ນິເວດໄມ້ສັກ

ນິເວດໄມ້ສັກ

ຊື່ພື້ນເມືອງ: ໄມ້ສັກ

ຊື່ວິທະຍາສາດ: Tectona grandis  Carl  Linnaeus (L.f.)

ຊື່ວົງຕະກຸນ: VERBENACEAE

ໄມ້ສັກ ແມ່ນເປັນປະເພດໄມ້ຢືນຕົ້ນທີ່ມີຂະໜາດກາງຫາໃຫຍ່ ຊຶ່ງມີຄວາມສູງປະມານ 20-30ແມັດ. ໜ້າຕ້າງໃຫຍ່ສຸດເກືອບຮອດ 3 ແມັດ ມີກິ່ງງ່າຫຼາຍ, ຮູບຮ່າງເຮືອນຍອດເປັນພຸ່ມ ບໍ່ມົນປານໃດ ຍາມມີໃບແມ່ນຈະມີເປັນຈຳນວນຫຼາຍ ແຕ່ມັກຈະຫຼົ່ນໃບໃນລະດູແລ້ງ. ມັກເກີດ ຢູ່ຕາມປ່າປະສົມ, ປ່າຫີນປູນຄວາມສູງຈາກໜ້ານ້ຳທະເລປະມານ 800 ແມັດ ແຕ່ຖ້າເປັນພື້ນ ທີ່ຮາບພຽງຈະເກີດຢູ່ບ່ອນທີ່ບໍ່ມີນ້ຳຖ້ວມຂັງ ສວ່ນຫຼາຍໄມ້ສັກມັກເກີດຢູ່ເປັນໝູ່. ໄມ້ສັກມັກດິນ ທີ່ມີຄວາມເປັນກາງ ແລະ ເປັນດ່າງເລັກໜ້ອຍ ເຊິ່ງມີຄ່າ Ph ລະຫວ່າງ 6,5 - 7,5. ປະລິມານ ນ້ຳຝົນຢູ່ໃນລະຫວ່າງ 1200 - 2000 ມມ / ປີ

ລັກສະນະຂອງເປືອກ

ເປືອກນອກ ແມ່ນມີຄວາມໜາປະມານ 0,30 - 1,70 ຊມ ເປືອກບໍ່ລຽບແຕກເປັນລັກສະນະຮອຍໄຖຕາມລວງຍາວຂອງເປືອກ ມີສີຂາວໝົ່ນເມື່ອເວລາຍັງນ້ອຍ ແຕ່ເມື່ອໃຫຍ່ຈະມີສີຂີ້ເທົ່າເຫຼືອງ

ລັກສະນະຂອງໃບ

ໃບສັກ ແມ່ນເປັນປະເພດໃບດຽວການຮຽງຕົວຂອງໃບ ແມ່ນຕັ້ງສາກກັນໃບໃຫຍ່ມີຄວາມກ້ວາງປະມານ 25 - 30 ຊມ, ຄວາມຍາວ 30 - 40 ຊມ ໃບມີຮູບຮ່າງລັກສະນະເປັນຮູບໄຂ່ຊຶ່ງກົກໃບຈະມີຂະໜາດໃຫຍ່ ແລະ ປາຍໃບຈະແຫຼມມີຂົນ

ລັກສະນະຂອງດອກ

ດອກຈະມີສີນວນຂາວເປັນຊໍ່ໃຫຍ່ ຫຼື ເປັນພົ້ວໃຫຍ່ເກີດຢູ່ ຕາມປາຍກິ່ງດອກ ມີເກສອນຜູ້ 6 ອັນ, ມີກີບດອກ ແລະ ກາບດອກຢ່າງລະ 6 ອັນ ມັກຈະອອກດອກພາຍໃນເດືອນມີນາ ຫາ ເມສາ

ລັກສະນະຂອງໝາກ

ເປັນປະເພດໝາກແຫ້ງບໍ່ແຕກ ແລະ ສ່ວນທີ່ເປັນກາບດອກ ຈະຫຸ້ມເອົາສ່ວນແກ່ນຢູ່ໃນຈະມີ 1 - 4 ແກ່ນ ໝາກຂ້ອນຂ້າງມົນ ຂະໜາດເສັ້ນຜ່າສູນກາງ 1 - 2 ຊມ ໝາກຈະແກ່ຢູ່ໃນລະຫວ່າງ ເດືອນກໍລະກົດ ຫາ ເດືອນທັນວາ

ລັກສະນະຂອງເນື້ອໄມ້

ມີສີເຫຼືອງທອງໄປຈົນເຖິງສີນ້ຳຕານແກ່ ມີລາຍເສັ້ນເປັນສີນ້ຳຕານແກ່ແຊກລຽນຊື່ ເນື້ອຫຍາບແຂງປານກາງ

ຄຸນປະໂຫຍດຂອງໄມ້ສັກ

ໄມ້ປະເພດນີ້ຈະໃຊ້ເຂົ້າໃນການກໍ່ສ້າງ ແລະ ແກະສະຫຼັກໃຊ້ເຂົ້າໃນການຜະລິດເຝີນິເຈີເຮັດເຄື່ອງເອ້ຍ້ອງ. ສ່ວນເນື້ອໄມ້ສາມາດນຳເຂົ້າໂຮງງານຜະລິດເຈ້ຍ