ການ​ສະໜອງ​ພືດ​ຜັກ ​ເຂົ້າ​ສູ່​ນະຄອນຫຼວງ​ວຽງ​ຈັນ

    ຄື​ດັ່ງ​ທີ່ຮູ້​ນຳ​ກັນ​ແລ້ວ​ວ່າ ນະຄອນ​ຫຼວງ​ວຽງ​ຈັນ ​ແມ່ນ​ເປັນ​ຈຸດ​​ໃຈກາງທາງ​ດ້ານ​ເສດຖະ ກິດຂອງ​ປະ​ເທດ, ມີ​ເສັ້ນທາງ​ຈາລະ​ຈອນສິນຄ້າ​ຫຼາຍ​ເສັ້ນຕັດ​​ຜ່ານຫຼາຍ​ເສັ້ນ, ມີ​ດ່ານ​ສາກົນ, ດ່ານ​ປະ​ເພ​ນີ ​ແລະ ດ່ານ​ທ້ອງ​ຖີ່​ນຕິດ​ກັບ​ປະ​ເທດ​ເພື່ອນ​ບ້ານ​ຫຼາຍ​ແຫ່ງ ສະ​ນັ້ນ​ປະລິມານການ​ສະໜອງພືດ​ຜັກ​ເຂົ້າ​ສູ່​ນະຄອນຫຼວງ ​ຈິ່ງ​ມີ​ຫຼາຍ​ຊ່ອງ​ທາງທີ່ແຕກ​ຕ່າງ​ກັນດັ່ງ​ນີ້:

1.1      ການ​ຜະລິດ​ເອງ​ຂອງ​ຊາວ​ນະ​ຫຼວງ​ວຽງ​ຈັນ

​    ຊາວ​ນະຄອນຫຼວງ​ວຽງ​ຈັນ ທີ່​ມີ​ມູນ​ເຊື້ອດຸ​ໝັ່ນ ​ແລະ ມີ​ຄວາມຊິນ​ເຄີຍ​ກັບ​ການປູກພືດ​ຜັກ​ມາ​ເປັນ​ເວລາ​ຍາວ​ນານ ທີ່​ພົ້ນ​ເດັ່ນ​ແມ່ນ ​ເມືອງ​ຫາດ​ຊາຍ​ຟອງ ປະມານ 29.8% ທີ່​ໄດ້​ສະໜອງ​ຜົນ​ຜະລິດ​ໃຫ້​​ແກ່​ສັງຄົມ, ​​ເມືອງ​​ໄຊທານີ ປະມານ 27.9%, ​ເມືອງ​ສີ​ໂຄດ​ຕະບອງ 14.5%, ​ເມືອງ​ນາ​ຊາຍ​ທອງ 11.2% ( ຮູບ 2); ​ເຂດ​ຊານ​ເມືອງ​ຂອງນະຄອນຫຼວງ​ວຽງ​ຈັນ​ເກືອ​ບວ່າ​ເໝາະ​ສົມກັບ​ການ​ປູກ​ພືດ​ຜັກ​ທຸກ​ຊະນິດ ​​ເຊັ່ນ​: ປະ​ເພດ​ຜັກ​ກິນ​​ໃບ(ຜັກສະຫັດ, ຜັກກາດ, ຫ້ອ​ມປ້ອມ, ຫ້ອມ​ບົ່ວ, ຜັກຊີ, ຜັກກາດຊອມ, ຜັກກາດ​ຂຽວ​ປີ, ບົວລະພາ, ຜັກ​ຫົມ, ຜັກ​ອີ່​ຕູ່, ຫອມລາບ, ຜັກ​ບົ້ງ, ຫອມລາບ, ກະ​ເພົາ...)  ຜັກ​ປະ​ເພ​ດ​ກິນ​ໝາກ (ໝາກ​ເຜັດ, ໝາກ​ເລັ່ນ, ໝາກ​ຖົ່ວ​ຝັກ​ຍາວ, ໝາກ​ເຂືອ​ຍາວ, ໝາກ​ແຕງ​; ຜັກ​ກິນ​ຫົວ (ຫົວຜັກ​ບົ່ວ, ຫົວ​ຜັກທຽມ, ຜັກກາດ​ຫົວ, ຂິງ, ຂ່າ....). ຈາກ​ບົດລາຍ​ງານປະ​ຈຳປີ 2013 ຂອງ​ພະ​ແນ​ກກະສິກຳ ​ແລະ ປ່າ​ໄມ້ ສະ​​ແດງ​ໃຫ້​ເຫັນ​ວ່າ: ທົ່ວນະຄອນຫຼວງວຽງ​ຈັນ ສາມາດ​ສະ​ໜອງ​ພືດ​ຜັກ​ໃຫ້​ແກ່​ສັງຄົ​ມ​ໄດ້​ທັງ​ໝົດ 82,463 ​ໂຕນ ຫຼື ສາມ​າດກຸ້ມ​ຕົນ​ເອງປະມານ 80% ຂອງ​ຄວາມ​ຕ້ອງການ​ຜັກ​ທັງ​ໝົດ.

1.2      ການ​ນຳ​ເຂົ້າ​-ສົ່ງ​ອອກ​ຕ່າງ​ແຂວງ ​ແລະ ຕ່າງປະ​ເທດ

    ນະຄອນຫຼວງ​ວຽງ​ຈັນ ນອກຈາກ​ຜົນ​ຜະລິດ​ພາຍ​ໃນຂອງ​ຕົນ​ແລ້ວ​ຍັງ​ໄດ້​ນຳ​ເຂົ້າພືດ​ຜັກ​ຈາກ​ຕ່າງແຂວງ ແລະ ຕ່າງປະ​ເທດ​ອິກຈຳນວນ​ໜື່ງ ​ໂດຍ​ສະ​ເພາະ​ຈາກ ​ແຂວງ​ຈຳປາ​ສັກ ເຊັ່ນ: ຜັກ​ກະ​ລໍ່າປິ, ຜັກກາດ​ຂາວ​ຫຍໍ່, ໜາ​ກຊູ, ມັນຝຼັງ; ຈາກ​​ແຂວງ​ສະຫວັນ​ນະ​ເຂດ, ສາລະ​ວັນ ໝາກອຶ, ໝາກ​ໂຕ່ນ; ຈາກ​ແຂວງ​ວຽງ​ຈັນ​ເຊັ່ນ​: ຜັກ​ກະ​ລໍ່າ, ໝາກ​ນາວ, ໝາກ​​ເຜັດ; ຈາກ​ແຂວງຫຼວງພະ​ບາງ ​ແລະ ຈາກ​ແຂວງ​ຊຽງ​ຂວາງ ໝາກ​ເຜັດ​ແຫ້ງ​, ຜັກທຽມ. ໃນປີ 2013 ການ​ຈາລະ​ຈອນ​ສິນຄ້າ​ຈາກ​ຕ່າງ​ແຂວງ​ເຂົ້າ​ສູ່​ນນະຄອນຫຼວງປະມານທັງ​ໝົດ​ປະມານ 12,000 ​ໂຕນ; ​ແລະ ພ້ອມ​ດຽວ​ກັນ​ນັ້ນ ກໍ່​ໄດ້​ນ​ນຳ​ເຂົ້າ​ພືດ​ຜັກ​ບາງ​ຊະນິດ ທີ່​ຊາວ​ກະສິກອນນະຄອນ​ຫຼວງວຽງ​ຈັນບໍ່​ນິຍົມ​ປູກຈາກ​ຕ່າງປະ​ເທດ ​ເຊັ່ນ: ຜັກ​ບົວຫົວ​ໃຫຍ່, ຫົວ​ຜັກທຽມ​ໃຫຍ່​, ຫົວກະ​ໂຫລດ, ໜາ​ກ​ເຜັດ​ແຫ້ງ ສິນ​ຄ້າ​ເລົ່າ​ນີ້ ສ່ວນ​ຫຼາຍ​ແມ່ນ​ນຳ​ເຂົ້າ​ຈາກ ປະ​ເທດວຽດນາມ, ປະ​ເທດ​ໄທ, ປະ​ເທດ​ຈິນ…​ໂດຍ​ຜ່ານ​ສາກົນຂົວ​ມິດຕະພາບ​ວຽງ​ຈັນ-​ໜອງ​ຄາຍ, ດ່ານ​ປະ​ເພນີໜອງ​ດາ, ດ່ານ​ປະ​ເພນີ​ບ້ານ​ໂຄກ​ແຮ່, ດ່ານ​ປະ​ເພນີ​ບ້ານ​ໂດນ ​ແລະ ດ່ານ​ທ້ອງ​ຖິ່ນບ້ານ​ທ່າ​ເດື່ອ ທັງ​ໝົດທຸກ​ດ່ານ​ປະມານ 8,000 ​ໂຕນ. ການ​ນຳ​ເຂົ້າ​ແມ່ນ​ຂື້ນ​ກັບ​​ຄວາມ​ຕ້ອງການ​ຂອງ​ຕະຫຼາດ​, ຂື້ນ​ກັບ​ລະດູ​ການ, ມີ​ເຫດການ​ພົ້ນ​ເດັ່ນ​ ​ແລະ ​ເທດສະການ​ຕ່າງໆ ທີ່​ເກີດ​ຂື້ນ​ຢູ່​ນະຄອນຫຼວງ​ວຽງ​ຈັນ.

​    ພ້ອມ​ດຽວ​ກັນ​ນັ້ນ​ນະຄອນຫຼວງ​ວຽງ​ຈັນ​ຍັງ​ມີ​ທ່າ​​ແຮງການ​ສົ່ງ​ພືດ​ຜັກ​ຕ່າງໆ ​ແລະ ຜັກ​ສະ​ອາດ​ອອກ​​ໄປ​ທາງ​ປະ​ເທດ​ເຊັ່ນ​ກັນ; ຈາກ​ບົດ​ລາຍ​ງານ ປະຈຳ​ປີ 2013 ຂອງ​ຂະ​ແໜງ​ປູກຝັງ​ນະ​ຄອນ​ຫຼວງ​ວຽງ​ຈັນ​ໃຫ້​ຮູ້​ວ່າ: ມີ 5 ບໍລິ​ສັດ​ທີ່​ມາ​ລົງທຶນ​ເຮັດ​ທຸລະ​ກິດ​ຜະລິດ​ພື​ດຜັກ​ເພື່ອສົ່ງ​ອອກ​ໄປ​ຕ່າງປະ​ເທດ, ສະນັ້ນ​ໃນ​ປີ​ນີ້ ລວມຜົນ​ຜະລິດ​ພຶດຜັກ​ສົ່ງ​ອອກ​​ເປັນ​ທາງ​ທັງ​ໝົດ ປະມານ 16 ​ໂຕນ ຄິດ​ເປັນ​ມູນ​ຄ່າ​ປະມານ 76,000 ​ໂດ​ລາ​ສະຫະລັດ ສ່ວນ​ໃຫຍ່​ແມ່ນ​ສົ່ງ​ໄປ​ປະ​ເທດ ຍີ່ປຸ່ນ, ອັງກິ​ດ, ​ເດັນ​ມາກ, ສະ​ວິດ​ຊະ​ແລນ..

    ຈາກບົດ​ລາຍ​ງານ ​ແລະ ​ການ​ສື​ກ​ເກັບ​ກຳ​ຂໍ້​ມູນ​ຂ້າງ​ເທິງ​ນັ້ນ ສາ​ມາດ​ເວົ້າ​ໄດ້​ວ່າ ພືດ​ຜັກ​ທີ່ນຳ​​ໃຊ້​ບໍລິ​​ໂພ​ກ ​ໃນ​ຂອບ​ເຂດ​ນະຄອນຫຼວງ​ວຽງ​ຈັນ ​ແມ່ນ​ມາ​ຈາກ 3 ​ແຫຼ່ງຕົ້ນຕໍສ່ວນ​​ໃຫຍ່​ເຊັ່ນ:​ ​ໄດ້​ມາ​ການ​ຜະລິດ​ຂອງ​ຊາວ​ກະສິກ​ອນ​ໃນ​ເຂດ​ນະຄອນຫຼວງ​ວຽງ​ຈັນ​ເອງ, ​ໄດ້​ມາ​ຈາກ​ການ​ຈາລະ​ຈອນ​​ຂອງແຂວງ​ຕ່າງ​ໆ​​ໃນ​ທົ່ວ​ປະ​ເທດ ​ແລະ ​ໄດ້​ມາ​ຈາກ​ນາ​ນຳ​​ເຂົ້າ​ຈາກ ຕ່າງປະ​ເທດ (ຮູບ 4 )