ຜັກກູດອ້ອມ
Aglaomorpha coronans (Wall. ex Mett.) Copel.
POLYPODIACEAE
ລັກສະນະພືດສາດ: ເປັນຜັກກູດອີງອາໃສຂະໜາດໃຫຍ່, ລຳຕົ້ນເປັນເຫງົ້າໜາເກາະເລືອຕາມຕົ້ນໄມ້ອື່ນ.
ມີເກັດປົກຄຸມຢ່າງໜາແໜ້ນທົ່ວເຫງົ້າ, ເກັດໜາຕິດທົນເພື່ອປ້ອງກັນການສູນເສຍນໍ້າ, ຮູບໃບຫອກ, ສີນ້ຳຕານ,ຍາວປະມານ 1.5 ຊມ; ເຫງົ້າຍັງມີຂົນສີນ້ຳຕານອົມແດງປົກຄຸມຢູ່ຢ່າງໜາແໜ້ນ. ໃບດ່ຽວ,
ກ້ານໃບສັ້ນໆຫຼື ບໍ່ມີກ້ານ, ແຜ່ນໃບຮູບຮີແກມຮູບຂອບຂະໜານ, ຍາວປະມານ 1 ມ, ກ້ວາງ 60 ຊມ, ຖານໃບກົມ ຫຼືວ້ຳເປັນຮູບຫົວໃຈ, ຂອບໃບຫຍັກເລີກແບບຂົນນົກເກືອບເຖິງເສັ້ນກ່າງກາງໃບ,
ເສັ້ນໃບນູນຂຶ້ນທັງສອງດ້ານຂອງແຜ່ນໃບ,
ຜິວໃບໜາຄ້າຍໜັງ, ບໍ່ມີຂົນ, ກົກໃບເປັນແຜ່ນຂະຫຍາຍອອກປົກຄຸ້ມບໍລິເວນລຳຕົ້ນເອົາໄວ້.ກຸ່ມອັບສະປໍກົມສີນໍ້າຕານ,
ລຽງກັນເປັນແຖວດ່ຽວ ຫຼື ຄູ່ໃນແຕ່ລະຂ້າງຂອງເສັ້ນກ່າງໃບຍ່ອຍ.
ປິ່ນປົວພະຍາດ:
ຕານເຕັ້ນ ຫຼື ແຕນວຽນ
ສ່ວນທີ່ໃຊ້: ເຫງົ້າ
ວິທີການນຳໃຊ້: ນຳເອົາເຫງົ້າກູດອ້ອມມາລ້າງນ້ຳໃຫ້ສະອາດແລ້ວຝົນທາບໍລິເວນທີ່ເປັນຕຸ່ມຕານເຕັ້ນ ຫຼື
ແຕນວຽນ.
ການປູກຂະຫຍາຍພັນ: ກູດອ້ອມສາມາດນຳມາປູກຕິດໃສ່ຕົ້ນໄມ້ ຫຼື ປູກໃສ່ກະໂຖໂດຍໃຊ້ເປືອກໄມ້ ແລະ
ເສດໃບໄມ້, ກູດອ້ອມສາມາດຂະຫຍາຍພັນດ້ວຍສະປໍ
ຫຼື ແຍກເຫງົ້າ.
No comments:
Post a Comment
ສະແດງຄວາມຄິດເຫັນ ຫລື ຄຳຂອບໃຈ ເພື່ອເປັນກຳລັງໃຈໃຫ້ຄົນຂຽນ