ເທັກໂນໂລຊີ ແລະ ວິທີການຕ່າງໆໃນການຜະລິດ ແລະ ຈຳໜ່າຍຜະລິດຕະພັນໂດຍທີ່ບໍ່ມີມົນລະພິດ ຫຼື ຂີ້ເຫຍື້ອທີ່ມີສານພິດແມ່ນຍັງມີຢູ່. ການຜະລິດທີ່ເປັນມິດແມ່ນການຜະລິດທີ່ສາມາດຊ່ວຍປ້ອງກັນສຸຂະພາບຂອງຄົນ ແລະ ສິ່ງແວດລ້ອມ.
ໄມ້, ນ້ຳ, ໄຟຟ້າ ແລະ ທາດເຄມີຈຳພວກສານຄຼໍຣີນ (chlorine) ແມ່ນຖືກນຳໃຊ້ເຂົ້າໃນການຜະລິດເຈັ້ຍ. ໂຮງງານຜະລິດເຈັ້ຍທີ່ເປັນມິດຕໍ່ກັບຄົນ ແລະ ສິ່ງແວດລ້ອມສາມາດຫຼຸດຜ່ອນມົນລະພິດດັ່ງຕໍ່ໄປນີ້:
- ສ່ວນຫຼາຍໃຫ້ນຳໃຊ້ເຈ້ຍທີ່ນຳເອົາມາໃຊ້ຄືນ ແລະ ຕົ້ນໄມ້ຈາກປ່າໄມ້ທີ່ຖືກຄຸ້ມຄອງແບບຍືນຍົງ.
- ນຳໃຊ້ແຫຼ່ງພະລັງງານທີ່ສາມາດທົດແທນໄດ້ ເຊັ່ນ: ພະລັງງານແສງອາທິດ ຫຼື ພະລັງ ງານລົມ ແທນພະລັງງານໄຟຟ້າ ທີ່ໄດ້ມາຈາກການເຜົາໄໝ້ເຊື້ອເພີງທຳມະຊາດ ເຊັ່ນ: ນ້ຳມັນ ຫຼື ຖ່ານຫີນ.
- ບໍ່ນຳໃຊ້ສານຄຼໍຣີນ ຫຼື ສານເຄມີທີ່ເປັນພິດອື່ນໆ.
- ໃຊ້ນ້ຳໜ້ອຍເທົ່າທີ່ເປັນໄປໄດ້. ນ້ຳຄວນຈະຖືກນຳມາໃຊ້ຄືນຫຼາຍໆຄັ້ງ ແລະ ຫຼັງຈາກນັ້ນປະສົມທາດເຄມີ ເພື່ອບຳບັດໃຫ້ສະອາດກ່ອນຈະປ່ອຍລົງສະພາບແວດລ້ອມຄືນ.
ໂຮງງານອຸດສະຫະກຳສ່ວນຫຼາຍສາມາດນຳໃຊ້ຂະບວນການຜະລິດທີ່ເປັນມິດຕໍ່ກັບຄົນແລະ ສິ່ງແວດລ້ອມ. ຄວາມຮ້ອນຈາກໂຮງງານສາມາດເອົາໄປນຳໃຊ້ຜະລິດກະແສໄຟຟ້າແລະ ສິ່ງເສດເຫຼືອຈາກຂະບວນການໜຶ່ງສາມາດເອົາໄປນຳໃຊ້ໃນຂະບວນການອື່ນ. ການ ຜະລິດທີ່ເປັນມິດຕໍ່ກັບຄົນ ແລະ ສິ່ງແວດລ້ອມສາມາດຫຼຸດຜ່ອນຂີ້ເຫຍື້ອຈົນເກືອບບໍ່ເຫຼືອຫຍັງເລີຍ. ການຜະລິດທີ່ເປັນມິດຕໍ່ກັບຄົນ ແລະ ສິ່ງແວດລ້ອມແມ່ນນຳໃຊ້ວັດຖຸ ແລະ ພະລັງງານຄືນໃໝ່ເຊິ່ງເປັນການປະຢັດຕົ້ນທຶນອີກດ້ວຍ.
ໂດຍປົກກະຕິແລ້ວບໍລິສັດຕ່າງໆ ຈະບໍ່ຈ່າຍຄ່າການກຳຈັດມົນລະພິດ ແລະ ປ້ອງກັນອັນຕະລາຍຈາກມົນລະພິດທີ່ເຂົາເຈົ້າກໍ່ຂຶ້ນ. ພວກເຂົາຕ້ອງຖືກບັງຄັບດ້ວຍການກົດດັນຈາກຊຸມຊົນ ຫຼື ຂໍ້ບັງຄັບຂອງລັດຖະບານເພື່ອປ່ຽນແປງວິທີການຜະລິດທີ່ເປັນມິດຕໍ່ກັບຄົນ ແລະ ສິ່ງແວດລ້ອມ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ