ຕັກແຕນ ເປັນແມງໄມ້ຊະນິດໜຶ່ງທີ່ມີປາກແບບກັດກິນພົບຕັ້ງແຕ່ໃນໄລຍະຕົວອ່ອນຈົນເຖິງຕົວເຕັມໄວ, ມີຕາຂະໜາດໃຫຍ່, ມີໜວດເປັນແບບເສັ້ນດ້າຍ, ປີກຄູ່ໜ້າຄືໜັງ ສ່ວນປີກຄູ່ຫຼັງບາງໃສ, ຢູ່ໃຕ້ປີກຄູ່ໜ້າມີຂາ 2 ຄູ່ ແລະ ຂາຄູ່ຫຼັງໄວ້ກະໂດດ, ສ່ວນການຈະເລີນ ແລະ ການປ່ຽນແປງຮູບຮ່າງແມ່ນຈະປ່ຽນແປງເທື່ອລະໜ້ອຍ, ຕົວອ່ອນຈະມີຂະໜາດຕົວນ້ອຍກວ່າໂຕເຕັມໄວ ແຕ່ຍັງບໍ່ມີປີກ ແລະ ຈະລອກຄາບ ຫຼື ຈະເລີນເຕີບໂຕໄປຈົນເປັນຕົວເຕັມໄວເມື່ອມີການລອກຄາບຄັ້ງສຸດທ້າຍ, ສ່ວນການວາງໄຂ່ມີລັກສະນະແຕກຕ່າງກັນອາດຈະເປັນໄຂ່ດຽວ ຫຼື ໄຂ່ກຸ່ມມີທັງວາງໃນດິນ ແລະ ໃນພືດອາຫານ.
ສະນັ້ນ, ຫາກໃຜມີຄວາມສົນໃຈຢາກລ້ຽງຕັກແຕນເພື່ອເປັນອາຊີບເສີມ ຫຼື ຈະເປັນອາຊີບຫຼັກກໍ່ສາມາດປະຕິບັດຕາມຂັ້ນຕອນດັ່ງນີ້ເຊັ່ນ:
ສະຖານທີ່
ຄວນເປັນບ່ອນຮົ່ມມີຫຼັງຄາກັນແດດ ແລະ ຝົນ, ມີແສງແດດສ່ອງໃນຍາມເຊົ້າ ຫຼື ຕອນບ່າຍ
ການລ້ຽງຕັກແຕນ
ສາມາດລ້ຽງໄດ້ສອງແບບຄື: ການລ້ຽງໃນກົງມຸ້ງນີລົງຂະໜາດກວ້າງ, ຍາວ ແລະ ສູງ ປະມານ 25X35X25 ຊັງຕີແມັດ, ຂັ້ນຕອນໃນການເຮັດແມ່ນໃຊ້ລວດຂະໜາດ 2 ຫຸນຕັດເປັນໂຄງສີ່ລ່ຽມແລ້ວປະກອບເຂົ້າກັນ, ຈາກນັ້ນໃຊ້ສາຍຢາງສີຂາວໃສຂະໜາດເສັ້ນຜ່າສູນກາງ 1 ຊັງຕີແມັດ ແລະ ສາມາດຖອດເຂົ້າອອກໄດ້, ມີຜ້າມຸ້ງຂາວບາງຫຸ້ມບໍລິເວນປາກປະຕູໄວ້ ເພື່ອບໍ່ໃຫ້ຕັກແຕນດີດອອກໃນເວລາປິດເປີດ, ຈາກນັ້ນວາງກົງລວດໃນຖາດເພື່ອຄວາມສະດວກໃນການຍົກ, ສ່ວນດ້ານພື້ນຂອງກົງຈະຕ້ອງປູດ້ວຍເຈ້ຍກະດາດ ແລະ ຈະປ່ຽນກະດາດທຸກວັນເພື່ອບໍ່ໃຫ້ຂີ້ສະສົມ, ໃນກົງຈະມີກະບອກນ້ຳ ໂດຍໃຊ້ກະຕຸກນ້ຳຂະຫນາດ 1-1,5 ລິດ ທີ່ຕັດຄໍອອກ ສຳລັບໃສ່ຕົ້ນກາລົດໄວ້ເປັນອາຫານຂອງຕັກແຕນ, ຄວນລ້າງ ແລະ ເຮັດຄວາມສະອາດກະບອກນ້ຳທຸກມື້ໃນເວລາປ່ຽນອາຫານ, ສ່ວນອາຫານເສີມຂອງຕັກແຕນແມ່ນຈະໃຊ້ຮຳເຂົ້າ, ສາລີໃສ່ຈານຢາງນ້ອຍໆ, ສ່ວນກົງລ້ຽງຕັກແຕນໄວອ່ອນຂະໜາດໃຫຍ່ຄືໄວ 1 ຫາໄວ 5 ຈະໄດ້ປະມານ 300 ຕົວ, ຢ່າງໃດກໍ່ຕາມເຮົາສາມາດລ້ຽງຕັກແຕນຈົນເປັນຕົວເຕັມໄວໃນກົງດັ່ງກ່າວ, ສ່ວນຊັ້ນເທິງສາມາດວາງກົງ ເພື່ອປະຢັດເນື້ອທີ່ ເມື່ອຕັກແຕນເຂົ້າໄວ 5 ຫຼື ເມື່ອອາຍຸປະມານ 1 ເດືອນໃຫ້ຫຼຸດຈຳນວນຕົວລົງເຄິ່ງໜຶ່ງເພື່ອບໍ່ໃຫ້ແອອັດເກີນໄປ.
ແມ່ນລ້ຽງໃນກົງມຸ້ງລວດ ເຊິ່ງຈະເຮັດໂຄງເປັນອະລູມິນຽມຂະໜາດກວ້າງ, ຍາວ ແລະ ສູງ ປະມານ 60X60X100 ຊັງຕີແມັດ, ຂາກົງສູງປະມານ 15 ຊັງຕີແມັດ, ອ້ອມກົງດ້ວຍມຸ້ງລວດ, ສ່ວນປະຕູດ້ານໜ້າມີ 2 ຊັ້ນຄື: ຊັ້ນເທິງເຮັດເປັນປະຕູປູລວດມີຫູຈັບ ແລະ ຊັ້ນລຸ່ມເປັນປະຕູທຶບເພື່ອປ້ອງກັນບໍ່ໃຫ້ຕັກແຕນອອກຂະນະເປີດປິດ, ສ່ວນພື້ນກົງປູດ້ວຍລວດຕາຂ່າຍ ແລະ ມີລີ້ນຊັກສູງ 10 ຊັງຕີແມັດ ສາມາດຖອດເຂົ້າອອກໄດ້ເພື່ອຮອງຮັບຂີ້ຂອງຕັກແຕນ ແລະ ງ່າຍຕໍ່ການດຶງອອກມາເຮັດຄວາມສະອາດ, ສ່ວນດ້ານເທິງຂອງກົງສາມາດຖອດບານມຸ້ງລວດອອກໄດ້ ແລະ ກະບອກໃສ່ນ້ຳ, ອາຫານ ແລະ ພາຊະນະໃສ່ອາຫານເສີມຄືກັບທີ່ເວົ້າມາເບື້ອງຕົ້ນ, ກົງມຸ້ງລວດນີ້ສາມາດໃຊ້ລ້ຽງຕັກແຕນຕັ້ງແຕ່ໄວ 5 ຂຶ້ນໄປ ເຊິ່ງຈະໃຊ້ປະມານ 2.000-2.500 ຕົວ ໂດຍຕອນທຳອິດອາດຈະລ້ຽງຕັກແຕນໄວອ່ອນໃນກົງມຸ້ງນີລົງ.
ຄວນປ່ຽນຕົ້ນກາລົດທຸກວັນ ໂດຍການເຄາະຕົ້ນພືດໃນກະບອກນ້ຳເພື່ອໄລ່ຕັກແຕນອອກ ໃຊ້ຕົ້ນກາລົດສົດເພື່ອໃຫ້ຕັກແຕນກິນໄດ້ຫລາຍຂຶ້ນ ຫລັງຈາກໄວ 5 ຕ້ອງໃຫ້ອາຫານວັນລະ 2 ຄັ້ງ ແລະ ອາຫານເສີມຄວນໃຫ້ຮຳເຂົ້າ, ສາລີວັນລະເທື່ອ, ສ່ວນການໃຫ້ນ້ຳແມ່ນໃຊ້ຈານດິນ ແລະ ເອົາກ້ອນຫີນກັນບໍ່ໃຫ້ຕັກແຕນຕົກນ້ຳ, ສ່ວນການເຮັດຄວາມສະອາດກົງຕັກແຕນ ສະເພາະການຖ່າຍຂີ້ຕັກແຕນໃນກົງມຸ້ງນີລົງ ແລະ ການປ່ຽນເຈ້ຍທີ່ປູພື້ນກົງທຸກມື້ ສ່ວນໃນກົງມຸ້ງລວດແມ່ນດຶງລີ້ນຊັກທີ່ຮອງຮັບຂີ້ອອກມາລ້າງທຸກວັນ, ພ້ອມທັງລ້າງເຮັດຄວາມສະອາດກະບອກທີ່ໃສ່ຕົ້ນພືດ ແລະ ຈານໃສ່ນ້ຳທຸກວັນ.
ຕັກແຕນ ເປັນສັດຊະນິດຫນຶ່ງທີ່ມີມົດເປັນສັດຕູຕົວຫລັກ ທີ່ຈະເຂົ້າມາກິນໄຂ່ ແລະ ຊາກຕັກແຕນ ຫຼື ຕົວທີ່ລອກຄາບໃໝ່ໆ ເຊິ່ງຍັງບໍ່ແຂງແຮງ, ການປ້ອງກັນໂດຍໃຊ້ຢາກັນມົດ ແລະ ການເຮັດຄວາມສະອາດຖ້າເປັນກົງມຸ້ງລວດລະວັງບໍ່ໃຫ້ມີເສດຫຍ້າຕົກເຮ່ຍພາດເຖິງພື້ນອັນຈະເປັນສາຍເຊື່ອມຕໍ່ໃຫ້ມົດເຂົ້າໄປໃນກົງ, ນອກນັ້ນຍັງມີແມງມຸມ, ບົ້ງ, ນົກ ແລະ ໜູທີ່ເປັນສັດຕູຂອງຕັກແຕນນຳອີກ.
ການເລືອກພໍ່ ແລະ ແມ່ພັນ
ໃນການຂະຫຍາຍພັນ ຄວນເລືອກຕົວທີ່ມີຂະໜາດໃຫຍ່, ມີຄວາມສົມບູນແຂງແຮງ, ຈາກນັ້ນໃຫ້ນຳເອົາພໍ່-ແມ່ພັນໃສ່ກົງໃຫ້ປະສົມພັນ ແລະ ໃຫ້ມີການປະສົມພັນຂ້າມກົງເພື່ອຫຼີກເວັ້ນການເສື່ອມຖອຍອັນເກີດຈາກປະສົມເລືອດຊິດ, ພາຊະນະວາງໄຂ່ໃຊ້ຕຸກນ້ຳອັດລົມຂະໜາດ 1,25 ລິດ ໃຫ້ຕັດເອົາແຕ່ກົ້ນຕຸກທີ່ມີຄວາມສູງ 10 ຊັງຕີແມັດ, ໃສ່ດິນລ້ວນປົນຊາຍ ແລ້ວໃຫ້ນ້ຳພໍຊຸ່ມໆ ເມື່ອຕັກແຕນວາງໄຂ່ນຳຕຸກດິນທີ່ມີໄຂ່ແຍກອອກມາ ຕັກແຕນມີການປະສົມ 9-15 ຄັ້ງ ແລະ ວາງໄຂ່ 3-4 ຄັ້ງ.
ການລ້ຽງຕັກແຕນໄວອ່ອນ ແລະ ຫຼັງໄວອ່ອນຄື
ໄວ1 ຫາຕົ້ນໄວ 5 ໃນກົງມຸ້ງນີລົງ ໃຊ້ເວລາປະມານ 35 ວັນ ເມື່ອເຂົ້າໄວ 5 ເຊິ່ງຈະສັງເກດຈາກແຜ່ນອານມ້າທີ່ສັນຫລັງແຫລມເປັນຮູບຕົວ V, ມີສີເຫຼືອງອ່ອນ ຫຼື ສີນ້ຳເງິນຄາດໜ້າແຖບສີມີຈຸດດຳລຽງເປັນແນວ ແລ້ວຖ້າຈະລ້ຽງໃນມຸ້ງນີລົງຕໍ່ໄປຈະຕ້ອງຫຼຸດຈຳນວນລົງເຫຼືອພຽງເຄິ່ງດຽວ ຈາກທີ່ລ້ຽງໃນຕອນທຳອິດ ຫຼື ຈະຍ້າຍເຂົ້າມາກົງມຸ້ງລວດລ້ຽງຕໍ່ໄປອີກປະມານ 17-26 ວັນ ຕັກແຕນຈະລອກຄາບເປັນຕົວເຕັມໄວ, ຕົວອ່ອນເພດຜູ່ມີ 6 ໄວ ແລະໃຊ້ເວລາໜ້ອຍກວ່າເພດເມຍປະມານ 53 ວັນ, ສ່ວນຕົວອ່ອນເພດເມຍມີ 7 ໄວ ຈະໃຊ້ເວລາ 61,8 ວັນ ຈິ່ງຈະເຕີບໂຕເຕັມໄວໄດ້.
ເກັບຕັກແຕນອອກຈຳໜ່າຍເມື່ອຕຸ່ມປີກຂອງຕົວອ່ອນໃຫຍ່ມາຕຳກັນທີ່ບໍລິເວນສັນຫຼັງກາງລຳຕົວຍາວຄຸມເຖິງສ່ວນທ້ອງປ້ອງທີ 3 ສະແດງວ່າເປັນໄວສຸດທ້າຍກ່ອນລອກຄາບອອກເປັນຕົວເຕັມໄວ ເມື່ອເປັນຕົວເຕັມໄວໃຫ້ເກັບຕັກແຕນໃສ່ຖົງ, ສ່ວນການເກັບຕັກແຕນໃຫ້ຈັບຂາຄູ່ຫຼັງສຸດເຂົ້າກັນ ເນື່ອງຈາກເມື່ອຕັກແຕນຖືກລົບກວນມັນຈະປ້ອງກັນຕົວ ໂດຍດີດຂາຄູ່ຫຼັງທີ່ມີໜາມລຽງເປັນແຖວເຮັດໃຫ້ເຈັບປວດໄດ້.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ