ຜົນ​ກະທົບ​ ຈາກການ​ປ່ຽນ​ແປງ ​ດິນຟ້າ​ອາກາດ ຕໍ່ການ​ຜະລິດກະສິກຳ ຢູ່​ໃນ​ປະ​ເທດ​ເຮົາ

ການປ່ຽນແປງດິນຟ້າອາກາດ

ການ​ຜະລິດກະສິກຳ ຢູ່​ໃນ​ປະ​ເທດ​ເຮົາ ​ເປັນ​ການ​ຜະລິດ​ຂະໜາດ​ນ້ອຍ, ກະ​ແຈກ​ກະຈາຍ, ຂາດ​ຄວາມ​ພ້ອມ​ດ້ານ​ເຕັກນິກ ​ແລະພື້ນຖານ​ໂຄງ​ຮ່າງ ຈິ່ງ​ເຮັດ​ໃຫ້ການ​ຜະລິດ​ກະສິ ກຳ​ໃນ​ໄລຍະ​ຜ່ານ​ມາ ໄດ້ຮັບ​ຜົນ​ກະທົບ ຈາກການປ່ຽນແປງດິນຟ້າອາກາດ ​​ເປັນ​ຕົ້ນ​ແມ່ນສະພາບ​ນ້ຳ​ຖ້ວມ, ແຫ້ງແລ້ງ ແລະ ຝົນຕົກ​ບໍ່​ຖືກ​ຕາມ​ລະດູ​ການ​ເປັນ​ຕົ້ນ. ຈາກການຄາດຄະເນ, ປະລິມານນ້ຳຝົນ​ສະ​ເລ່ຍເພິ່ມຂື້ນ ໃນ​ສັດຕະວັດ​​ທີ 21 ດ້ວຍ​ອັດຕາເພີ້ມ 4.2 ​ເປີ​ເຊັນ. ໄພທໍາມະຊາດ (ນ້ຳຖ້ວມ-ແຫ້ງແລ້ງ) ​ໄດ້ເຮັດໃຫ້ບາງທ້ອງຖິ່ນຂາດເຂົ້າກິນ ​ແລະບໍ່ສາມາດກຸ້ມຕົນເອງດ້ານສະບຽງອາຫານ. ການປ່ຽນແປງ ດິນຟ້າອາກາດ ເຮັດໃຫ້ການຜະລິດຫລ້າຊ້າ ​ແລະຜົນຜະລິດບໍ່ໄດ້ຕາມຄາດໝາຍ, ຍົກ​ຕົວຢ່າງການເກີດພະຍຸເກດສະໜາ ໃນບັນດາພາກໃຕ້ ໃນໄລຍະຜ່ານມາ ​ເຮັດ​ໃຫ້​ເກີດ​ມີສະພາບນ້ຳ ຖ້ວມ ໄດ້ສົ່ງຜົນກະທົບ ຕໍ່ການປູກພືດ ໂດຍສະເພາະແມ່ນການປູກເຂົ້າ ເລາະລຽບຕາມແຄມແມ່ນ້ຳຂອງ ແລະສາຂາຕ່າງໆ. ນອກຈາກນັ້ນ, ການເພີ້ມຂື້ນຂອງ ອຸນຫະພູມ (​ສະ​ເລ່ຍ​ເພີ່ມ​ຂື້ນປີລະ​​ປະມານ 0​.26°C).  ໄດ້ສົ່ງຜົນສະທ້ອນ ຕໍ່ຜະລິດ ຕະພາບຂອງພືດໂດຍສະເພາະແມ່ນພືດຜັກ ແລະ ພືດລະດູໜາວ. ພ້ອມດຽວກັນນັ້ນ, ການປ່ຽນແປງດິນຟ້າອາກາດ ຍັງເອື້ອອໍານວຍ ໃຫ້ແກ່ການລະ ບາດຂອງ ສັດຕູພືດ ແລະວັດສະພືດ. ຜົນກະທົບຈາກການປ່ຽນແປງ ດິນຟ້າອາດ ຍັງສົ່ງຜົນສະທ້ອນ ເຮັດໃຫ້ ຕົ້ນ​ທຶນ​ການ​ຜະລິດ​ສູງ​ຂື້ນ ​ແລະລາຄາຜົນຜະລິດກະສິກຳມີລາຄາ ສູງຂື້ນຕາມລຳດັບ.

ຜົນ​ກະທົບ​ຈາກການ​ປ່ຽນ​ແປງ​ດິນຟ້າ​ອາກາດ ​ກໍ່​ໃຫ້​ເກີດ​ຄວາ​ມເສຍ​ຫາຍ​ໃຫ້​ຂະແໜງກະສິກຳ ຊຶ່ງເປັນຂະແໜງທີ່ສ້າງລາຍຮັບເປັນຫຼັກໃຫ້ແກ່ ປະຊາຊົນລາວ ເຮັດໃຫ້ລາຍຮັບຫຼຸດ​ລົງ​ຍ້ອນຜົນຜະລິດ​ພືດຖືກເສຍຫາຍ ເນື່ອງຈາກຈາກ​ອາກາດ​ຮ້ອນ, ແຫ້ງແລ້ງ ແລະນໍ້າຖ້ວມເປັນຕົ້ນ. ສະພາບການດັ່ງກ່າວ ​ສົ່ງ​ຜົນ​ກະທົບ​ອັນ​ໃຫຍ່​ຫຼວງ​ ຕໍ່ການດຳລົງ​ຊີວິດ​ຂອງປະຊາຊົນ. ຈາກການສຶກສາຂອງ ທະນາຄານພັດທະນາອາຊີ (ADB) ພົບວ່າ ການປ່ຽນແປງຂອງດິນຟ້າອາກາດ ຈະເຮັດໃຫ້ການຜະລິດເຂົ້າທີ່ອີງໃສ່ຊົນລະປະທານໃນອາຊີຕາເວັນອອກສ່ຽງໃຕ້ ແມ່ນຈະຫລຸດລົງ 17 ເປີເຊັນ. ຜົນການສຶກສາ ໄດ້ແນະນໍາວ່າ ມີຄວາມຈໍາເປັນທີ່ຈະເຮັດການລົງທຶນ ທີ່ສຳຄັນໃນການຍົກລະດັບປະສິດທິພາບຂອງຊົນລະປະທານ. ນອກຈາກນີ້, ຍັງຈະມີຄວາມຕ້ອງການກົນໄກການຖ່າຍທອດເຕັກໂນໂລຊີ ເປັນຕົ້ນແມ່ນວິທີການປູກພືດທີ່ໄດ້ຮັບຜົນ​ມາ​ແລ້ວ ​ຕໍ່​ກັບ​ການປັບຕົວໃຫ້ເຂົ້າກັບການປ່ຽນແປງຂອງສະພາບດິນຟ້າອາກາດ ເຊັ່ນ: ການປູກພືດແບບຫຼາກ​ຫຼາຍ, ການປູກພືດສະຫຼັບ, ການປູກພືດແບບປະສົມປະສານ, ແລະວິທີການປູກພືດແບບໃຫມ່.

ດັ່ງ​ນັ້ນ, ການ​ປັບ​ໂຕ​ໃຫ້​ເຂົ້າ​ກັບ​ສະພາບ​ການ​ປ່ຽນ​ແປງ​ຂອງ​ອາກາດ ​ແລະການ​ວາງ​ແຜນ​ຮັບ​ມື​ກັບ​ຄວາມ​ສ່ຽງ​ຈາກ​ໄພພິບັດຈິ່ງເປັນສິ່ງ​ສຳຄັນ​ຂອງ​ ຕ້ອງໄດ້ບັນຈຸເຂົ້າໃນແຜນຍຸດທະສາດຂອງຂະ​ແໜງການປູກຝັງ