ເປົ້າໝາຍ(ແຜນງານ)ການຜະລິດສະບຽງ

ຮັບປະກັນ​ດ້ານ​ໂພຊະ​ນາ​ການ​ ຂອງ​ປະຊາຊົນ​​ໃຫ້ໄດ້​ຮັບພະລັງງານບໍ່ໃຫ້ຫຼຸດ 2.600 ກິໂລກາລໍຣີ ຕໍ່ຄົນຕໍ່ວັນ; ໃນນີ້ ເຂົ້າ ແລະ ທາດແປ້ງ ກວມປະມານ 62%, ຊີ້ນ, ໄຂ່ ແລະ ປາ ປະມານ 10%, ປະເພດ ພືດຜັກ, ໝາກໄມ້ ແລະ ປະເພດຖົ່ວ ກວມປະມານ 6% ແລະ ປະເພດໄຂມັນ/ນໍ້າມັນ, ນ້ຳຕານ ແລະ ນໍ້ານົມ ກວມປະມານ 22%. ເພື່ອຮັບປະກັນພະລັງງານຄືດັ່ງກ່າວ ຕ້ອງຮັບປະກັນດ້ານສະບຽງອາຫານ ແຕ່ລະປະເພດ ເພື່ອບໍລິໂພກໃນແຕ່ລະປີ ໃຫ້ໄດ້ຢ່າງໜ້ອຍ ຄືດັ່ງລາຍລະອຽດລຸ່ມນີ້[1]:

-        ​​ເຂົ້າສານ​ 160 ກິ​ໂລ/ຄົນ/ປີ (ຫຼື ເທົ່າກັບປະມານ 280 ກິ​ໂລ​ເຂົ້າ​ເປືອກ/ຄົນ/ປີ).

-        ທາດແປ້ງ 5 ກິໂລ/ຄົນ/ປີ.

-        ປະເພດຊີ້ນ, ປາ ແລະ ໄຂ່ 65 ກິໂລ/ຄົນ/ປີ; ໃນນີ້ເປັນຊີ້ນໝູ 13 ກິໂລ/ຄົນ/ປີ, ຊີ້ນສັດປີກ 9 ກິໂລ/ຄົນ/ປີ, ຊີ້ນອື່ນໆ 7 ກິໂລ/ຄົນ/ປີ, ໄຂ່ 6 ກິໂລ/ຄົນ/ປີ ແລະ ປາ 30 ກິໂລ/ຄົນ/ປີ.

-        ປະເພດພືດ​ຜັກ 50 ກິ​ໂລ/ຄົນ/ປີ.

-        ປະ​ເພດ​ຖົ່ວ-ງາ (ແຫ້ງ) 2 ກິ​ໂລ/ຄົນ/ປີ.

-        ສາລີ 2,5 ກິໂລ/ຄົນ/ປີ.

-        ປະເພດ ພືດເປັນຫົວ (ເຜືອກ, ມັນ ຕ່າງໆ...) 2,5 ກິໂລ/ຄົນ/ປີ.

-        ໝາກ​ໄມ້ 30 ກິ​ໂລ/ຄົນ/ປີ.

-        ນ້ຳ​ຕານ 1 ກິ​ໂລ/ຄົນ/ປີ.

-        ນ້ຳນົມ  3 ກິໂລ/ຄົນ/ປີ.

-        ປະເພດໄຂມັນ/ນໍ້າມັນ 23 ກິ​ໂລ/ຄົນ/ປີ.

​​

ຕ້ອງສູ້ຊົນຜະລິດ​ ​ແລະ ສະໜອງ ເຂົ້າ, ພືດ​ຜັກ, ປະ​ເພດຖົ່ວ-ງາ, ໝາກ​ໄມ້, ນ້ຳ​ຕານ, ຊີ້ນ-​ປາ ​ແລະ ​ໄຂ່ ໃຫ້ພຽງພໍ ແລະ ມີສ່ວນແຮໄວ້ ຊຶ່ງຕ້ອງ​ໄດ້ເອົາໃຈໃສ່ ການ​ຜະລິດ​ສະບຽງ​ທີ່​ສຳຄັນ​ ດັ່ງ​ນີ້:

1) ສູ້​ຊົນຜະລິດ​ເຂົ້າ​ເປືອກລວມ ໃຫ້ໄດ້ບໍ່ໃຫ້ຫຼຸດ 4,7 ລ້ານ​ໂຕນ; ​ຕາມອັດຕາສ່ວນ ​​ເຂົ້າໜຽວປະມານ 70% ​ແລະ ເຂົ້າຈ້າວປະມານ 30%, ດ້ວຍອັດຕາ​ການ​ຂະຫຍາຍ​ຕົວ ຂອງຜົນຜະລິດ ແຕ່​ນີ້​ຫາ​ປີ 2020 ​ສະ​ເລ່ຍໃຫ້​ໄດ້​ປະມານ 5% ຕໍ່​ປີ (ໃນນີ້ ເນັ້ນໃສ່ການຍົກຜະລິດຕະພາບ ເປັນຕົ້ນຕໍ ໄປຄຽງຄູ່ ກັບ ການຂະ ຫຍາຍເນື້ອທີ່ ຕາມຄວາມອາດສາມາດຕົວຈິງ) ຊຶ່ງປະກອບ​ມີລາຍລະອຽດ ຄື:

·      ​ເຂົ້າສໍາລັບຄໍ້າປະກັນສະບຽງອາຫານ ປະມານ 2,5 ລ້ານໂຕນ (ເຂົ້າເປືອກ) ຊຶ່ງລວມມີ:

-        ເຂົ້າ​ບໍລິ​ໂພ​ກ 2,1 ລ້ານ​ໂຕນ (ເຂົ້າເປືອກ) (7,5 ລ້ານ​ຄົນ X 280 ກິ​ໂລ​ເຂົ້າ​ເປືອກ/ຄົນ/ປີ)​​.

-        ຄັງ​ແຮ​ເຂົ້າ 400.000 ​ໂຕນ (​ເຂົ້າ​​ສານ 240.000 ​ໂຕນ; ກຸ້ມໄດ້ປະມານ 2-3 ເດືອນ).

·      ແນວ​ພັນ​ເຂົ້າປະມານ 100.000 ​ໂຕນ.

·      ສຳ​ລັບ​​ປຸງ​ແຕ່ງ​ພາຍ​ໃນປະມານ 500.000 ຫາ 600.000 ​ໂຕນ.

·      ​ເຂົ້າເປັນສິນຄ້າພາຍໃນ ແລະ ​ສົ່ງ​ອອກບໍ່ໃຫ້ຫຼຸດ 1 ລ້ານ​ໂຕນ.

2) ​ຜະລິດພືດຜັກ, ຖົ່ວ-ງາ ແລະ ໝາກໄມ້ ​ສຳລັບ​ບໍລິ​ໂພ​ກ​ເຊັ່ນ: ສາລີຫວານ ໃຫ້ໄດ້ ປະມານ 228.000 ໂຕນ, ເຜືອກ-ມັນ ໃຫ້ໄດ້ປະມານ 304.000 ໂຕນ, ປະເພດໄມ້ໃຫ້ໝາກ ໃຫ້ໄດ້ ປະມານ 800.000 ໂຕນ ແລະ ພືດຜັກອື່ນໆ ໃຫ້ໄດ້ປະມານ 1,5 ລ້ານໂຕນ.

3) ສູ້ຊົນຜະລິດຊີ້ນ, ປາ  ແລະ ໄຂ່ ລວມໃຫ້ໄດ້ 487.500 ໂຕນ (ໃນນີ້, ຊີ້ນ ແລະ ໄຂ່ໃຫ້ໄດ້ 262.500 ໂຕນ, ປາ ​ແລະ ສັດ​ນ້ຳ​ໃຫ້ໄດ້ 225.000 ໂຕນຕໍ່ປີ) ເພື່ອຕອບສະໜອງ ອັດຕາການບໍລິໂພກ ລວມສະເລ່ຍ ໃຫ້ໄດ້ 65 ກິ​ໂລຕໍ່ຄົນຕໍ່ປີ, ໃນນັ້ນ ເຂດຕົວເມືອງ ໃຫ້ໄດ້ 70 ກິ​ໂລຕໍ່ຄົນຕໍ່ປີ ແລະ ເຂດຊົນ ນະບົດ ໃຫ້ໄດ້ 50 ກິ​ໂລຕໍ່ຄົນຕໍ່ປີ ແລະ​ ສູ້​ຊົນ​ເຮັດ​ໃຫ້ອັດຕາການຂະຫຍາຍຕົວ ຂອງຝູງສັດ ຢູ່ໃນລະດັບ ປະມານ 6% ຕໍ່ປີ. ຂະຫຍາຍການລ້ຽງປາ ແລະ ສັດນໍ້າ ໃຫ້ໄດ້ 8-10% ຕໍ່ປີ.

---

[1] ແຫຼ່ງຂໍ້ມູນ: ຍຸດທະສາດຄໍ້າປະກັນສະບຽງອາຫານ ສປປລາວ ໄລຍະ 2001-2010 ທີ່ຖືກຮັບຮອງຈາກລັດຖະບານ ໃນວັນທີ 3/2/2004, ຂໍ້ມູນຈາກ: Lao Expenditure and Consumption Survey (2002/03 and 2007/08 LECS) ແລະ ຂໍ້ມູນຈາກອົງການ  FAO.