ປະຕິທິນລາວ ປີ 2021

 ປະຕິທິລາວ ປີ 2021

ອີງຕາມການຄຳນວນ ວັນ, ເວລາ ດວງດາວ ຕາມຕຳລາວິຊາຂອງວັດປ່າໂພນເພົາ ວະນາຣາມ ນະຄອນຫລວງພະບາງ ປະຈຳປີ​ ສະລູ-ຮ້ວງເປົ້າ-ຕີສົກ-ອາທະກາມາສ-ພ.ສ 2563-2564, ຈ.ສ 1382-1383, ຄສ 2021 ສາມາດສະຫລຸບໄດ້ດັ່ງນີ້: (ຮຽບຮຽງໂດຍ: ຄົນຮັກກະເສດ)

• ວັນສັງຂານລ່ວງ: ກົງກັບວັນພຸດ (ມື້ເຕົ່າສີ) ຂື້ນ 3ຄ່ຳ ເດືອນ 6 ພ.ສ 2536 ກົງກັບວັນທີ 14 ເມສາ ເວລາ 3ໂມງ 39ນາທີ 36ວິນາທີ
• ວັນສັງຂານເນົາ: ກົງກັບວັນພະຫັດ (ມື້ກຳໃສ້) ຂື້ນ 4ຄ່ຳ ເດືອນ 6 ພສ 2536 ກົງກັບວັນທີ 15 ເມສາ 2021
• ວັນສັງຂານຂື້ນ: ກົງກັບວັນສຸກ (ມື້ກາວສະງ້າ) ຂື້ນ 5 ຄ່ຳ ເດືອນ 6 ພສ 2536 ກົງກັບວັນທີ 16 ເມສາ 2021 ເວລາ 7:37ນາທີ 12 ວິນາທີ ປ່ຽນວັນຖະເຫລີງສົກປີໃຫມ່ລາວ ຈຸລສັກຮາຖມາເປັນ 1383

• ປີສະລູ-ຮ້ວງເຕົ້າ-ຕຣີສົກ ທາງຈັນທະຣະຄະຕິເປັນອະທິກະມາສ (8ສອງຫົນ) ປົກະຕິວານ, ປົກະຕິສຸຣະທິນ, ທາງສຸລິຍະຄະຕິເປັນປົກະຕິສຸລະທິນ 365 ເຫມືອນກັນ, ນາມນາງມະຫາສົງການ ນາງເທພພະທິດາທີ 4 ຊົງພະນາມວ່າ #ມົນທາເທວີ, ຊົງພະຫູຮັດທັດດອກຈຳປາແດງ ອາພອນປະດັບໄປດ້ວຍແກ້ວໄພທູນ (ແກ້ວສີຂຽວໃບໄມ້)ສະເຫວີຍ ນົມເນີຍ ເປັນພັກສາຫາຮ, ພະຫັຕຖຂວາ ຊົງຖືເຫລັກແຫລມ (ຫອກ)ພະຫັດຊາຍຊົງຖືໄມ້ເທົ້າ ສະເດັດໄສຍາສ(ນອນ) ຫລັບຕາມາເທິງຫລັງ ຄັທຣະພະ (ລາ) ເປັນພະຫະນະ

• ເກນພິຣຸນະສາດ: ພະເສົາເປັນອະທິບໍດີ, ນາກຫລີ້ນນ້ຳ 6ໂຕ ບັນດານໃຫ້ຝົນຕົກ 400ຫ່າ, ຕົກໃນຂອບເຂດຈັກກະວານ 160ຫ່າ, ຕົກໃນປ່າຫິມະພານ 120, ຕົກໃນມາຫາສະມຸດ 80ຫ່າ, ຕົກໃນມະນຸສໂລກ 40ຫ່າ
• ເກນທາຣາທິຄຸນ: ຕົກລາສີອາໂປ ນ້ຳຈະມາກ ຝົນຈະມີອຸດົມທຸກໆແຫ່ງ, ນາດອນນາລຸ່ມ ຈະດີທຸກແຫ່ງ, ຈະມີລົດພັດບາງຄັ້ງຄາວ ຈາກທິດທັງ 4 ຕາມລະດູການ
• ເກນທັນຍາຫາຮ: ຊື່ວ່າວິບັດ ເຂົ້າກຳໄຮນາ ຈະມີດ້ວງ ບົ້ງ ແມງກິນ ຖ້າບໍ່ກຽມໄວ້ແກ້ທັນ ຈະໄດ້ຮັບຜົນແຕ່ເຄີ່ງຫນື່ງ ແຕ່ເສຍໄປເຄິ່ງຫນຶ່ງ ປະຊາຊົນຈະໄດ້ຮັບຄວາມເດືອດຮ້ອນໃຈ ຢ່າງຫນັກ ຈາກພິກຂາໄພຕ່າງໆ ທຸກແຫ່ງຫົນກົນລະໂລກ
• ຜລາມັສມັງຍາຫານ: ຫມາກໄມ້ຈະບໍ່ສູ່ເປັນຫມາກດົກຫນາປານໃດ ຜົລໄມ້ຈະແພງ ຊິ້ນປາອາຫານຈະມີພໍສົມຄວນ
• ຣຸກຄະຊາດ: ໄມ້ອ້ອຍຊ້າງເປັນພະຍາ. ນ້ຳຈະຫລາຍ ນ້ຳຈະຖ້ວມ, ເຂົ້າດີ ພິກພູດີທຸກຢ່າງ
• ເກນກາລະໂຍກ: ວັນອາທິດເປັນທຸງໄຊ ວັນຈັນເປັນອະທິບໍດີວັນສຸກເປັນອຸບາດ ວັນພຸດເປັນໂລກາວິນາດ

ທີ່ມາຂໍ້ມູນ: ປະຕິທິນປີ 2021 ວັດປ່າໂພນເພົ້າ ວະນາຣາມ ນະຄອນຫລວງພະບາງ