ເປົ້າໝາຍ ແລະ ຄາດໝາຍທາງການກະເສດ ແຕ່ນີ້ຮອດປີ 2025

ເປົ້າໝາຍທີ 1: ການຜະລິດສະບຽງ

ເພື່ອຮັບປະກັນ​ດ້ານ​ໂພຊະ​ນາ​ການ​ ຂອງ​ປະຊາຊົນ​​ໃຫ້ໄດ້​ຮັບພະລັງງານ 2.600-2.700 ກິໂລກາລໍຣີ ຕໍ່ຄົນຕໍ່ວັນ, ຕ້ອງຮັບປະກັນດ້ານສະບຽງອາຫານ ແຕ່ລະປະເພດ ເພື່ອບໍລິໂພກໃຫ້ໄດ້ຢ່າງໜ້ອຍຕ້ອງ​ປະກອບສ່ວນ​ດ້ານ​ພືດທັນ​ຍາ​ຫານ ​ແລະ ​ໂພຊະ​ນາ​ການ ຄື[1]:

-        ​​ເຂົ້າສານ​ 167 ກິ​ໂລ/ຄົນ/ປີ (ຫຼື ເທົ່າກັບປະມານ 280 ກິ​ໂລ​ເຂົ້າ​ເປືອກ/ຄົນ/ປີ).

-        ທາດແປ້ງ 4,9 ກິໂລ/ຄົນ/ປີ.

-        ພືດ​ຜັກ 75-85 ກິ​ໂລ/ຄົນ/ປີ

-        ປະ​ເພດ​ຖົ່ວ-ງາ (ແຫ້ງ) 0,7 ກິ​ໂລ/ຄົນ/ປີ.

-        ສາລີ 1,5 ກິໂລ/ຄົນ/ປີ.

-        ປະເພດ ພືດເປັນຫົວ (ເຜືອກ, ມັນ ຕ່າງໆ...) 1,8 ກິໂລ/ຄົນ/ປີ.

-        ໝາກ​ໄມ້ 80-90 ກິ​ໂລ/ຄົນ/ປີ

-        ນ້ຳ​ຕານ 1,3 ກິ​ໂລ/ຄົນ/ປີ.

-        ນ້ຳນົມ  1,1 ກິໂລ/ຄົນ/ປີ.

-        ປະເພດນ້ຳມັນ 25,5 ກິ​ໂລ/ຄົນ/ປີ.

-        ໝາຍ​ເຫດ:  ສ່ວນ​ທີ່​ເຫລືອ​ແມ່ນ​ທາດ​ຊີ້ນ, ​ໄຂ່, ນົມ ​ແລະ ອື່ນ...

​​

ຕ້ອງສູ້ຊົນຜະລິດ​ ​ແລະ ສະໜອງ ເຂົ້າ, ພືດ​ຜັກ, ປະ​ເພດຖົ່ວ-ງາ, ໝາກ​ໄມ້, ນ້ຳ​ຕານ, ຊີ້ນ-​ປາ ​ແລະ ​ໄຂ່ ໃຫ້ພຽງພໍ ແລະ ມີສ່ວນແຮໄວ້ ຊຶ່ງຕ້ອງ​ໄດ້ເອົາໃຈໃສ່ ການ​ຜະລິດ​ສະບຽງ​ທີ່​ສຳຄັນ​ ດັ່ງ​ນີ້:

1) ສູ້​ຊົນຜະລິດ​ເຂົ້າ​ເປືອກລວມ ໃຫ້ໄດ້ 5 ຫາ 5,2 ລ້ານ​ໂຕນ, ດ້ວຍອັດຕາ​ການ​ຂະຫຍາຍ​ຕົວ ແຕ່​ນີ້​ຫາ​ປີ 2020 ​ສະ​ເລ່ຍໃຫ້​ໄດ້​ 5 ຫາ 5,5% ຕໍ່​ປີ (ໃນນີ້ ຈາກການຂະຫຍາຍເນື້ອທີ່ 2% ແລະ ຈາກການ ຍົກຜະລິດຕະພາບ 3-3,5%), ​ຕາມອັດຕາສ່ວນ ​​ເຂົ້າໜຽວ 70% ​ແລະ ເຂົ້າຈ້າວ 30%, ຊຶ່ງປະກອບ​ມີລາຍລະອຽດ ຄື:

·      ​ເຂົ້າສໍາລັບຄໍ້າປະກັນສະບຽງອາຫານ ປະມານ 2,8-3 ລ້ານໂຕນ ຊຶ່ງປະກອບມີ:

-        ເຂົ້າ​ບໍລິ​ໂພ​ກ 2,1 ລ້ານ​ໂຕນ (ເຂົ້າເປືອກ) (7,5 ລ້ານ​ຄົນ X 280 ກິ​ໂລ​ເຂົ້າ​ເປືອກ/ຄົນ/ປີ)​​.

-        ຄັງ​ແຮ​ເຂົ້າ 800.000 ​ໂຕນ (​ເຂົ້າ​​ສານ 480.000 ​ໂຕນ; ກຸ້ມໄດ້ປະມານ 5 ເດືອນ).

·      ແນວ​ພັນ​ເຂົ້າ 120.000 ​ໂຕນ; ໃນນີ້ ທົ່ງພຽງຄຳມ່ວນ ແລະ ສະຫວັນນະເຂດ 50.000 ໂຕນ.

·      ສຳ​ລັບ​​ປຸງ​ແຕ່ງ​ພາຍ​ໃນ 700.000 ​ໂຕນ.

·      ​ເຂົ້າ​ສົ່ງ​ອອກ​​ 1,5 ລ້ານ​ໂຕນ (ລວມທັງການສົ່ງ​ອອກແບບການ​ຄ້າຊາຍ​ແດນ).

2) ຜົນ​ຜະລິດພືດຜັກ, ຖົ່ວ-ງາ ແລະ ໝາກໄມ້ ​ສຳລັບ​ບໍລິ​ໂພ​ກ​ເຊັ່ນ: ສາລີຫວານ ໃຫ້ໄດ້ ປະມານ 228.000 ໂຕນ, ເຜືອກ-ມັນ ໃຫ້ໄດ້ປະມານ 304.000 ໂຕນ, ປະເພດໄມ້ໃຫ້ໝາກ ໃຫ້ໄດ້ ປະມານ 800.000 ໂຕນ ແລະ ພືດຜັກອື່ນໆ ໃຫ້ໄດ້ປະມານ 1,5 ລ້ານໂຕນ.

3) ສູ້ຊົນຜະລິດຊີ້ນ ແລະ ໄຂ່ໃຫ້ໄດ້ 365.000 ໂຕນ, ລ້ຽງ ​ແລະ ​ເກັບ​ກູ້ປາ ​ແລະ ສັດ​ນ້ຳ​ໃຫ້ໄດ້ 215.000 ໂຕນຕໍ່ປີ, ຕອບສະໜອງອັດຕາການບໍລິໂພກລວມສະເລ່ຍ ໃຫ້ໄດ້ 65 ກິ​ໂລຕໍ່ຄົນຕໍ່ປີ, ໃນນັ້ນ ເຂດຕົວເມືອງ ໃຫ້ໄດ້ 70 ກິ​ໂລຕໍ່ຄົນຕໍ່ປີ ແລະ ເຂດຊົນນະບົດ ໃຫ້ໄດ້ 50 ກິ​ໂລຕໍ່ຄົນຕໍ່ປີ ຫລື ເຮັດໃຫ້ ປະຊາຊົນ ໄດ້ຮັບພະລັງງານຈາກທາດຊີ້ນ ສະເລ່ຍ 239 ກິໂລກາລໍຣີຕໍ່ຄົນ​ຕໍ່ວັນ ແລະ​ ສູ້​ຊົນ​ເຮັດ​ໃຫ້ອັດຕາ ການຂະຫຍາຍຕົວ ຂອງຝູງສັດ ຢູ່ໃນລະດັບ ປະມານ 6% ຕໍ່ປີ. ຂະຫຍາຍການລ້ຽງປາ ແລະ ສັດນໍ້າ ໃຫ້ໄດ້ 8-10% ຕໍ່ປີ.

ເປົ້າໝາຍທີ 2: ການຜະລິດສິນຄ້າກະສິກໍາ    

ຕ້ອງສູ້ຊົນເຮັດ​ໃຫ້ການຜະລິດ​ສິນຄ້າກະສິກໍາ ມີການຂະຫຍາຍຕົວ ​ເພື່ອຮັບປະກັນທັງປະລິມານ ແລະ ຄຸນນະພາບ ​ແນ​ໃສ່​​ໃຫ້​ເຂົ້າ​​ເຖິງຕະຫຼາດ ພາຍໃນ, ພາກພື້ນ ແລະ ສາກົນ ໂດຍ​ໃຫ້​ຕິດ​ພັນ​ກັບການ ປັບປຸງກຸ່ມ​ຊາວ​ກະສິກອນ,ສະ​ມາ​ຄົມ​ ​ຜູ້​ຜະ​ລິດ ແລະ ປຸງ​ແຕ່ງ​ກະ​ສີ​ກໍາຢ່າ​ງ​ແຂງ​ແຮງ ​ໂດຍ​ຕ້ອງ ສູ້​ຊົນ​ເຮັດ​ໃຫ້ການຜະລິດກະສິກໍາ​ເປັນ​ສິນຄ້າ​ທີ່​ສໍາຄັນສື​ບຕໍ່​ຂະຫຍາຍຕົວ​ດັ່ງລຸ່ມນີ້:

1)       ​ໃນຈໍານວນຄາດໝາຍຜົນຜະລິດເຂົ້າລວມທັງໝົດ; ຜະລິດ​ເຂົ້າ​ເປັນ​ສິນຄ້າ​ສົ່ງ​ອອກ ​​ໃຫ້​ໄດ້ປະ ມານ 1,5 ລ້ານໂຕນ​ເຂົ້າ​ເປື​ອກ ​ໄປຄຽງຄູ່ກັບການສົ່ງເສີມ ການປູກເຂົ້າທີ່ມີທ່າແຮງຂອງ​ແຕ່ລະ​ທ້ອງ​ຖີ່​ນ ​ເປັນຕົ້ນ: ເຂົ້າກໍ່າ, ເຂົ້າໄກ່ນ້ອຍ, ເຂົ້າຫອມ ​ໃນ​ເຂດ​ທີ່ມີທ່າແຮງ ແລະ ມີເງື່ອນໄຂ, ແລະ ສົ່ງ​ເສີມເຂົ້າພັນ ປັບປຸງໃໝ່ທີ່ມີຄຸນນະພາບ ​ແລະ ​ເປັນ​ທີ່​ຕ້ອງການ​ຂອງ​ຕະຫຼາດ ເປັນຕົ້ນ: ​ເຂົ້າທ່າ​ດອກ​ຄໍາ, ​ເຂົ້າທ່າ​ສະ​ໂນ, ​ເຂົ້າ​ໂພນ​ງາມ ​ແລະ ​ເຂົ້າ​ຫອມ​ອື່ນໆ ​ໃນ​ເຂດ​ທົ່ງພຽງຕ່າງໆ. ເພີ້ມສັດສ່ວນ ການປູກເຂົ້າຈ້າວໃຫ້ກວມເອົາ 35% ຂອງຜົນຜະລິດທັງໝົດ, ໃນນັ້ນ ເລັ່ງໃສ່ຜະລິດເຂົ້າ ເພື່ອສົ່ງອອກ​ໃນ​ມາດຕະຖານກະສິກຳທີ່​ດີ (GAP) ໂດຍເລ່ັງໃສ່ຕະຫຼາດພາກພື້ນ ແລະ ສາກົນ. ສຳລັບຢູ່ບັນດາທົ່ງພຽງນ້ອຍ ແລະ ທົ່ງພຽງກາງ ຂອງແຂວງ ພາກເໜືອ ແມ່ນສຸມໃສ່ ຜະລິດເຂົ້າເປັນສິນຄ້າ ເພື່ອສະໜອງໃຫ້ ສ.ປ.ຈີນ ໂດຍນຳໃຊ້ແນວພັນເຂົ້າ ທີ່ຕະ ຫຼາດຈີນຕ້ອງການ.

2)       ສໍາ​ລັບ​ພືດຕ່າງໆ: ຜະລິດສາລີອາຫານສັດ ໃຫ້ບັນລຸ 1,3 ລ້ານໂຕນ, ກາເຟ ໃຫ້ໄດ້ປະມານ 120.​000 ໂຕນ, ອ້ອຍ ໃຫ້ໄດ້ຫຼາຍ​ກ່ວາ 2 ລ້ານໂຕນ, ມັນຕົ້ນ ໃຫ້ໄດ້ 1,5 ລ້ານໂຕນ, ຖົ່ວເຫຼືອງ ໃຫ້ໄດ້ 50.000 ໂຕນ. ນອກນັ້ນ ກໍສູ້ຊົນ ຜະລິດພືດສິນຄ້າອື່ນໆທີ່ມີທ່າແຮງໄດ້ປຽບ.

---