ເອື້ອງໝາຍນາ Cheilocostus speciosus

ເອື້ອງໝາຍນາ
Cheilocostus speciosus
(J.König) C.Specht
COTACEAE

ລັກສະນະພືດສາດ: 

ເປັນພືດລົ້ມລຸກ, ສູງ 1-3 ມ, ຂະໜາດຜ່າສູນກາງລຳຕົ້ນບໍລິເວນໃກ້ກົກ 1-3 ຊມ,ລຳຕົ້ນອວບໜາ, ຕັ້ງຊື່ ສັງເກດເຫັນເປັນປ້ອງເດັ່ນຊັດ ປ້ອງຍາວ 2-3 ຊມ, ມີສີແດງ, ປາຍກິ່ງມັກໂຄ້ງວຽນ; ມີເຫງົ້າໃຕ້ດິນ. ໃບດ່ຽວ, ຈັບຮຽງແບບສະຫຼັບ, ແຜ່ນໃບຮູບຂອບຂະໜານ ຫຼື ຮູບຫອກ, ກ້ວາງ 5-10 ຊມ, ຍາວ 10-20 ຊມ, ໃບດ້ານລຸ່ມມີຂົນສັ້ນນຸ້ມປົກຄຸມທົ່ວໃບ, ກ້ານໃບສັ້ນ. ດອກອອກເປັນຊໍ່ຢູ່ປາຍສຸດ, ຮູບກະສ້ວຍ ຫຼື ຮູບໄຂ່, ຍາວ 5-15 ຊມ. ໃບປະດັບສີແດງ, ຮູບໄຂ່, ຂະໜາດ 2 ຊມ. ກ້ານດອກຍ່ອຍ ສີແດງຈືດ, ຍາວ 1.2-1.5 ຊມ. ວົງກາບດອກສີແດງ, ຍາວ 2 ຊມ, ປາຍແຍກເປັນ 3 ແສກ, ວົງກີບດອກເປັນຫຼອດສີຂາວ, ຮູບລຳໂພງ ປາຍເຫວີຄ້າຍຄືແກ, ຂະໜາດ 6.5 ຊມ, ດ້ານໃນມີແຕ້ມສີເຫຼືອງ. ເກສອນຜູ້ມີ 3 ອັນ, ສົມບູນ 2 ອັນ, ເປັນໝັນ 1 ອັນ. ໝາກ ເປັນໝາກແຫ້ງແຕກ, ສີແດງ, ຮູບໄຂ່ກົມ, ຂະໜາດ 1.5 ຊມ. ແກ່ນແກ່ເປັນສີດຳ.

ປິ່ນປົວພະຍາດ: ແກ້ເຈັບທ້ອງ, ຖອກທ້ອງ ແລະ ບຳລຸງກຳລັງ.
ສ່ວນທີ່ໃຊ້: ເຫງົ້າ, ລຳຕົ້ນ ແລະ ໃບ.

ວິທີການນຳໃຊ້: 

ແກ້ເຈັບທ້ອງໃຊ້ເຫງົ້າຕຳພອກບໍເວນສະບື, ສຳລັບແກ້ຖອກທ້ອງແມ່ນໃຊ້ເຫງົ້າຕົ້ມນ້ຳກິນ
ແລະ ສຳລັບເຮັດຢາບຳລຸງກຳລັງແມ່ນໃຊ້ລຳຕົ້ນກັບໃບຕົ້ມກິນທຸກວັນຈະເຮັດໃຫ້ຮ່າງກາຍແຂງແຮງ.

ການປູກຂະຫຍາຍພັນ: 

ເອື້ອງໝາຍນາເປັນພືດທີ່ເກີດຂຶ້ນເອງຕາມທຳມະຊາດ ຢູ່ຕາມປ່າດິບແລ້ງ ແລະ
ປ່າປະສົມປ່ຽນໃບ. ແກ່ນທີ່ສາມາດຂະຫຍາຍພັນໄດ້ແມ່ນແກ່ນທີ່ແກ່ດີ ກ່ອນອ່ືນໝົດຕ້ອງສັງເກດເບິ່ງວ່າ
ກາບໃບປະດັບຈັບໃນຊໍ່ດອກອອກສີແດງອ່ອນແຫ້ງ ແລະ ສີຈືດຊືດ ເຊິ່ງເປັນການບົ່ງບອກວ່າ ເມັດຢູ່
ໃນພາວະແກ່ ແລະ ເກັບໄດ້ແລ້ວ, ຕັດຊຳກິ່ງ ຕ້ອງເລືອກເອົາກິ່ງງ່າທີ່ມີອາຍຸປະມານ 1 ປີ ແລະ ແຍກເຫງົ້າ
ຕ້ອງເລືອກເອົາເຫງົ້າທີ່ບໍ່ແກ່ເກີນໄປ, ເຫງົ້າແກ່ສ່ວນຫຼາຍຈະມັກປູກໄດ້ຍາກ.