ປ່າປູກ ໃນລາວ

ເນື້ອທີ່ປ່າປູກ

          ມາຮອດປະຈຸບັນ ເນື້ອທີ່ປ່າປູກ ທັງໝົດ ທົ່ວປະເທດ ມີປະມານ 146.600 ເຮັກຕາ ຊຶ່ງ ສ່ວນຫຼາຍຢູ່ໃນພາກກາງ. ຈາກການປະເມີນເຫັນວ່າ ໃນປະຈຸບັນ ເນື້ອທີ່ປ່າປູກ ທີ່ໄດ້ມາດຖານຂອງສວນປູກໄມ້ (ອັດຕາການລອດຕາຍສູງກວ່າ 70%) ມີປະມານ 66% ໃນທົ່ວປະເທດ.ອີງຕາມຂໍ້ມູນ ຂອງໂຄງການປູກໄມ້ ລາວ-ທະນາຄານພັດທະນາອາຊີ ສະແດງໃຫ້ເຫັນວ່າ ຊາວກະສິກອນລາຍບຸກຄົນ ແລະ ບໍລິສັດ ມີ ເນື້ອທີ່ສວນປູກ ສະເລັ່ຽແຕ່ 20-30 ເຮັກຕາ ກວມເອົາ ເນື້ອທີ່ປ່າປູກ ເປັນສວ່ນໄຫຍ່ (47,5%). ໃນໂຄງການນີ້ ຊາວກະສິກອນຂະໜາດນອ້ຍ ທີ່ມີເນື້ອທີ່ສວນປູກ ສະເລັ່ຽ 1,8 ເຮັກຕາ/ຄອບຄົວ ແມ່ນເປັນເຈົ້າຂອງ ສວນປູກ ໃນ ຈຳນວນສູງ ກວມເອົາປະມານ 30% ຂອງ ເນື້ອທີ່ປ່າປູກ ຂອງໂຄງການ ທັງໝົດ.ສວ່ນບໍລິສັດທີ່ມີ ເນື້ອທີ່ສວນປູກ ປະມານ 200 ເຮັກຕາ ກວມເອົາພຽງ 1% ຂອງ ຈຳນວນ ລູກຄ້າທັງໝົດ ແຕ່ ມີເນື້ອທີ່ສວນປູກ ກວມເອົາ 10%. ສວ່ນເຫຼືອນັ້ນ ແມ່ນການປະກອບສວ່ນຂອງຄອບຄົວ ຄື ປະມານ 13%.

ຜົນໄດ້ຮັບຂອງສວນປູກໄມ້

        ຈາກຜົນການສຳຫຼວດ ປ່າປູກ ໄມ້ວິກ ຢູ່ແຂວງວຽງຈັນ ແລະ ສະຫວັນນະເຂດ ໃນເດືອນ ພະຈິກ 2002
ສະແດງໃຫ້ເຫັນວ່າ ປ່າປູກ ດັ່ງກ່າວມີ ອັດຕາການເຕີບໃຫຍ່ສະເລັ່ຽແຕ່ລະປີ ເທົ່າກັບ 6,2 ມ3/ເຮັກຕາ/ປີ ແລະ
ມີຄ່າສະເລັ່ຽ ສູງກວ່າ 5 ມ3/ເຮັກຕາ/ປີ ໜອ້ຍໜຶ່ງ. ໃນບັນດາຜູ້ລົງທຶນ ຫຼື ເຈົ້າຂອງ ສວນປູກ ໄມ້ທີ່ແຕກຕ່າງກັນ,
ສວນປູກໄມ້ຂອງບໍລິສັດທີ່ປູກໄມ້ເພື່ອການຄ້າ ແລະ ສວນປູກ ຂອງບຸກຄົນ ທີ່ລົງທຶນດ້ວຍແຫຼ່ງທຶນຕົນເອງ ມີອັດຕາການເຕີບໃຫຍ່ ສູງກວ່າ 14ມ3/ເຮັກຕາ/ປີ ແລະ 12 ມ3/ເຮັກຕາ/ປີ ຕາມລຳດັບ. ເຈົ້າຂອງ ສວນປູກໄມ້ຂະໜາດໃຫຍ່ ຜູ້ທີ່ລົງທຶນສູງ ຕໍ່ຫົວໜ່ວຍເນື້ອທີ່ ແລະ ນຳໃຊ້ ຝຸ່ນວິທະຍາສາດ, ມີການກະກຽມເນື້ອທີ່, ກະກຽມດິນ ດ້ວຍກົນຈັກ ແລະ ມີການຄຸ້ມຄອງດີ, ອັດຕາ ການເຕີບໃຫຍ່ສະເລ່ຍແຕ່ລະປີ ແມ່ນສູງກວ່ານັ້ນ. ໃນຂະນະທີ່ເຈົ້າຂອງສວນປູກໄມ້ຂະໜາດ 10 ເຮັກຕາ ຫຼື ຫຼາຍກວ່າ ສວ່ນຫຼາຍ ອັດຕາການເຕີບໃຫຍ່ ແມ່ນຢູ່ໃນລະດັບ 9 ມ3/ເຮັກຕາ/ປີ.ສວນປູກໄມ້ທີ່ມີເນື້ອທີ່ຂະໜາດນອ້ຍກວ່າ ແມ່ນມີອັດຕາການເຕີບໃຫຍ່ຕ່ຳກວ່າ. ສະນັ້ນ ຈຶ່ງສະຫຼຸບໄດ້ວ່າ ຜະລິດຕະພາບ ຂອງສວນປູກໄມ້ ທີ່ມີໃນປະຈຸບັນ ເວົ້າລວມ ແມ່ນຍັງຕ່ຳກວ່າທີ່ໄດ້ຄາດຄະເນໄວ້.ຍ້ອນອັດຕາການເຕີບໃຫຍ່ ທີ່ຕ່ຳຄືດັ່ງກ່າວນັ້ນ ອາດເຮັດໃຫ້ການປູກໄມ້ ບໍ່ສາມາດຄົງຕົວຢູ່ໄດ້. ອີງຕາມການຄິດໄລ່ເບື້ອງຕົ້ນ ສະແດງໃຫ້ຮູ້ວ່າ: ລາຄາໄມ້ໃນປະຈຸບັນ ຢູ່ສວນປູກແຄມທາງ (ປະມານ 10 ໂດລາ/ມ3),ເພື່ອຢາກເຮັດໃຫ້ ການປູກໄມ້ຄົງຕົວຢູ່ໄດ້ ແລະ ມີປະສິດຕິຜົນທາງດ້ານເສດຖະກິດນັ້ນ, ອັດຕາການເຕີບໃຫຍ່ຂອງໄມ້ໃນສວນປູກສະເລັ່ຽແຕ່ລະປີ ຕ່ຳສຸດຕ້ອງເທົ່າກັບ 20/ມ3/ເຮັກຕາ/ປີ - ໃນການສຸ່ມຕົວຢ່າງ ໃນຈຳນວນສວນປູກໄມ້108 ຕອນ, ມີພຽງແຕ່ 1 ຕອນ ເທົ່ານັ້ນ ທີ່ມີອັດການເຕີບໃຫຍ່ສະເລັ່ຽແຕ່ລະປີ ໄດ້ມາດຖານຕາມຕົວເລກນີ້ີ. ຕາມການປະເມີນໃຫ້ຮູ້ວ່າ ໃນລະດັບອັດຕາການເຕີບໃຫຍ່ສະເລັ່ຽຕໍ່ປີ ແລະ ໃນລາຄາດັ່ງທີ່ກ່າວມານີ້ ອັດຕາລາຍຮັບຕອບແທນພາຍໃນ ຂອງການລົງທຶນປູກໄມ້ ຈະເທົ່າກັບ 17% ຖ້າຫາກວ່າ ມູນຄ່າການລົງທຶນເທົ່າກັບ 600 ໂດລາ/ເຮັກຕາ ແລະ ຈະເທົ່າກັບ 9% ຖ້າວ່າ ມູນຄ່າການລົງທຶນ ເທົ່າກັບ 900 ໂດລາ/ເຮັກຕາ. ໃນອັດຕາການເຕີບໃຫຍ່ສະເລັ່ຽແຕ່ລະປີ ເທົ່າກັບ 10 ມ3/ເຮັກຕາ/ປີ ນັ້ນ ລາຍຮັບຈາກການລົງທຶນ ຈະເທົ່າກັບ 3% (ສຳລັບມູນຄ່າການລົງທຶນ 600 ໂດລາ/ເຮັກຕາ) ແລະ 4% (ສຳລັບມູນຄ່າການລົງທຶນ 900 ໂດລາ/ເຮັກຕາ).