ການຈຳແນກຊັ້ນທາງວິທະຍາສາດ
ອານາຈັກ: Animalia (ເອນີມໍເລຍ)
ຊັ້ນ : Actinopterygii
ອັນດັບ : Synbranchiformes
ວົງ : Synbranchidae
ສະກຸນ : Monopterus
ສະປີຊີ : M. albus
ຊື້ທົ່ວໄປ: ອ່ຽນ (ພາສາລາວ), ປາໄຫລ (ພາສາໄທ)
ຊື່ພ້ອງ : Fluta alba (Zuiew, 1793)
ໃນການປະສົມພັນ ອ່ຽນ ຜູ້ລ້ຽງອາດຈະໃຊ້ວິທີການຮຽນແບບທຳມະຊາດເພາະການສິດຮໍໂມນປະສົມທຽມສາມາດເຮັດໃຫ້ປາວາງໄຂ່ໄດ້ ແຕ່ກ່ອນທີ່ຈະນຳພໍ່ແມ່ພັນອ່ຽນມາປ່ອຍເພື່ອປະສົມພັນຜູ້ລ້ຽງຈະຕ້ອງກຽມບໍ່ເພາະພັນໂດຍໃຊ້ເທັກນິກການກຽມໃຫ້ ຄ້າຍຄືກັບທຳມະຊາດຫຼາຍທີ່ສຸດ, ຊຶ່ງຜູ້ລ້ຽງສາມາດເພາະລ້ຽງໄດ້ທັງໃນຖັງໄຟເບີ, ບໍ່ດິນ, ບໍ່ຊີມັງ ແລະທໍ່ຊີເມັນກົມ ໂດຍຜູ້ລ້ຽງຈະ ຕ້ອງກຽມຄວາມພ້ອມດັ່ງນີ້:
ສະພາບລວມ:
ອ່ຽນ ຈັດເປັນປານໍ້າຈືດຊະນິດໜຶ່ງທີ່ອາໄສຢູ່ຕາມຄູ, ຄອງ, ໜອງ ແລະບຶງຕ່າງໆ, ທີ່ສາມາດພົບເຫັນໄດ້ທົ່ວທຸກພາກຂອງປະເທດອ່ຽນເປັນສັດນໍ້າທີ່ຄົນນິຍົມກັນບໍລິໂພກຫຼາຍເພາະມີລົດຊາດແຊບ, ສາມາດນຳມາປຸງແຕ່ງອາຫານໄດ້ຫຼາຍຮູບແບບປະຈຸບັນ ອ່ຽນຖືເປັນສັດທີ່ກຳລັງຫຼຸດໜ້ອຍຖອຍລົງໄປເລື້ອຍໆ ເນື່ອງຈາກມົນພາວະທາງນ້ຳເປັນພິດ, ແຕ່ຂະນະທີ່ຄວາມຕ້ອງການຂອງຕະຫຼາດມີປະລິມານເພີ່ມຂຶ້ນ, ດັ່ງນັ້ນ ການລ້ຽງອ່ຽນຈິ່ງເປັນອາຊີບທີ່ໜ້າສົນໃຈ ແລະສາມາດເພາະລ້ຽງເປັນສັດເສດຖະກິດໃນອະນາຄົດໄດ້.
ຂໍ້ແນະນຳໃນການກຳນົດວິທີລ້ຽງ:
ຖ້າເປັນຖັງໄຟເບີໃຫ້ໃສ່ດິນໜຽວລົງໃນຖັງໄຟເບີຂະໜາດ 2 ໂຕນ, ບໍ່ສູງ 1 ແມັດ ໂດຍໃຫ້ດິນ ຢູ່ໃນລັກສະນະແນວລາດອຽງສູງ 40 ຊັງຕີແມັດ, ຫຼັງຈາກນັ້ນ ຈິ່ງ ເຕີມນໍ້າລົງໄປປະມານ 30 ຊັງຕີ ໃຫ້ດິນໜຽວໂຜ່ຂຶ້ນມາເໜືອໜ້ານ້ຳເປັນແນວລາດອຽງ ປະມານ 10 ຊັງຕີ ແລ້ວຈິ່ງປູກພັນໄມ້ນໍ້າ ໃຫ້ຄືກັບທຳມະຊາດເຊັ່ນ: ກໍບົວ, ຈອກແໜ ແລະຜັກຕົບ.
ແຕ່ຖ້າເປັນບໍ່ດິນຄວນອັດພື້ນດິນໃຫ້ແໜ້ນ ແລະມີຂະໜາດ 200-400 ຕາແມັດ, ສ່ວນດ້ານເທິງຄວນປູກພືດນໍ້າສຳລັບເປັນ ທີ່ວາງໄຂ່ຂອງແມ່ອ່ຽນ ຈາກນັ້ນ ປ່ອຍພໍ່ພັນໃນສັດສ່ວນເພດຜູ້: ເພດແມ່ເທົ່າກັບ 1:3 ຕໍ່ພື້ນທີ່ 1 ຕາແມັດ, ອ່ຽນຈະວາງໄຂ່ໄດ້ພາຍ ໃນ 2-4 ເດືອນ ໂດຍເລີ່ມວາງໄຂ່ຕັ້ງເດືອນມີນາ-ເມສາ ເມື່ອລູກອ່ຽນຟັກອອກເປັນໂຕອ່ຽນ ຈະມີຄວາມຍາວປະມານ 2-3 ຊັງຕີ, ພຶດຕິກຳຂອງລູກອ່ຽນມັກ ຫຼົບລີ້ຢູ່ຕາມຮາກຫຍ້າຜູ້ລ້ຽງສາມາດຮວບຮວມ ແລະນຳໄປລ້ຽງຕໍ່ໄປ.
ສ່ວນບໍ່ຊີເມັນທີ່ເໝາະສົມແທ້ ແມ່ນຂະໜາດ 5x5x1 ແມັດ ໃສ່ດິນລົງໃນບໍ່ສູງ 30 ຊັງຕີ, ຈາກນັ້ນ ໃຫ້ໃສ່ນໍ້າໃຫ້ມີລະດັບສູງກວ່າ ໜ້າດິນປະມານ 10 ຊັງຕີ ແລະໃສ່ພືດນໍ້າຊະນິດຕ່າງໆ ເພື່ອໃຫ້ເປັນທີ່ຫຼົບລີ້ ແລະວາງໄຂ່, ຈາກນັ້ນ ຈິ່ງປ່ອຍພໍ່ແມ່ພັນໃນປະລິມານເພດຜູ້: ເພດແມ່ ເທົ່າກັບ 1:3 ຕໍ່ພື້ນທີ່ 1 ຕາແມັດ, ອ່ຽນຈະກໍ່ຫວອດ ຄ້າຍປາກັດ (ການພົ່ນຟອງອາກາດສຳລັບວາງໄຂ່) ຜູ້ລ້ຽງສາມາດຮວບຮວມລູກອ່ຽນໄດ້, ຫຼັງຈາກອ່ຽນກໍ່ຫວອດປະມານ 5 ວັນແລ້ວ ຈິ່ງນຳອ່ຽນໄປອະນຸບານຕໍ່ໃນຕູ້ແກ້ວ ຫຼື ໃນທໍ່ຊີເມັນກົມ, ສຳລັບທໍ່ຊີເມັນກົມທີ່ມີຂະໜາດ ເສັ້ນຜ່າສູນກາງ 1 ແມັດ ສາມາດ ປ່ອຍພໍ່ພັນ 1 ໂຕ ແລະແມ່ພັນ 3 ໂຕຕໍ່ 1 ທໍ່ ທີ່ໃສ່ດິນສູງປະມານ 30 ຊັງຕີແມັດ ໂດຍພໍ່ພັນ 1 ໂຕ ຈະສາມາດວາງໄຂ່ຕັ້ງແຕ່ 300-910 ໜ່ວຍ ຂຶ້ນຢູ່ກັບຂະໜາດຂອງແມ່ພັນ.
ໃນໄລຍະທຳອິດການຄັດແຍກເພດຂອງພໍ່ແມ່ພັນອ່ຽນຈະເຮັດໄດ້ຍາກຫຼາຍ ເພາະອ່ຽນມີລັກສະນະເພດທີ່ຄ້າຍໆກັນ, ຖ້າເບິ່ງຈາກ ລັກສະນະພາຍນອກຈະບໍ່ສາມາດແຍກເພດໃຫ້ເດັ່ນຊັດໄດ້ ໂດຍສະ ເພາະໃນໄລຍະລະດູທີ່ອ່ຽນບໍ່ມີ ການວາງໄຂ່, ແຕ່ຖ້າໃນໄລຍະວາງໄຂ່ຕັ້ງແຕ່ເດືອນພຶດສະພາ-ກໍລະກົດຈະສາມາດສັງເກດເພດ ຂອງອ່ຽນໄດ້ເດັ່ນຊັດຂຶ້ນເຊັ່ນ: ເພດເມຍຊ່ອງເພດມີສີແດງເຮື່ອໆ, ບວມ, ລຳຕົວມີສີເຫຼືອງເປັ່ງປັງ, ໃນໄລຍະປະສົມພັນ ແລະວາງໄຂ່ອ່ຽນ ຈະມີຂະໜາດຄວາມຍາວ 29-50 ຊັງຕີ ແລະມີນໍ້າໜັກຕົວ 70-200 ກຣາມ, ສ່ວນເພດຜູ້ຊ່ອງ ເພດຈະມີສີຂາວຊີດ, ບໍ່ບວມ, ສ່ວນລຳຕົວມີສີເຫຼືອງຄ້ຳໃນໄລຍະປະສົມພັນ ແລະວາງໄຂ່ອ່ຽນ ຈະມີຄວາມຍາວຕັ້ງແຕ່ 60 ຊັງ ຕີຂຶ້ນໄປ (ຖ້າອ່ຽນມີນໍ້າໜັກຫຼາຍກວ່າ 300 ກຣາມຂຶ້ນໄປສະແດງວ່າອ່ຽນມີນໍ້າເຊື້ອໃນການເພາະພັນດີ) ເມື່ອຄັດເລືອກພໍ່ແມ່ພັນ ອ່ຽນໄດ້ແລ້ວໃຫ້ຜູ້ລ້ຽງນຳມາປ່ອຍໃນບໍ່ເພາະພັນໃນສັດສ່ວນເພດຜູ້ 1=ເພດເມຍ 3 ຕໍ່ພື້ນທີ່ 1 ຕາແມັດ, ແຕ່ຖ້າເປັນທໍ່ຊີເມັນກົມ ຄວນປ່ອຍພໍ່ພັນ 1 ຕົວ ແລະແມ່ພັນ 3 ຕົວຕໍ່ 1 ທໍ່.
ວິທີການລ້ຽງ ແລະ ບົວລະບັດຮັກສາ
ເມື່ອປ່ອຍພໍ່ແມ່ພັນອ່ຽນລົງ ບໍ່ເພາະແລ້ວຜູ້ລ້ຽງຄວນລ້ຽງພໍ່ແມ່ພັນອ່ຽນ ໂດຍໃຫ້ອາຫານ ແລະເບິ່ງແຍງຄວາມສະອາດ, ປ່ຽນຖ່າຍນໍ້າ, ອາຫານທີ່ນຳມາ ໃຫ້ພໍ່ແມ່ພັນອ່ຽນຄວນເປັນພວກ ອາຫານປາສົດ ຫຼື ເປັດຕັດເປັນ ຕ່ອນພໍດີເໝາະກັບປາກຂອງອ່ຽນ ໃນປະລິມານຮ້ອຍລະ 2 ຕໍ່ນໍ້າໜັກຕົວ ໂດຍໃຫ້ວັນລະ 1 ຄັ້ງ ໃນຕອນແລງ, ເນື່ອງຈາກອ່ຽນມີອຸປະນີໄສມັກອອກຫາກິນໃນທີ່ມືດ ແລະສະພາບແວດລ້ອມງຽບສະຫງົບ, ການຖ່າຍນໍ້າໃນບໍ່ເພາະພັນຄວນເຮັດຢ່າງໜ້ອຍອາທິດລະ 1 ຄັ້ງ, ການລ້ຽງອ່ຽນຈະພົບວ່ານ້ຳຝົນເປັນສິ່ງກະຕຸ້ນໃຫ້ແມ່ພັນອ່ຽນວາງໄຂ່ໄດ້ເປັນຢ່າງດີ ແລະອ່ຽນມັກວາງໄຂ່ໃນໄລຍະເດືອນ ເມສາ-ມີຖຸນາ ຊຶ່ງເປັນໄລຍະໃກ້ໜ້າຝົນ, ແຕ່ໄລຍະທີ່ອ່ຽນໄຂ່ສຸກ ທີ່ສຸດຄື ເດືອນພືດສະພາ-ມີຖຸນາ ແລະຈະພົບໄຂ່ອ່ຽນທຸກຄັ້ງຫຼັງ ຈາກຝົນຕົກ ເມື່ອແມ່ອ່ຽນພ້ອມ ທີ່ຈະວາງໄຂ່ແລ້ວ ແມ່ອ່ຽນຈະກໍ່ຫວອດ ແລະວາງໄຂ່ ໂດຍໄຂ່ອ່ຽນ ຈະຕິດຢູ່ໃຕ້ຫວອດ ແລະກອງຢູ່ຕາມພື້ນ, ໄຂ່ອ່ຽນທີ່ອອກໃໝ່ໆມີຂະໜາດໃຫຍ່ປະມານ 3 ມິລິ ແມັດ, ສີເຫຼືອງທອງ, ເປືອກໄຂ່ ມີລັກສະນະແຂງ ແລະກົມ, ແມ່ ພັນອ່ຽນ 1 ໂຕ ສາມາດໃຫ້ໄຂ່ໄດ້ ບໍ່ເກີນ 2.000 ໜ່ວຍ, ລູກອ່ຽນ ທີ່ຟັກອອກມາໃໝ່ຈະມີຄວາມ ຍາວປະມານ 2 ຊັງຕີ, ໄຂ່ອ່ຽນບາງໜ່ວຍອາດຟັກອອກເປັນໂຕ ຫ່າງກັນດົນເຖິງ 6 ຊົ່ວໂມງ, ເນື່ອງຈາກແມ່ອ່ຽນອາດວາງໄຂ່ ບໍ່ພ້ອມກັນ ແລະໃນໄລຍະວາງໄຂ່ ແມ່ອ່ຽນຈະມີນິໄສດຸຮ້າຍຫຼາຍ.
ສ່ວນການອະນຸບານຄວນໃຊ້ວິທີອະນຸບານອ່ຽນໃນທໍ່ຊີເມັນກົມ ຂະໜາດເສັ້ນຜ່າສູນກາງ 1 ແມັດ ຫຼື ໃນຖົງພລາສຕິກ ຫຼື ຕູ້ແກ້ວ ແລະຄວນໃຫ້ນໍ້າໝູນວຽນຖ່າຍເທໄດ້ ຕະຫຼອດເວລາ, ມີພືດນໍ້າມັດລອຍ ເປັນກຳພ້ອມທັງໃສ່ດິນໃນບໍ່ອະນຸບານນຳ ໂດຍປ່ອຍລູກອ່ຽນໃນອັດຕາ 150-200 ໂຕຕໍ່ຕາແມັດ.
ສຳລັບອາຫານທີ່ໃຊ້ລ້ຽງລູກ ອ່ຽນໃນໄລຍະທຳອິດໃຫ້ໃຊ້ໄຮແດງ ຫຼື ປາບົດລະອຽດ ຫຼື ອາດຈະຝຶກໃຫ້ກິນອາຫານເມັດສຳລັບລ້ຽງປາດຸກກໍໄດ້ ໂດຍໃຫ້ອາຫານວັນລະ 2 ຄັ້ງ ເຊົ້າ ແລະແລງໃນອັດຕາຮ້ອຍລະ 10 ຕໍ່ນໍ້າໜັກຕົວຕໍ່ວັນເມື່ອອາຍຸຄົບ 1 ເດືອນ ລູກອ່ຽນ ຈະມີຄວາມຍາວປະມານ 2,5-5 ຊັງຕີ ແລະ ໄລຍະນີ້ລູກອ່ຽນຈະເລີ່ມມຸດລົງສູ່ພື້ນດິນ.
ຜູ້ລ້ຽງສາມາດລ້ຽງອ່ຽນໄດ້ ທັງໃນບໍ່ຊີເມັນຂະໜາດ 2×3 ແມັດ ແລະຂະໜາດ 5×10 ແມັດ ຫຼື ໃນທໍ່ຊີເມັນກົມເສັ້ນຜ່າສູນກາງ ຕັ້ງແຕ່ 1 ແມັດຂຶ້ນໄປ ໂດຍວາງ ຊ້ອນກັນ 2 ທໍ່, ສ່ວນພື້ນບໍ່ຕ້ອງເທຄອນກີດໜາ 2,5 ຊັງຕີ (1 ນີ້ວ) ພ້ອມຕິດຕັ້ງທໍ່ລະບາຍນໍ້າອອກ ແລະຝາບໍ່ດ້ານໃນຄວນສາບໃຫ້ມື່ນ, ຮອງພື້ນດ້ວຍກໍເຂົ້າສະລັບກັບຕົມ ແລະຢວກກ້ວຍຕັດລະ ອຽດໜາຊັ້ນລະ 10 ຊັງຕີ, ປະໄວ ປະມານ 2 ອາທິດ, ແລ້ວຈິ່ງນຳ ລູກອ່ຽນປ່ອຍລົງລ້ຽງ ໂດຍປ່ອຍລູກອ່ຽນທີ່ມີຂະໜາດ 12,5 ຊັງຕີ ໃນປະລິມານ 100 ຕົວຕໍ່ບໍ່ ຫຼື ປ່ອຍລູກອ່ຽນຈຳນວນ 3 ກິໂລຕໍ່ບໍ່, ຈາກນັ້ນ ຈິ່ງເສີມດ້ວຍການໃຫ້ອາຫານເມັດ, ປາສົດສັບລະອຽດ ຫຼື ຕົວອ່ອນ, ແມງນໍ້າ ແລະຄວນປ່ຽນຖ່າຍນໍ້າທຸກໆ 2 ອາທິດ, ໄລຍະເວລາທີ່ໃຊ້ໃນການລ້ຽງປະມານ 6-8 ເດືອນ ຈະໄດ້ອ່ຽນທີ່ມີຂະໜາດ 3-5 ໂຕຕໍ່ກິໂລ ແລະໃນ 1 ບໍ່ຈະໄດ້ຜົນຜະລິດປະມານ 20-30 ກິໂລ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ