Crinum asiaticum L.
AMARYLLIDACEAE
ລັກສະນະພືດສາດ: ຫ້ວານຊົນ ເປັນພືດລົ້ມລຸກອາຍຸຫຼາຍປີ, ມີຫົວຢູ່ໃຕ້ດິນ, ລຳຕົ້ນກົມກ້ວາງແຕ່ 8-15 ຊມ, ຍາວ 30 ຊມ. ໃບດ່ຽວ, ຈັບວຽນສະຫຼັບອ້ອມຮອບລຳຕົ້ນ, ຮູບແຂບແກມຮູບຫອກ, ຍາວປະມານ 1 ມ, ກ້ວາງ 10-15
ຊມ, ຂອບໃບເປັນຄື້ນ, ປາຍໃບຮຽວແຫຼມ. ດອກ ຫ້ວານຊົນ ອອກເປັນຊໍ່ແບບຄັນຮົມ, ກ້ານຊໍ່ດອກຍາວປະມານ 90 ຊມ, ມີດອກປະມານ 12-40 ດອກ, ໃບປະດັບຮູບແຂບ, ຂະໜາດ 3-7 ມມ. ດອກຫອມ, ກ້ານດອກ ຫ້ວານຊົນ ຍາວ 0.5-2.5 ຊມ, ວົງກີບດອກເປັນຫຼອດຮຽວ, ຫຼອດສີຂຽວຂາວ, ກ້ວາງ 5-7 ມມ, ຍາວ 7-10 ຊມ, ປາຍແຍກເປັນ 6 ແສກ, ສີຂາວ, ຮູບແຂບ, ກ້ວາງ 6-9 ມມ, ຍາວ 5-9 ຊມ, ປາຍຮຽວແຫຼມ,ເກສອນເພດຜູ້ມີ 6 ອັນ, ກ້ານເກສອນຍາວ 4-5 ຊມ, ຖົງລະອອງເກສອນຮູບແຂບ, ຍາວປະມານ 1.5-2 ຊມ, ປາຍຮຽວແຫຼມ, ເຕົ້າໄຂ່ຮູບຮີ, ຂະໜາດຕ່ຳກວ່າ 2 ຊມ. ໝາກ ເປັນໝາກແຫ້ງແຕກ, ຮູບຮ່າງເກືອບກົມ.
ປິ່ນປົວພະຍາດ: ບັນເທົາອາການປວດ, ບວມຕາມແຂນຂາ ແລະ ເຮັດໃຫ້ຮາກເພື່ອຖອນພິດອາຫານ.
ສ່ວນທີ່ໃຊ້: ຮາກ ແລະ ໃບ
ວິທີການນຳໃຊ້: ໃຊ້ໃບ ຫ້ວານຊົນ ຂາງໄຟພໍປະມານແລ້ວນຳໄປປະຄົບບໍລິເວນທີ່ປວດບວມ, ສ່ວນຮາກຫວ້ານຊົນແມ່ນ ນຳມາລ້າງໃຫ້ສະອາດແລ້ວຫຍ້ຳກືນກິນແຕ່ນ້ຳຈະເຮັດໃຫ້ເຮົາຮາກອອກມາໃຊ້ເມື່ອເຮົາກິນອາຫານທີ່ເປັນພິດ ຫຼື ທາດເບື່ອ.
ການປູກຂະຫຍາຍພັນ: ຫວ້ານຊົນເປັນພືດທີ່ຈະເລີນເຕີບໂຕໄດ້ໃນດິນເກືອບທຸກຊະນິດ ສາມາດຂະຫຍາຍພັນໂດຍການແຍກເຫງົ້າ ແລະ ກ້າແກ່ນ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ