ການເກັບກ່ຽວອ້ອຍ

         ການເກັບກ່ຽວເປັນເລື່ອງສຳຄັນເລື່ອງໜຶ່ງໃນການເຮັດສວນອ້ອຍ ເພາະເປັນຂັ້ນຕອນສຸດ ທ້າຍທີ່ຈະໄດ້ຮັບຄ່າຕອບແທນ ຫລັງຈາກທີ່ໄດ້ລົງທຶນໄປ ໂດຍໃຊ້ເວລາມາເກືອບປີ.  ສິ່ງທຳອິດທີ່ ຈະຕ້ອງປະຕິບັດກ່ອນການເກັບກ່ຽວກໍ່ຄື: ການຕິດຕໍ່ກັບໂຮງງານ ເພື່ອຈະໄດ້ວາງແຜນໃຫ້ ເໝາະ ສົມໃນການເກັບກ່ຽວ, ເຊິ່ງຕ້ອງກຽມໃຫ້ພ້ອມທັງໂຮງງານ ແລະ ຊາວສວນເລີ່ມຕັ້ງແຕ່ການຄາດ ຄະເນປະລິມານອ້ອຍ, ເສັ້ນທາງຄົມມະນາຄົມ, ສຳຫລວດຄຸນນະພາບອ້ອຍ, ຈັດລຳດັບການຕັດ ອ້ອຍ, ການກຽມແຮງງານ, ກຽມເຄື່ອງມືຕັດອ້ອຍ, ເງິນທຶນ ຈາກນັ້ນຈຶ່ງເລີ່ມເກັບກ່ຽວ.

 ການເກັບກ່ຽວອ້ອຍ ຕ້ອງປະຕິບັດດັ່ງນີ້:

- ໃນເຂດທີ່ມີຊົນລະປະທານ ຕ້ອງຢຸດນ້ຳການໃຫ້ນ້ຳແກ່ອ້ອຍກ່ອນການເກັບກ່ຽວ ຢ່າງ ໜ້ອຍໜຶ່ງເດືອນ ເພື່ອຮັກສາຄວາມຫວານ.

-  ຕ້ອງເກັບກ່ຽວອ້ອຍທີ່ແກ່ເຕັມທ່ີ ດ້ວຍການສັງເກດເບິ່ງດອກ, ໃບມີສີເຟືອງແຫ້ງ ຫລື ສີເຟືອງແຫ້ງປົນຂຽວ.

-  ຄວນຕັດອ້ອຍເມື່ອມີອາຍຸ 10 ເດືອນຂຶ້ນໄປ ການຕັດ ຕ້ອງຕັດລຳຕົ້ນໃຫ້ຈຳດິນເພື່ອໃຫ້ ໜໍ່ທີ່ແຕກໃໝ່ແຂງແຮງ ແລະ ມີລຳຕົ້ນໃຫຍ່ດີ

-  ຫລັງຈາກຕັດແລ້ວ ຕ້ອງສົ່ງເຂົ້າໂຮງງານທັນທີ ຖ້າປະໄວ້ດົນຈະສູນເສຍນ້ຳໜັກ.

-  ດີແທ້ ຖ້າປູກອ້ອຍເປັນເສດຖະກິດ ກ່ອນເກັບກ່ຽວ ຄວນແທກຄວາມຫວານຂອງອ້ອຍ ໃຫ້ຫລາຍກ່ວາ 18% ຂຶ້ນໄປ.

 ວິທີການເກັບກ່ຽວອ້ອຍ ມີ 2 ວິທີຄື:

            - ການເກັບກ່ຽວດ້ວຍແຮງງານຄົນ: ສາມາດເຮັດໄດ້ຢ່າງປານີດເກັບກ່ຽວອ້ອຍໄດ້ທຸກສະ  ພາບຂອງພື້ນທີ່ ແລະ ທຸກສະພາບຂອງອ້ອຍ ບໍ່ວ່າຈະເປັນທີ່ຕ່ຳໆສູງໆ ຫລື ລົ້ມກໍ່ຕາມ. ນອກຈາກ ນີ້ ໃນຂະນະທີ່ຕັດ ກໍ່ສາມາດເລືອກສະເພາະອ້ອຍທີ່ມີຄຸນນະພາບດີ ພໍທີ່ຈະໄດ້ເຂົ້າອີ້ວໄດ້ເທົ່ານັ້ນ  ອ້ອຍທີ່ໄດ້ຈາກແຮງງານຄົນຈະສະອາດກວ່າຕັດດ້ວຍເຄື່ອງຈັກ.

            -  ການເກັບກ່ຽວດ້ວຍເຄື່ອງຈັກ: ການເກັບກ່ຽວອ້ອຍ ນອກຈາກຈະໃຊ້ແຮງງານຄົນແລ້ວ ອາດໃຊ້ລົດຕັດອ້ອຍຊະນິດຕັດທັງຕົ້ນ, ເຊິ່ງຕັດອ້ອຍທັງລຳ ແລະ ຕັດຍອດນຳ. ອ້ອຍທີ່ຕັດແລ້ວ ຈະຖືກວາງຮຽງກັນ, ຫລັງຈາກນັ້ນກໍ່ໃຊ້ຄົນແກະໃບອອກເຮັດຄວາມສະອາດ ແລ້ວ ມັດເປັນມັດໆ ເພື່ອສົ່ງຂຶ້ນລົດບັນທຸກ.