ການຈັດແບ່ງເຂດການຜະລິດສຳລັບ​ສະບຽງ

ການຈັດແບ່ງເຂດການຜະລິດສຳລັບ​ສະບຽງ

ເພື່ອ​ນຳ​ໃຊ້​ທີ່​ດິນ​ກະສິກຳ​ໃຫ້ສອດຄ່ອງ ແລະ ແທດເໝາະກັບເງື່ອນໄຂ, ທີ່ຕັ້ງ, ຈຸດພິເສດ, ທ່າແຮງ ແລະ ຂໍ້ໄດ້ປຽບຂອງແຕ່ລະພື້ນທີ່ ໃນການດຳເນີນການຜະລິດ ແລະ ທຸລະກິດ ດ້ານການປູກຝັງ ໃຫ້ເປັນ ລະບົບ ຕ່ອງໂສ້ ແລະ ທັນສະໄໝ ຕາມທິດຜະລິດກະສິກຳສະອາດ ຈື່ງ​ໄດ້ກຳນົດ ແລະ ຈັດສັນເຂດການ ຜະລິດ ຕາມເຂດແຄ້ວນ ສຳລັບພືດສະບຽງ ຄືດັ່ງລຸ່ມ​ນີ້:

(1) ​ເຂົ້າ

ສຳລັບເຂດ​ພູດ​ອຍ ແລະ ພູພຽງ: ສຸມ​​ໃສ່ບັນດາ​ ທົ່ງພຽງກາງ, ທົ່ງພຽງ​ນ້ອຍ ​​ເຂດ​ພູດ​ອຍ ​ແລະ ພູ​ພຽງ ​​ໂດຍ​ການ​ນໍາໃຊ້​ພັນ​ພື້ນ​ເມືອງ, ​ແນວ​ພັນ​ທີ່​ເອກະລັກ​ສະ​ເພາະ​ທ້ອງ​ຖິ່ນ ແລະ ແນວພັນເຂົ້າປັບປຸງ ໃນບາງເຂດທີ່ເໝາະສົມ ເພື່ອຮັບໃຊ້ບໍລິໂພກພາຍໃນ ໂດຍ​ກຳນົດ​ເນື້ອ​ທີ່ປູກເຂົ້າ ປະມານ 450.000-500.000 ເຮັກຕາ, ຜົນ​ຜະລິດ​ໃຫ້​ໄດ້​ປະມານ 1,9-2,0 ລ້ານ​ໂຕນເຂົ້າເປືອກ ແລະ ຮອດປີ 2025 ການຜະລິດເຂົ້າຈະເນັ້ນໃສ່ ການຍົກສະມັດຕະພາບຕໍ່ເນື້ອທີ່ ໃນລະບົບກະສິກໍາສະອາດ (GI, GAP, OA), ຜົນຜະລິດລວມປະມານ 2,3 ລ້ານໂຕນເຂົ້າເປືອກ.

ສຳລັບເຂດທົ່ງພຽງ: ຮອດປີ 2020 ຂະຫຍາຍເນື້ອທີ່ປູກເຂົ້າທົ່ວປະເທດໃຫ້ໄດ້ 1,1 ລ້ານເຮັກຕາ, ສຳລັບເນື້ອທີ່ນາ ໃນ 7 ທົ່ງພຽງໃຫຍ່ມີປະມານ 800.000 ເຮັກຕາ. ຮອດປີ 2025 ເນື້ອທີ່ນາລວມທົ່ວປະ ເທດເພີ່ມຂື້ນໃຫ້ໄດ້ 1,2 ລ້ານເຮັກຕາ.  ໃນນີ້ ນອກຈາກ ກໍານົດເຂດຜະລິດທົ່ວໄປແລ້ວ ຍັງກຳນົດເປັນເຂດ ຈຸດສຸມ ຕົວແບບ ເພື່ອຍົກຜະລິດຕະພາບ ການຜະລິດເຂົ້າ ເຊັ່ນ:

§  ທົ່ງພຽງວຽງຈັນ ແມ່ນສຸມໃສ່ ຈຸດສຸມນ້ຳມັງ-3, ຈຸດສຸມນ້ຳຊວງ, ນ້ຳຫຸມ, ທົ່ງຮາບທ່າງ່ອນ, ເຂດຈຸດ ສຸມດົງໂພສີ, ທ່າພະ-ໜອງພົງ ໂດຍຍົກຜະລິດຕະພາບໃຫ້ໄດ້ 5 ໂຕນ/ຮຕ.

§  ທົ່ງພຽງບໍລິຄໍາໄຊ ສຸມໃສ່ ເຂດຈຸດສຸມກຸດຟ້າແມບ (ເມືອງທ່າພະບາດ), ຈຸດສຸມເມືອງບໍລິຄັນ, ເມືອງ ປາກຊັນ, ທົ່ງແສນທະມາດ (ເມືອງຄຳເກີດ).

§  ທົ່ງພຽງເຊບັ້ງໄຟ ສຸມໃສ່ ຈຸດສຸມເຊບັ້ງໄຟ ລວມທັງ ເມືອງໜອງບົກ ແລະ ເມືອງເຊບັ້ງໄຟ, ເຂດນຳ ໃຊ້ນ້ຳລຸ່ມເຮືອນຈັກເຂື່ອນໄຟຟ້ານໍ້າເທີນ-2 (ປະຕູ 1-2, ປະຕູ 3, ປະຕູ 4-5), ເມືອງຍົມມະລາດ, ເມືອງມະຫາໄຊ, ເຂດເມືອງຫີນບູນ ແຂວງຄໍາມ່ວນ ແລະ ເຂດພູເຮືອຊາວວາ ເມືອງໄຊບູລີ ແຂວງ ສະຫວັນນະເຂດ. ໃນນີ້ ໃນເບື້ອງຕົ້ນ ໄດ້ກໍານົດເອົາ ເຂດການຜະລິດ ໃນເນື້ອທີ່ໂຄງການຊົນລະປະ ທານ ປະຕູ 3 ລຸ່ມເຮືອນຈັກເຂື່ອນໄຟຟ້ານໍ້າເທີນ-2 ເປັນເຂດທົດລອງຜະລິດເຂົ້າ ແບບຄົບວົງຈອນ ຕິດພັນ ກັບການເຮັດທົດລອງ ພັດທະນາຕົວເມືອງໃນຊົນນະບົດ ຫຼື ພັດທະນາຊົນນະບົດໃໝ່.

§  ທົ່ງພຽງເຊບັງຫຽງ ແມ່ນສຸມໃສ່ ເຂດກຸ່ມບ້ານເວີນ, ເຂດຫ້ວຍທວດ, ເຂດສຸຍ ເມືອງຈຳພອນ, ເຂດທ່າລະຫານ້ຳ ແລະ ເຂດອື່ນໆທີ່ມີເງື່ອນໄຂ ຂອງແຂວງສະຫວັນນະເຂດ.

§  ທົ່ງພຽງເຊໂດນ ແມ່ນສຸມໃສ່ ເຂດເມືອງວາປີ ແລະ ເຂດອື່ນໆທີ່ມີທ່າແຮງ ຂອງແຂວງສາລະວັນ.

§  ທົ່ງພຽງຈຳປາສັກ ແມ່ນສຸມໃສ່ຈຸດສຸມທົດລອງ ເຂດໂຄງການໜອງບົວທອງ ເມືອງມຸນລະປະໂມກ, ເຂດເມືອງໂຂງ, ເຂດເມືອງປະທຸມພອນ, ເຂດເມືອງໂພນທອງ ແລະ ເຂດອື່ນໆທີ່ເໝາະສົມ ຂອງແຂວງ ຈຳປາສັກ.

§  ທົ່ງພຽງອັດຕະປື ແມ່ນສຸມໃສ່ເຂດເຊປຽນ, ຫ້ວຍສະໝອງ, ເຂດນໍ້າປາ ເມືອງຊານໄຊ ແລະ ເຂດອື່ນໆ. 

ໃນນີ້ ແມ່ນກຳນົດເອົາທົ່ງພຽງ​ວຽງຈັນ, ບໍລິຄໍາໄຊ, ເຊ​ບັ້ງ​ໄຟ (ຄຳມ່ວນ), ​ເຊ​ບັ້ງ​ຫຽງ (ສະຫວັນ ນະເຂດ), ເຊໂດນ (ສາລະວັນ) ແລະ ທົ່ງພຽງຈໍາປາສັກ  ເປັນເຂດໂຄງການຈຸດສຸມປູກ​ເຂົ້າ ຊຶ່ງນອນໃນ ໂຄງການປູກເຂົ້າ ເພື່ອຄໍ້າປະກັນສະບຽງອາຫານລະດັບຊາດ ເພື່ອຮັບປະກັນຜົນຜະລິດບໍ່ຫຼຸດ 2,5 ລ້ານໂຕນ ເຂົ້າເປືອກ ຊຶ່ງລັດຖະບານໄດ້ກໍານົດເອົາ 10 ແຂວງ ທີ່ມີເງື່ອນໄຂ ແລະ ມີທ່າແຮງ ເປັນເຂດຈຸດສຸມ ການ ຜະລິດ ຄື: ແຂວງຫຼວງນໍ້າທາ, ບໍ່ແກ້ວ, ໄຊຍະບູລີ, ນະຄອນຫຼວງວຽງຈັນ, ແຂວງວຽງຈັນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ ແລະ ຈໍາປາສັກ ຊຶ່ງມີເນື້ອທີ່ນາທັງໝົດ ປະມານ 600.000 ຮຕ.

(2) ພືດ​ຜັກ​

ສຳລັບເຂດ​ພູດ​ອຍ ແລະ ພູພຽງ: ສຳລັບ​ພືດ​ຜັກ ​ເນັ້ນ​ໜັກ​ໃສ່ ພື້ນ​ທີ່​ໆມີ​ທ່າ​ແຮງ​ ​ແລະ ​ເໝາະ​ສົມ ທາງ​ດ້ານ​ນິ​ເວດ​ກະສິກໍາ ​ໂດຍ​ສະ​ເພາະ​ໃນ​ເຂດ​​ພື້ນ​ທີ່​​ຊານ​ເມືອງ ​ແລະ ​ເຂດພື້ນ​ທີ່​ປະຊາຊົນທີ່​ມີ​ມູນ​ເຊື້ອ​ໃນ​ການ​ປູກ​ຜັກ, ເປັນ​ຕົ້ນ​ເມືອງພູ​ຄູນ ແຂວງຫຼວງພະ​ບາງ, ​ເມືອງຄຳ, ​ເມືອງ​ຄູນ, ​ເມືອງ​ແປກ ​ແລະ ​ເມືອງ​ທ່າ​ໂທມ ແຂວງຊຽງ​ຂວາງ, ​ເມືອງສິງ ແຂວງຫຼວງ​ນໍ້າ​ທາ ແລະ ​ເມືອງ​ອື່ນໆ​ ທີ່​ມີ​ທ່າ​ແຮງ ເພື່ອ​ສະໜອງ​ເຂົ້າ​ສູ່​ຕົວ​ເມືອງ​ໃຫຍ່ ​ແລະ ​​ເນັ້ນ​ໃສ່ ການ​ປູກ​ຜັກ​ສວນຄົວແບບ​ປະສົມ​ປະສານ​ ໃນ​ເຂດ​ຫ່າງ​ໄກ​ສອກ​ຫຼີກ. ຜົນ​ຜະລິດປະມານ 900.000 ຫາ 1.200.000 ໂຕນ (ການຈັດ​ແບ່ງ​ສັດສ່ວນ 60/40 ພູ​ພຽງ ​ແລະ ທົ່ງພຽງ).

ສຳລັບເຂດ​ທົ່ງພຽງ: ພືດ​ຜັກ​ໃຫ້​ໄດ້ ຜົນ​ຜະລິດ 600.000 ຫາ 800.000 ໂຕນ, ​ເປັນ​ຕົ້ນ​​​ທົ່ງພຽງ​ວຽງ​ຈັນ ສຸມໃສ່: ເມືອງຫາດ​ຊາຍ​ຟອງ, ​ເມືອງ​ສີ​ໂຄດ​ຕະບອງ, ​ເມືອງ​ນາ​ຊາຍ​ທອງ, ​ເມືອງ​ທຸລະຄົມ ​ແລະ ອື່ນໆ, ທົ່ງພຽງ​ເຊ​ບັ້ງ​ໄຟ ສຸມໃສ່: ​ເມືອງ​ເຊ​ບັ້ງ​ໄຟ, ​ເມືອງ​ໜອງ​ບົກ, ​ເມືອງ​ທ່າ​ແຂກ, ທົ່ງພຽງ​ເຊ​ບັ້ງ​ຫຽງ ສຸມໃສ່: ​ເມືອງ​ໄຊ​ພູ​ທອງ, ​ເມືອງສອງ​ຄອນ, ​ເມືອງ​ຈຳ​ພອນ, ​ເມືອງ​ໄກສອນ ແລະ ທົ່ງພຽງຈຳປາ​ສັກ ແມ່ນ ສຸມໃສ່: ​ເມືອງ​ໂພນ​ທອງ, ​ເມືອງ​ຈຳປາ​ສັກ. ​ປະຕິບັດຕາມທິດທີ່ວ່າ: ສ້າງຊົນນະບົດ ໃຫ້ເປັນບ່ອນຜະລິດພືດ-ຜັກ ເພື່ອສະໜອງ ໃຫ້ແກ່ຕົວເມືອງ, ເຂດທ່ອງທ່ຽວ ແລະ ບັນດາໂຄງການພັດທະນາພື້ນຖານໂຄງລ່າງ ທີ່ມີ ແຮງງານຫຼາຍ; ຫຼີກເວັ້ນ ການນຳເອົາພືດ-ຜັກ ຈາກຕົວເມືອງ ສະໜອງໃຫ້ແກ່ຊົນນະບົດ.

(3) ພືດ​ຕະກູນຖົ່ວ

ສຳລັບເຂດ​ພູດ​ອຍ ແລະ ພູພຽງ: ສຳລັບຖົ່ວ​ດິນ ​ແລະ ຖົ່ວ​ເຫຼືອງ ​ແມ່ນສຸມໃສ່: ເມືອງຄອບ,  ປາກ​ລາຍ, ບໍ່​ແຕນ, ​ແກ່ນ​ທ້າວ ແຂວງໄຊ​ຍະ​ບູລີ ແລະ ເມືອງບາ​ຈຽງ​ຈະ​ເລີ​ນສຸກ ແຂວງຈຳປາ​ສັກ ເປັນສະບຽງ ອາຫານ 80.000 ​ໂຕນ, ​ເນື້ອ​ທີ່ 40.000 ຮຕ  ຫຼື  60% ຂອ​ງ​ການຜະລິດພືດຕະກຸນຖົ່ວ ໃນທົ່ວປະເທດ.

ສຳລັບເຂດ​ທົ່ງພຽງ: ​ໂດຍ​ສະ​ເພາະ ​ເຂດ​​ທົ່ງພຽງວຽງ​ຈັນ ສຸມໃສ່: ເມືອງທຸລະ​ຄົມ, ​​ໂພນ​ໂຮງ, ສັງ​ທອງ, ຫາດ​ຊາຍ​ຟອງ, ແຂວງບໍລິຄຳໄຊ ສຸມໃສ່: ເມືອງປາກຊັນ, ແຂວງຄຳມ່ວນ ສຸມໃສ່: ເມືອງທ່າແຂກ, ເມືອງໜອງບົກ, ແຂວງສະຫວັນນະເຂດ ສຸມໃສ່: ເມືອງໄກສອນພົມວິຫານ, ເມືອງຈຳພອນ, ສອງຄອນ, ​ແຂວງສາລະ​ວັນ ສຸມໃສ່: ​ເມືອງ​ເລົ່າງາມ, ສາລະ​ວັນ, ວາປີ, ແຂວງ​ຈຳປາ​ສັກ ສຸມໃສ່: ​ເມືອງ​ບາ​ຈຽງ ຊື່ງ ສ່ວນ​ໃຫຍ່ ​ແມ່ນຖົ່ວດິນ, ຖົ່ວ​ເຫຼື​ອງ ​ແລະ ​​ຖົ່ວຂຽວ ຊຶ່ງຄາດ​ວ່າ​ ມີ​ເນື້ອ​ທີ່​ປູກສະ​ເລ່ຍ​ແຕ່ລະ​ປີ ປະມານ 27.000-30.000 ​ເຮັກຕາ; ຄາດວ່າ​ຈະ​ໄດ້ຜົນ​ຜະລິດ ສະ​ເລ່ຍ​ແຕ່ລະ​ປີ ປະມານ 54.000-60.000 ​ໂຕນ.

(4) ​ໄມ້​ໃຫ້​ໝາກ

ສຳລັບເຂດ​ພູດ​ອຍ ແລະ ພູພຽງ: ລວມມີ ໝາກກ້ຽງ, ສຸມໃສ່ ເຂດ: ເມືອງນ້ຳ​ບາກ, ແຂວງຫຼວງ​ພະ​ບາງ; ເມືອງໄຊຍະບູລີ ແຂວງໄຊຍະບູລີ; ເມືອງກາສີ, ເມືອງວັງ​ວຽງ ແຂວງວຽງ​ຈັນ; ເມືອງປາກຊັນ ແຂວງບໍລິຄຳໄຊ; ເມືອງຫ້ວຍຊາຍ ແຂວງບໍ່ແກ້ວ; ສຳລັບໝາກຈອງ ສຸມໃສ່ ເມືອງຄຳ ແຂວງຊຽງຂວາງ, ເມືອງຫົວເມືອງ, ເມືອງຊຳເໜືອ ແຂວງຫົວພັນ. ນອກນັ້ນ ແມ່ນປະເພດໄມ້ໃຫ້ໝາກອື່ນໆ ແມ່ນສຸມໃສ່ເຂດ ທີ່ມີທ່າແຮງ ແລະ ມີມູນເຊື້ອ ແລະ ສຸມໃສ້ປະເພດໄມ້ໃຫ້ໝາກ ທີ່ເປັນເອກະລັກ ຂອງທ້ອງຖິ່ນ ໂດຍ​​ໃຫ້​ໄດ້ ຜົນ​ຜະລິດ ລວມທັງໝົດ 300.000 ຫາ 450.000 ​ໂຕນ ຫຼື ປະມານ 30% ຂອງຜົນຜະລິດ ໝາກໄມ້ລວມ ທົ່ວປະເທດ.

ສຳລັບເຂດ​ທົ່ງພຽງ: ໄມ້​ກິນ​ໝາກ ສຸມໃສ່ສົ່ງເສີມປູກໃນເຂດທີ່ມີທ່າແຮງເຊັ່ນ: ໝາກກວ້ຍ, ໝາກ​ນັດ ຢູ່ເຂດ ເມືອງປາກກະດິງ, ເມືອງຄໍາເກີດ ແຂວງບໍລິຄຳໄຊ, ສຳລັບໝາກຂຽບ, ໝາກພ້າວ, ໝາກເງາະ, ຖົ່ວລຽນ, ລຳໃຍ, ໝາກມ່ວງ ສຸມໃສ່ແຂວງສາລະວັນ ແລະ ຈຳປາສັກ. ນອກຈາກນັ້ນ ແມ່ນສຸມໃສ່ ໄມ້ໃຫ້ ໝາກປະເພດອື່ນໆ ໃນເຂດທີ່ມີເງື່ອນໄຂ ໃຫ້ໄດ້ ຜົນຜະລິດ ປະມານ 700.000 ຫາ 1.000.000 ໂຕນ ຫຼື ປະມານ 70% ຂອງຜົນຜະລິດໝາກໄມ້ລວມທົ່ວປະເທດ.