ລັກສະນະພືດສາດເຄືອຕົດໝາ

ເຄືອຕົດໝາ

Paederia pilifera Hook.f.
RUBIACEAE

ລັກສະນະພືດສາດ: ເຄືອຕົດໝາເປັນໄມ້ເຄືອ, ລຳຕົ້ນກົມ, ມີຂົນປົກຄຸມ; ໃບດ່ຽວ, ຈັບກົງກັນຂ້າມເປັນຄູ່, ຮູບໄຂ່ ຫຼືຮູບຫອກແກມຂອບຂະໜານ, ກ້ວາງ 2-6 ຊມ, ຍາວ 6-15 ຊມ, ປາຍໃບແຫຼມ, ຖານໃບວ້ຳເປັນຮູບຫົວໃຈ,ຜິວໃບດ້ານເທິງມີຂົນຫ່າງໆ, ຫູໃບຮູບໄຂ່ ມ້ວນເປັນກໍ້, ມີຂົນ. ດອກ ສີມ່ວງອົມແດງ, ອອກເປັນຊໍ່, ຍາວປະມານ 15-25 ຊມ, ດອກຍ່ອຍ ຈຳນວນຫຼາຍຢູ່ຕິດກັນເປັນກະຈຸກ, ກາບດອກ ເຄືອຕົດໝາ ມີຂະໜາດນ້ອຍ 5 ກາບ,ກີບດອກເຊື່ອມຕິດກັນເປັນຫຼອດ, ຍາວ 1 ຊມ, ມີຂົນປົກຄຸມ, ສ່ວນປາຍແຍກເປັນ 5 ແສກ, ມີສີຂາວເກສອນຜູ້ 5 ອັນ, ຕິດກັບຫຼອດກີບດອກ. ໝາກ ກົມແກມຮູບຮີ, ຜິວລຽບ, ຂະໜາດ 6-10 ມມ.

ປິ່ນປົວພະຍາດ: ເຈັບທ້ອງ, ຖອກທ້ອງ ແລະ ທ້ອງອືດ

ສ່ວນທີ່ໃຊ້: ຮາກ ແລະ ໃບ

ວິທີການນຳໃຊ້: ໃຊ້ຮາກ ແລະ ໃບເຄືອຕົດໝາ ຕົ້ມນ້ຳກິນເຮັດໃຫ້ຫາຍຈາກອາການເຈັບທ້ອງ, ຖອກທ້ອງ ແລະ ທ້ອງອືດ.
ການປູກຂະຫຍາຍພັນ: ເຄືອຕົດໝາ ເປັນວັດຊະພືດມັກເກີດຕາມປ່າເລົ່າ ຂະຫຍາຍພັນດ້ວຍແກ່ນ.