ່ອນ
ດຽວກັນ. ໂດຍມີການບົວລະບັດຮັກສາເປັນຢ່າງດີ ເພື່ອໃຫ້ຕົ້ນໄມ້ມີຄວາມແຂງແຮງ ແລະ ສວຍງາມເພື່ອໄວ້ສຶກສາຄົ້ນຄວ້າ, ໄວ້ປູກປະດັບຕາມອາຄານ ຫຼື ຈັດຈຳໜ່າຍຕາມທ້ອງຕະຫຼາດ ແລະ ອື່ນໆເປັນຕົ້ນ.

ສວນກ້າ

ການຄັດເລືອກສະຖານທີ່ສ້າງສວນກ້າເບ້ຍໄມ້

ສະຖານທີ່ຈະສ້າງສວນກ້າເບ້ຍໄມ້ໃຫ້ເໝາະສົມນັ້ນ ຄວນເປັນພື້ນທີ່ຮາບພຽງດີບໍ່ລຸບ ຫຼື ໂນນຈົນເກີນໄປ, ເປັນພື້ນທີ່ທີ່ຢູ່ໃກ້ກັບແຫຼ່ງນໍ້າ ຫຼື ມີລະບົບຊົນລະປະທານ, ບໍ່ມີນໍ້າຖ້ວມຂັງ, ມີເສັ້ນທາງ ເຂົ້າ-ອອກ ສະດວກສະບາຍໃນການປະຕິບັດໜ້າທີ່ວຽກງານຕ່າງໆ, ເປັນບ່ອນທີ່ໄດ້ຮັບແສງແດດພຽງພໍ ແລະ ສາມາດຖ່າຍເທອາກາດໄດ້ດີ ເພື່ອໃຫ້ເບ້ຍໄມ້ມີຄວາມແຂງແຮງ, ສາມາດຈະເລີນເຕີບໄດ້ດີ, ປາສະຈາກເຊື້ອພະຍາດ ແລະ ສັດຕູພືດຕ່າງໆອີກດ້ວຍ.

ວິທີການສ້າງຕັ້ງສວນກ້າ

ກ. ການກະກຽມພື້ນທີ່ສໍາລັບການສ້າງສວນກ້າ:
ສະພາບພື້້ນທີ່ເໝາະສົມໃນການສ້າງເປັນສວນກ້າເບ້ຍໄມ້ນັ້ນຕ້ອງຮາບພຽງ ແລະ ສະໝໍ່າສະເໝີກັນ, ຖ້າພື້ນທີ່ມີ
ຄວາມຄ້ອຍຊັນ ແມ່ນແນະນໍາໃຫ້ໃຊ້ຫີນ ຫຼື ໄມ້ ເພື່ອສ້າງເປັນກໍາແພງຕ້ານການເຊາະເຈື່ອນຂອງດິນ. ພື້ນທີ່ທີ່ຈະ
ເຮັດສວນກ້າ ນັ້ນຄວນມີການຍົກລະດັບໜ້າດິນຂຶ້ນສູງປະມານ 20-30 ຊັງຕີແມັດເພື່ອໃຫ້ພື້ນທີ່ດັ່ງກ່າວສາມາດລະບາຍນໍ້າໄດ້ດີ, ເພື່ອຫຼີກລ້ຽງບັນຫານໍ້າຖ້ວມຂັງ, ການຕິດເຊື້ອພະຍາດໄດ້ງ່າຍ ແລະ ບັນຫາອື່ນໆທີ່ຕາມມາອີກດ້ວຍ.
ຂ. ການກະກຽມອຸປະກອນໃນການສ້າງສວນກ້າ
ວັດສະດຸໃນການສ້າງສວນກ້າປະກອບມີ:

• ໄມ້ເສົາ: ສາມາດເຮັດດ້ວຍເຫຼັກ, ໄມ້ແກນຫຼ້ອນ, ໄມ້ປ່ອງ ແລະ ອື່ນໆ
• ໂຄງຫຼັງຄາ: ສາມາດເຮັດດ້ວຍເຫຼັກ, ໄມ້ປ່ອງ ແລະ ອື່ນໆ
• ຫຼັງຄາ: ສາມາດມຸງດ້ວຍແສດຳ (50%-70%), ກະແຕະໄມ້ປ່ອງ, ໃບໄມ້ (ໃບພ້າວ, ໃບຕາວ ແລະ ອື່ນໆ)
• ໂຕະລຽນເບ້ຍໄມ້: ສາມາດເຮັດດ້ວຍເຫຼັກ, ໄມ້ແກນຫຼ້ອນ, ໄມ້ປ່ອງ ແລະ ອື່ນໆໃນກໍລະນີທີ່ຈະສ້າງເປັນສວນກ້າຊົ່ວຄາວບໍ່ຈຳເປັນມີໂຕະກໍ່ໄດ້

ເຄື່ອງມືໃນການສ້າງສວນກ້າປະກອບມີ:

• ພ້າ
• ຈົກ
• ຊວ້ານ
• ສຽມ
• ເຫຼັກລວດ ຫຼື ໄມ້ຕອກ, ເຫຼັກຕະປູ ແລະ ອື່ນໆ

ຄ. ການສ້າງໂຄງເຮືອນສວນກ້າ

ການສ້າງໂຄງເຮືອນສວນກ້າປະກອບມີຫຼາຍແບບ ແລະ ຫຼາຍວິທີຂຶ້ນກັບຈຸດປະສົງໃນການສ້າງ, ຂຶ້ນກັບງົບປະມານ ແລະ ອື່ນໆ ສ່ວນໃຫຍ່ແລ້ວຈະປະກອບມີ 3 ຮູບແບບຄື: ສວນກ້າແບບຖາວອນ, ສວນກ້າແບບເຄິ່ງຖາວອນ ແລະ ສວນກ້າແບບຊົ່ວຄາວ.

ສວນກ້າແບບຖາວອນ

ສວນກ້າຖາວອນ ແມ່ນສວນກ້າທີ່ສ້າງຂຶ້ນໂດຍມີຈຸດປະສົງເພື່ອເປັນບ່ອນຜະລິດ ແລະ ດູແລຮັກສາເບ້ຍໄມ້ທີ່ແນ່

ນອນ ແລະ ມີອາຍຸການໃຊ້ງານຫຼາຍກວ່າ 6 ປີຂຶ້ນໄປ. ປົກກະຕິຈະມີຂະໜາດປານກາງປະມານ 10x20 ແມັດ 

(ຂຶ້ນກັບຫງົບປະມານ ແລະ ຈໍານວນເບ້ຍໄມ້), ມີຮູບແບບການສ້າງທີ່ໝັ້ນຄົງ, ເຊິ່ງໂຄງສ້າງທັງໝົດບໍ່ວ່າຈະເປັນເສົາ ຫຼື ໂຄງຫຼັງຄາຈະເຮັດດ້ວຍເຫຼັກ ຫຼື ໄມ້ແປຮູບກໍ່ໄດ້. ສ່ວນຝາອ້ອມສວນກ້າຈະໃຊ້ໄມ້ດິ້ວຕີອ້ອມແບບດິ້ວເວັ້ນດິ້ວເພື່ອປ້ອງກັນສັດລ້ຽງເຂົ້າມາທຳລາຍເບ້ຍໄມ້, ມີການສ້າງປະຕູທາງເຂົ້າ 3 ດ້ານຄື: ທາງໜ້າ, ທາງຂ້າງ ແລະ ທາງຫຼັງ,ຫຼັງຄາມຸງດ້ວຍແສດຳ (50% ຫຼື 70%), ພາຍໃນສວນກ້າຈະສ້າງໂຕະທີ່ເຮັດດ້ວຍເຫຼັກ ຫຼື ໄມ້ແປຮູບເພື່ອລຽນເບ້ຍໄມ້ທີ່ຕ້ອງການດູແລຮັກສາເປັນພິເສດ, ພື້ນສວນກ້າປູດ້ວຍຫີນ, ດິນຈີ່ ຫຼື ຊີມັງ ແລະ ມີການເຮັດຮ່ອງລະບາຍນໍ້າເພື່ອຮັກສາຄວາມຊຸ່ມຊື່ນ ແລະ ລະບາຍນໍ້າໄດ້ດີຂຶ້ນ. ສວນກ້າແບບຖາວອນແບບນີ້ສ່ວນໃຫຍ່ແມ່ນສ້າງຂຶ້ນເພື່ອຜະລິດ, ດູແລຮັກສາພືດທີ່ຫາຍາກ ແລະ ມີຄຸນຄ່າທາງເສດຖະກິດ

ສວນກ້າຖາວອນ

ສວນກ້າແບບເຄິ່ງຖາວອນ

ສວນກ້າເຄິ່ງຖາວອນ ແມ່ນສ້າງຂຶ້ນເພື່ອເປັນບ່ອນຜະລິດ ແລະ ດູແລຮັກສາເບ້ຍໄມ້ໃນປະລິມານຫຼາຍເປັນແສນໆເບົ້າເພື່ອໃຊ້ໃນການປູກປ່າ ຫຼື ຈຳໜ່າຍຕາມຄວາມຕ້ອງການຂອງຕະຫຼາດ. ດັ່ງນັ້ນສວນກ້າຈະມີຂະໜາດໃຫຍ່ຂຶ້ນ ກັບຈຳນວນຂອງເບ້ຍໄມ້ທີ່ຕ້ອງການໃນແຕ່ລະປີ. ປົກກະຕິຈະມີອາຍຸປະມານ 3-5 ປີ, ມີຂະໜາດ 20x40 ຂຶ້ນໄປຮູບຮ່າງຂອງສວນກ້າເປັນແບບງ່າຍໆ. ມີໂຄງສ້າງເປັນໄມ້ເນື້ອແຂງ ແລະ ໄມ້ປ່ອງ, ເຊິ່ງເສົາເຮັດດ້ວຍໄມ້ແກນຫຼ້ອນ ແລະ ໂຄງຫຼັງຄາເຮັດດ້ວຍໄມ້ປ່ອງ (ຕ້ອງປ່ຽນໄມ້ທຸກໆ 3-5 ປີ), ຫຼັງຄາສາມາດມຸງດ້ວຍແສດຳ (50%, 70%) ໂຕະເຮັດດ້ວຍໄມ້ປ່ອງທັ້ງໝົດ ແລະ ອາດຈະເຮັດຝາອ້ອມສວນກ້າ ຫຼື ບໍ່ເຮັດກໍ່ໄດ້, ສ່ວນພື້ນສວນກ້າຄວນປັບໃຫ້ພຽງມີການເຮັດຮ່ອງລະບາຍນໍ້າເພື່ອໃຫ້ລະບາຍນໍ້າໄດ້ດີຂຶ້ນ.

ສວນກ້າເຄິ່ງຖາວອນ

ສວນກ້າແບບຊົ່ວຄາວ

ສວນກ້າແບບຊົ່ວຄາວເປັນສວນກ້າທີ່ສ້າງຂຶ້ນເພື່ອເກັບຮັກສາເບ້ຍໄມ້ຊົ່ວຄາວ ຫຼື ອາດໃຊ້ເປັນບ່ອນຜະລິດເບ້ຍໄມ້ໄດ້ ແຕ່ຕ້ອງໄດ້ມີການປັບປຸງທຸກປີ. ເຊິ່ງຈະມີອາຍຸການໃຊ້ງານ 1-2 ປີເທົ່ານັ້ນ. ວັດສະດຸທີ່ຈະນໍາມາສ້າງບໍ່ຈຳເປັນຕ້ອງມີຄວາມທົນທານສູງ ເຊິ່ງເຮົາສາມາດຫາໄດ້ເອງເຊັ່ນ: ເສົາເຮັດດ້ວຍໄມ້ຈິງ ຫຼື ໄມ້ປ່ອງ, ໂຄງຫຼັງຄາເຮັດດ້ວຍໄມ້ປ່ອງແລະ ຫຼັງຄາສາມາດມຸງດ້ວຍໄມ້ປ່ອງຜ່າເປັນດິ້ວ ສານລຽນສະຫຼັບດິ້ວເວັ້ນດິ້ວ ຫຼື ນຳໃຊ້ໃບໄມ້ຕ່າງໆມາມຸງເຊັ່ນ: ໃບພ້າວ, ໃບຕາວ ແລະ ອື່ນໆ ເຊິ່ງເຮົາຈະໃຫ້ແສງຜ່ານໄດ້ປະມານ 50% ເທົ່ານັ້ນ.

ສວນກ້າແບບຊົ່ວຄາວ

ການຈັດລຽນຕຳແໜ່ງເບ້ຍໄມ້ພາຍໃນສວນກ້າ

ການຈັດລຽນຕົ້ນໄມ້ຢູ່ພາຍໃນສວນກ້າແມ່ນມີ 3 ແບບດ້ວຍກັນເຊັ່ນວ່າ: ການຈັດລຽນຢູ່ພື້ນດິນ, ການຈັດລຽນຢູ່ເທິງໂຕະ ແລະ ການຈັດລຽນແບບເກາະຫ້ອຍ

ການຈັດລຽນຕຳແໜ່ງເບ້ຍໄມ້ພາຍໃນສວນກ້າ

ກ. ການຈັດລຽນແບບເກາະຫ້ອຍ

ການຈັດລຽນແບບຫ້ອຍ ຫຼື ເກາະ ສ່ວນໃຫຍ່ແມ່ນໃຊ້ພືດອີງອາໄສໂດຍສະເພາະເຊັ່ນ: ດອກເຜິ້ງ, ຜັກກູດບາງຊະ

ນິດ ແລະ ອື່ນໆ. ເຊິ່ງພືດເຫຼົ່ານີ້ຕ້ອງການພື້ນທີ່ ແລະ ວັດສະດຸປູກທີ່ສາມາດລະບາຍອາກາດໄດ້ດີ ເຮັດໃຫ້ບໍ່ສາ

ມາດຈັດລຽນໄວ້ເທິງໂຕະ ແລະ ພື້ນດິນໄດ້. ການຈັດລຽນແບບເກາະຫ້ອຍຈະໃຊ້ຂໍເກາະຕາມໄມ້ຂ້າວ ຫຼື ຮາວທີ່

ກຽມໄວ້ລຽນເປັນແຖວຊື່ແຖວດຽວຫ່າງກັນ 10-20 ຊັງຕີແມັດ. ໂດຍໃຫ້ກະໂຖສູງຈາກໜ້າດິນປະມານ 1 ແມັດ ຂຶ້ນໄປ.

ໝາຍເຫດ: ການຈັດລຽນແບບເກາະຫ້ອຍສາມາດໃຊ້ໃນການປະດັບອາຄານຕາມລະບຽງ, ປ່ອງຢ້ຽມ ແລະ ໜ້າເຮືອນເພື່ອເພີ່ມຄວາມສວຍງາມໃຫ້ແກ່ບ້ານເຮືອນອີກດ້ວ

ການຈັດລຽນແບບຫ້ອຍ

ຂ. ການຈັດລຽນຢູ່ພື້ນດິນ

ການຈັດລຽນຕົ້ນໄມ້ເທິງພື້ນດິນ ສ່ວນໃຫຍ່ແມ່ນໃຊ້ກັບໄມ້ຍືນຕົ້ນທີ່ມີຂະໜາດໃຫຍ່, ເບ້ຍໄມ້ ແລະ ໄມ້ປະດັບ ຫຼື

ໄມ້ທຳມະຊາດທີ່ດູແລຮັກສາງ່າຍ ແລະ ທົນຕໍ່ພະຍາດ. ເຊິ່ງການຈັດລຽນເບົ້າແມ່ນຂຶ້ນກັບຂະໜາດຂອງເບົ້າເບ້ຍ

ໄມ້ເອງເຊັ່ນ: ເບົ້າຕົ້ນໄມ້ຂະໜາດໃຫຍ່ ສູງ 1-3 ແມັດ (ໄມ້ປະດັບຂະໜາດໃຫຍ່) ສ່ວນໃຫຍ່ແມ່ນລຽນເປັນແຖວ

ດ່ຽວຫ່າງກັນ 0.6-1 ແມັດ, ເບົ້າເບ້ຍໄມ້ຂະໜາດນ້ອຍສ່ວນໃຫຍ່ແມ່ນລຽນເປັນແຖວຊື່ຫຼາຍແຖວຕິດກັນ (ຂຶ້ນກັບຂະໜາດຂອງເບົ້າ) ການລຽນເບົ້າແຕ່ລະແຖວຖ້າແຖວທຳອິດມີຈຳນວນເບົ້າເທົ່າໃດ ແຖວຕໍ່ໄປຈົນຮອດແຖວສຸດ ທ້າຍຕ້ອງມີຈຳນວນເທົ່າກັນ. ທັ້ງນີ້ກໍ່ເພື່ອໃຫ້ສະດວກໃນການຄິດໄລ່ຈຳນວນ ແລະ ງ່າຍຕໍ່ການບົວລະບັດຮັກສາ.

ໝາຍເຫດ: ການຈັດລຽນຢູ່ພື້ນດິນແມ່ນມັກເກີດມີພະຍາດ ແລະ ແມງໄມ້ລົບກວນໄດ້ງ່າຍເຊັ່ນ: ຫອຍທາກ, ພະຍາດເນົ່າເປື່ອຍ ແລະ ອື່ນໆ.

ການຈັດລຽນຢູ່ພື້ນດິນ

ຄ. ການຈັດລຽນຢູ່ເທິງໂຕະ

ການຈັດລຽນພືດຢູ່ເທິງໂຕະແມ່ນສາມາດໃຊ້ກັບພືດຫຼາຍປະເພດຫຼາຍຊະນິດເຊັ່ນ: ພືດອີງອາໄສ, ຜັກກູດ, ດອກເຜິ້ງແລະ ໄມ້ປະດັບອື່ນໆ. ເຊິ່ງພືດເຫຼົ່ານີ້ສ່ວນໃຫຍ່ເປັນພືດຫາຍາກ, ມີຄວາມສຳຄັນ ແລະ ຕ້ອງການໆດູແລຮັກສາເປັນພິເສດ. ໂດຍປົກກະຕິໂຕະມີຂະໜາດ ກ້ວາງ 80 ຊັງຕີແມັດ - 1 ແມັດ ແລະ ສູງແມ່ນ 80 ຊັງຕີແມັດ- 1 ແມັດແລະ ຍາວແມ່ນບໍ່ຈໍາກັດ. ການລຽນກະໂຖເທິງໂຕະສ່ວນໃຫຍ່ແມ່ນຂຶ້ນກັບຂະໜາດຂອງກະໂຖ ແລະ ການລຽນແມ່ນເປັນແຖວຊື່ຫຼາຍແຖວຄ້າຍຄືກັບການຈັດລຽນຢູ່ພື້ນດິນ. ແຕ່ການລຽນເທິງໂຕະຈະສາມາດປ້ອງກັນການເກີດຂອງພະຍາດ ແລະ ແມງສັດຕູພືດໄດ້, ຊ່ວຍຖ່າຍເທອາກາດໄດ້ສະດວກດີ ແລະ ຍັງສະດວກໃນການກຳຈັດວັດສະພືດອີກດ້ວຍ.

ການຈັດລຽນຢູ່ເທິງໂຕະ