ຝຸ່ນບົ່ມ ແລະ ການຄຸມດິນ

ຝຸ່ນບົ່ມ ແລະ ການຄຸມດິນ

ການເຮັດຝຸ່ນບົ່ມ

ຝຸ່ນບົ່ມແມ່ນສ່ວນປະກອບຂອງທໍາມະຊາດທີ່ມີລາຄາຖືກທີ່ສຸດ ການໃຊ້ຝຸ່ນບົ່ມແມ່ນງ່າຍດາຍ. ເປັນວິທີທີ່ຈະຮັກສາສວນໃຫ້ມີສຸຂະພາບແຂງແຮງ. ສະໜອງສານອາຫານທີ່ສໍາຄັນໃຫ້ແກ່ພືດ ແລະ ຍັງປັບປຸງດິນໂດຍການຮັກສານໍ້າ, ອາກາດໃນດິນຊ່ວຍໃຫ້ຮາກຂອງພືດຫາຍໃຈສະດວກ. ຊ່ວຍກະຕຸ້ນການເຮັດວຽກຂອງແບັກທີເຣຍ. ວິທີທີ່ດີທີ່ສຸດໃນການໃສ່ຝຸ່ນກໍ່ຄື ປະສົມຝຸ່ນໃສ່ກັບໜ້າດິນສ່ວນເທິງສຸດ ໜາປະມານ 20-30 ຊັງຕີແມັດ. ແຕ່ທ່ານກໍ່ສາມາດນໍາໃຊ້ຝຸ່ນເພື່ອປົກໜານຜັກກໍ່ໄດ້. ການປົກໜານໃຫ້ໜາຢ່າງໜ້ອຍ 5 ຊັງຕີແມັດ. ເຮັດເປັນຊັ້ນໆຂອງຝຸ່ນແຫ້ງປົກເທິງໜ້າດິນເພື່ອຮັກສາຄວາມຊຸ່ມ, ປ້ອງກັນບໍ່ໃຫ້ຫຍ້າຂຶ້ນໃນສວນ

ການເຮັດຝຸ່ນບົ່ມ

ສ່ວນປະກອບຂອງຝຸ່ນບົ່ມ:

ສິ່ງເສດເຫຼືອສີຂຽວຈໍານວນ 50% ສິ່ງເສດເຫຼືອສີນໍ້າຕານຈໍານວນ 50%:

• ຫຍ້າ ແລະ ວັດຊະພືດອື່ນໆ
• ເຈ້ຍ
• ເສດຜັກຈາກເຮືອນຄົວ
• ເຈ້ຍແຂງ
• ອາຈົມຂອງສັດ (ຂີ້ໄກ່, ຂີ້ຄວາຍ ແລະ ອື່ນໆ)
• ກາບໄມ້
• ຂົນສັດ
• ເຟືອງ ແລະ ແກບ
• ກາກກາເຟບົດ
• ໃບໄມ້ແຫ້ງ, ດິນ

ຈົ່ງລະມັດລະວັງ, ຢ່າປົນສິ່ງທີ່ທ່ານບໍ່ຕ້ອງການເອົາໄປລົງໃນກອງບົ່ມຝຸ່ນ. ຫ້າມປົນອາຫານທີ່ປຸງແຕ່ງສຸກແລ້ວ
(ລວມທັງຊີ້ນ ແລະ ປາ), ເນື້ອໄມ້ຂະໜາດໃຫຍ່, ຢາງ, ເຫຼັກ, ແກ້ວ, ຜ້ານີລົງ ຫຼື ໄຍສັງເຄາະຕ່າງໆ.

ວິທີເຮັດຝຸ່ນບົ່ມ:

• ເຮັດເປັນຊັ້ນທັບຊ້ອນກັນ ເຊິ່ງແຕ່ລະຊັ້ນມີຄວາມສູງ 20-30 ຊັງຕີແມັດ (ສິ່ງເສດເຫຼືອທີ່ເປັນສີນໍ້າຕານໜຶ່ງຊັ້ນ,ດິນປົນກັບຂີ້ເປັດ, ຂີ້ໄກ່, ຂີ້ຄວາຍ ຫຼື ຂີ້ສັດອື່ນໆໜຶ່ງຊັ້ນ, ສິ່ງເສດເຫຼືອສີຂຽວໜຶ່ງຊັ້ນ ແລະ ເຮັດຄືນແບບເກົ່າໄປເລື້ອຍໆ).
• ເຕີມນໍ້າສະກັດຊີວະພາບລົງໄປເພື່ອຊ່ວຍກະຕຸ້ນການຍ່ອຍສະຫຼາຍຂອງອົງຄະທາດຕ່າງໆ. ປະສົມນໍ້າສະກັດຊີວະພາບປະມານ 10 ຊີຊີ ກັບນໍ້າ 10 ລິດ. ຖອກເຕີມໃສ່ກອງຝຸ່ນບົ່ມທຸກໆສອງອາທິດ.
• ຮັກສາຝຸ່ນບົ່ມໄວ້ໃນບ່ອນທີ່ຮົ່ມ ແລະ ແຫ້ງເຊັ່ນ: ເກັບຮັກສາໄວ້ບໍລິເວນທີ່ບັນຈຸຝຸ່ນເຊິ່ງອ້ອມດ້ວຍຮົ້ວໄມ້ໄຜ່ແລະ ມຸງຫຼັງຄາ.
• ປີ້ນກອງຝຸ່ນບົ່ມສີ່ຄັ້ງຕໍ່ເດືອນ ແລະ ເຕີມນໍ້າໃສ່ເລັກນ້ອຍເວລາປີ້ນກອງຝຸ່ນບົ່ມ, ພະຍາຍາມຮັກສາຄວາມຊຸ່ມຂອງກອງຝຸ່ນແຕ່ບໍ່ໃຫ້ມັນປຽກ, ຝຸ່ນບົ່ມທີ່ດີຈະບໍ່ມີກິ່ນເໝັນ, ຖ້າຮູ້ສຶກວ່າມັນມີກິ່ນເໝັນແຮງສະແດງວ່າມັນປຽກໂພດຕ້ອງປີ້ນຫຼາຍເທື່ອຂຶ້ນຕື່ມ.
• ຕາມທໍາມະດາການເຮັດຝຸ່ນບົ່ມຈະໃຊ້ເວລາປະມານສາມເດືອນ ເພື່ອພ້ອມສໍາລັບເອົາໄປນໍາໃຊ້ໄດ້.
• ຕ້ອງນໍາໃຊ້ພຽງແຕ່ຝຸ່ນບົ່ມທີ່ບົ່ມແລ້ວເທົ່ານັ້ນ ຝຸ່ນບົ່ມທີ່ບົ່ມແລ້ວຈະມີໂຄງສ້າງຂອງອົງປະກອບຕ່າງໆທີ່ສອດຄ່ອງ ແລະ ກົມກືນກັນ, ມີກິ່ນດິນທີ່ດີ ແລະ ເມັດພືດທໍາມະຊາດຈະເລີ່ມແຕກໜໍ່.

ວິທີນໍາໃຊ້ຝຸ່ນບົ່ມ:

• ໃຊ້ປົກຄຸມ: ວາງອ້ອມຕົ້ນພືດເຮັດເປັນຊັ້ນໜາປະມານ 1 ຊັງຕີແມັດ ເພື່ອຮັກສາຄວາມຊຸ່ມຊື່ນຂອງດິນ
• ໃຊ້ປະສົມເປັນດິນປູກ: ປະສົມໜຶ່ງສ່ວນຂອງຝຸ່ນບົ່ມກັບດິນຊັ້ນເທິງສອງສ່ວນ ເພື່ອໃຫ້ໄດ້ດິນປູກທີ່ດີ. 
• ໃຊ້ເພື່ອປັບປຸງດິນ: ໃສ່ຝຸ່ນບົ່ມໃນໜານຜັກຕ່າງໆ ເພື່ອປັບປຸງຄຸນນະພາບຂອງດິນ.

ການຄຸມດິນ

ແມ່ນວິທີໜຶ່ງທີ່ສາມາດຮັກສາຄວາມຊຸ່ມຊື່ນໃນດິນໄດ້ດີທີ່ສຸດ ແລະ ຍັງປະຢັດຄ່າໃຊ້ຈ່າຍໄດ້ຫຼາຍອີກ ໂດຍການໃຊ້ວັດສະດຸຕ່າງໆຈາກທຳມະຊາດມາຄຸມດິນເພື່ອເກັບຮັກສາດິນ ແລະ ນໍ້າເຊັ່ນ: ເສດຊາກພືດ, ໃບໄມ້, ເຟືອງເຂົ້າ ຫຼື ວັດສະດຸອື່ນໆ. ການຄຸມດິນດ້ວຍວິທີຕ່າງໆທີ່ກ່າວມານັ້ນ ແມ່ນສາມາດຫຼຸດຜ່ອນປະລິມານນໍ້າທີ່ໄຫຼອອກຈາກຕົ້ນພືດ, ຫຼຸດຜ່ອນການສູນເສຍດິນ, ຊ່ວຍຄວບຄຸມວັດສະພືດ, ຄວບຄຸມອຸນຫະພູມຂອງດິນ, ຊ່ວຍເພີ່ມອິນ
ຊີວັດຖຸແກ່ດິນ ແລະ ຫຼຸດການລະເຫີຍນໍ້າຈາກໜ້າດິນເຮັດໃຫ້ໃນດິນເກັບຄວາມຊຸ່ມຊື່ນໄດ້ຍາວນານຂຶ້ນ

ວິທີການຄຸມດິນ:

ການຄຸມດິນສາມາດເຮັດໄດ້ຫຼາຍວິທີແລ້ວແຕ່ຈຸດປະສົງຂອງຜູ້ໃຊ້ເຊັ່ນ:

• ໃຊ້ເພື່ອຄຸມພືດຜັກ: ສ່ວນໃຫຍ່ແມ່ນໃຊ້ເຟືອງເຂົ້າ, ຂີ້ແກບ, ໃບໄມ້ແຫ້ງ ແລະ ອື່ນໆມາປົກຄຸມດິນຕາມຄວາມເໝາະສົມກັບຜັກແຕ່ລະຊະນິດເຊັ່ນ: ຜັກທຽມ, ຜັກບົ່ວ ແລະ ອື່ນໆ.
• ໃຊ້ເພື່ອຄຸມໄມ້ໃຫ້ໝາກ ຫຼື ໄມ້ຢືນຕົ້ນ: ສ່ວນໃຫຍ່ແມ່ນໃຊ້ຊາກພືດ, ໃບໄມ້ ແລະ ອື່ນໆ.

ໝາຍເຫດ:ທ່ານຍັງສາມາດໃຊ້ວັດສະດຸອື່ນໆໃນການຄຸມດິນ ຫຼື ຄຸມພືດຜັກຂອງທ່ານໄດ້ເຊັ່ນ: ຜ້າຢາງ, ເຈ້ຍແກັດ
ແລະ ອື່ນໆ

ວິທີການຄຸມດິນ