ກາ​ນກໍານົດເປົ້າໝາຍ ແລະ ຄາດໝາຍສູ້ຊົນຮອດປີ 2025

ກາ​ນກໍານົດເປົ້າໝາຍ ແລະ ຄາດໝາຍສູ້ຊົນຮອດປີ 2025

ເປົ້າໝາຍ (ແຜນງານ) ທີ 1: ການຜະລິດສະບຽງ

ສືບຕໍ່ຮັບປະກັນ​ດ້ານ​ໂພຊະ​ນາ​ການ​ຂອງ​ປະຊາຊົນ​​ໃຫ້ໄດ້​ຮັບພະລັງງານ ບໍ່ຕໍ່າກວ່າ 2.600 ກິໂລກາ ລໍຣີຕໍ່ຄົນຕໍ່ວັນ, ໃນນີ້ ເຂົ້າ ແລະ ທາດແປ້ງ ກວມປະມານ 54%, ຊີ້ນ, ໄຂ່ ແລະ ປາ ປະມານ 13%, ປະເພດ ພືດຜັກ, ໝາກໄມ້ ແລະ ປະເພດຖົ່ວ ກວມປະມານ 8% ແລະ ປະເພດ ໄຂມັນ/ນໍ້າມັນ, ນ້ຳຕານ ແລະ ນໍ້ານົມ ກວມປະມານ 25% ໂດຍຕ້ອງຮັບປະກັນດ້ານ ສະບຽງອາຫານ ແຕ່ລະປະເພດ ເພື່ອບໍລິໂພກ ໃນແຕ່ລະປີ ໃຫ້ໄດ້ ຢ່າງໜ້ອຍ ຄືດັ່ງລາຍລະອຽດລຸ່ມນີ້ [1]:

-        ​​ເຂົ້າສານ​ 140 ກິ​ໂລ/ຄົນ/ປີ (ຫຼື ເທົ່າກັບປະມານ 234 ກິ​ໂລ​ເຂົ້າ​ເປືອກ/ຄົນ/ປີ).

-        ທາດແປ້ງ 4,5 ກິໂລ/ຄົນ/ປີ.

-        ປະເພດຊີ້ນ, ປາ ແລະ ໄຂ່ 79 ກິໂລ/ຄົນ/ປີ; ໃນນີ້ເປັນຊີ້ນໝູ 18 ກິໂລ/ຄົນ/ປີ, ຊີ້ນສັດປີກ 10 ກິໂລ/ຄົນ/ປີ, ຊີ້ນອື່ນໆ 10 ກິໂລ/ຄົນ/ປີ, ໄຂ່ 8 ກິໂລ/ຄົນ/ປີ ແລະ ປາ 33 ກິໂລ/ຄົນ/ປີ.

-        ພືດ​ຜັກ 80 ກິ​ໂລ/ຄົນ/ປີ.

-        ປະ​ເພດ​ຖົ່ວ-ງາ (ແຫ້ງ) 2 ກິ​ໂລ/ຄົນ/ປີ.

-        ສາລີ 2 ກິໂລ/ຄົນ/ປີ.

-        ປະເພດ ພືດເປັນຫົວ (ເຜືອກ, ມັນ ຕ່າງໆ...) 2,1 ກິໂລ/ຄົນ/ປີ.

-        ໝາກ​ໄມ້ 40 ກິ​ໂລ/ຄົນ/ປີ.

-        ນ້ຳ​ຕານ 1,5 ກິ​ໂລ/ຄົນ/ປີ.

-        ນ້ຳນົມ  5 ກິໂລ/ຄົນ/ປີ.

-        ປະເພດໄຂມັນ/ນໍ້າມັນ 25 ກິ​ໂລ/ຄົນ/ປີ.

​​

ຕ້ອງສູ້ຊົນຜະລິດ​ ​ແລະ ສະໜອງ ເຂົ້າ, ພືດ​ຜັກ, ປະ​ເພດຖົ່ວ-ງາ, ໝາກ​ໄມ້, ນ້ຳ​ຕານ, ຊີ້ນ-​ປາ ​ແລະ ​ໄຂ່ ໃຫ້ພຽງພໍ ແລະ ມີສ່ວນແຮໄວ້ ຊຶ່ງຕ້ອງ​ໄດ້ເອົາໃຈໃສ່ ການ​ຜະລິດ​ສະບຽງ​ທີ່​ສຳຄັນ​ ດັ່ງ​ນີ້:

1) ສູ້​ຊົນຜະລິດ​ເຂົ້າ​ເປືອກລວມ ບໍ່ໃຫ້ຫຼຸດ 5 ລ້ານ​ໂຕນ, ຕາມອັດຕາສ່ວນ ​​ເຂົ້າໜຽວ 70% ​ແລະ ເຂົ້າຈ້າວ 30%, ​ ຊຶ່ງປະກອບ​ມີລາຍ ລະອຽດ ຄື:

·      ​ເຂົ້າສໍາລັບຄໍ້າປະກັນສະບຽງອາຫານ ປະມານ 2,5 ລ້ານໂຕນ (ເຂົ້າເປືອກ) ຊຶ່ງປະກອບມີ:

-        ເຂົ້າ​ບໍລິ​ໂພ​ກປະມານ 2,1 ລ້ານ​ໂຕນ (9 ລ້ານ​ຄົນ X 234 ກິ​ໂລ​ເຂົ້າ​ເປືອກ/ຄົນ/ປີ)​​.

-        ຄັງ​ແຮ​ເຂົ້າປະມານ 400.000ໂຕນ (​ເຂົ້າ​​ສານ 240.000 ​ໂຕນ; ກຸ້ມໄດ້ປະມານ 2-3 ເດືອນ).

-        ແນວ​ພັນ​ເຂົ້າປະມານ 100.000 ​ໂຕນ.

·      ສຳ​ລັບ​​ປຸງ​ແຕ່ງ​ພາຍ​ໃນປະມານ 500.000 ຫາ 600.000 ໂຕນ.

·      ​ເຂົ້າເປັນສິນຄ້າພາຍໃນ ແລະ ​ສົ່ງ​ອອກບໍ່ໃຫ້ຫຼຸດ 1,5 ລ້ານ​ໂຕນ.

2) ຜົນ​ຜະລິດພືດຜັກ, ຖົ່ວ-ງາ ແລະ ໝາກໄມ້ ​ສຳລັບ​ບໍລິ​ໂພ​ກ​ເຊັ່ນ: ສາລີຫວານ ໃຫ້ໄດ້ ປະມານ 306.000 ໂຕນ, ເຜືອກ-ມັນ ໃຫ້ໄດ້ປະມານ 327.000 ໂຕນ, ປະເພດໄມ້ໃຫ້ໝາກ ໃຫ້ໄດ້ ປະມານ 825.000 ໂຕນ ແລະ ພືດຜັກອື່ນໆ ໃຫ້ໄດ້ປະມານ 1,57 ລ້ານໂຕນ.

3) ສູ້ຊົນຜະລິດຊີ້ນ, ປາ ແລະ ໄຂ່ ລວມໃຫ້ໄດ້ 711.000 ໂຕນ (ໃນນັ້ນ, ຊີ້ນ ແລະ ໄຂ່ໃຫ້ໄດ້ 414.000 ໂຕນ, ປາ ​ແລະ ສັດ​ນ້ຳ​ໃຫ້ໄດ້ 297.000 ໂຕນຕໍ່ປີ) ເພື່ອຕອບສະໜອງອັດຕາການບໍລິໂພກ ລວມສະເລ່ຍ ໃຫ້ໄດ້ 79 ກິ​ໂລຕໍ່ຄົນຕໍ່ປີ

2.4.3.2 ເປົ້າໝາຍ (ແຜນງານ) ທີ 2: ການຜະລິດສິນຄ້າກະສິກໍາ

ຕ້ອງສູ້ຊົນເຮັດ​ໃຫ້ການຜະລິດ​ສິນຄ້າກະສິກໍາ ມີການຂະຫຍາຍຕົວ ​ເພື່ອຮັບປະກັນທັງປະລິມານ ແລະ ຄຸນນະພາບ ​ແນ​ໃສ່​​ໃຫ້​ເຂົ້າ​​ເຖິງຕະຫຼາດ ພາຍໃນ, ພາກພື້ນ ແລະ ສາກົນ ໂດຍ​ໃຫ້​ຕິດ​ພັນ​ກັບການ ປັບປຸງ ກຸ່ມ​ຊາວ​ກະສິກອນ, ສະ​ມາ​ຄົມ​​ຜູ້​ຜະ​ລິດ ແລະ ປຸງ​ແຕ່ງ​ກະ​ສີ​ກໍາຢ່າ​ງ​ແຂງ​ແຮງ ​ໂດຍ​ຕ້ອງ ສູ້​ຊົນ​ເຮັດ​ໃຫ້ການ ຜະລິດກະສິກໍາ​ເປັນ​ສິນຄ້າ​ທີ່​ສໍາຄັນ ສື​ບຕໍ່​ຂະຫຍາຍຕົວ ​ດັ່ງລຸ່ມນີ້:

1) ໃນຈໍານວນຄາດໝາຍຜົນຜະລິດເຂົ້າລວມທັງໝົດ; ຜະລິດ​ເຂົ້າ​ເປັນ​ສິນຄ້າພາຍໃນ ແລະ ​ສົ່ງ​ອອກ ​​ໃຫ້​ໄດ້ປະມານ 1,5 ລ້ານໂຕນ​ເຂົ້າ​ເປື​ອກ ໃນປີ 2025 ​ໄປຄຽງຄູ່ກັບການສົ່ງເສີມ ການປູກເຂົ້າທີ່ມີທ່າແຮງ ຂອງ​ແຕ່ລະ​ທ້ອງ​ຖີ່​ນ ​ເປັນຕົ້ນ: ເຂົ້າກໍ່າ, ເຂົ້າໄກ່ນ້ອຍ, ເຂົ້າຫອມ ​ໃນ​ເຂດ​ທີ່ມີທ່າແຮງ ແລະ ມີເງື່ອນໄຂ, ແລະ ສົ່ງ​ເສີມເຂົ້າພັນ ປັບປຸງໃໝ່ທີ່ມີຄຸນນະພາບ ​ແລະ ​ເປັນ​ທີ່​ຕ້ອງການ​ຂອງ​ຕະຫຼາດ ເປັນຕົ້ນ: ​ເຂົ້າທ່າ​ດອກ​ຄໍາ, ​ເຂົ້າທ່າ​ສະ​ໂນ, ​ເຂົ້າ​ໂພນ​ງາມ ​ແລະ ​ເຂົ້າ​ຫອມ​ອື່ນໆ ​ໃນ​ເຂດ​ທົ່ງພຽງຕ່າງໆ. ຮັກສາສັດສ່ວນ ການປູກເຂົ້າຈ້າວໃຫ້ກວມເອົາ 30% ຂອງຜົນຜະລິດທັງໝົດ, ໃນນັ້ນ ເລັ່ງໃສ່ຜະລິດເຂົ້າ ເພື່ອສົ່ງອອກ​ໃນ​ມາດຕະຖານ ກະສິກຳທີ່​ດີ (GAP) ໂດຍເລ່ັງໃສ່ຕະຫຼາດພາກພື້ນ ແລະ ສາກົນ. ສຳລັບຢູ່ບັນດາທົ່ງພຽງ ນ້ອຍ ແລະ ທົ່ງພຽງກາງ ຂອງແຂວງພາກເໜືອ ແມ່ນສຸມໃສ່ ຜະລິດເຂົ້າເປັນສິນຄ້າ ເພື່ອສະໜອງໃຫ້ ສ.ປ.ຈີນ ແລະ ປະເທດໃກ້ຄຽງ ໂດຍນຳໃຊ້ແນວພັນເຂົ້າ ທີ່ຕະຫຼາດຕ້ອງການ.

2) ສໍາ​ລັບ​ພືດຕ່າງໆ: ສູ້ຊົນຜະລິດສາລີອາຫານສັດ ໃຫ້ບັນລຸປະມານ 1,4 ລ້ານໂຕນ, ກາເຟ ໃຫ້ໄດ້ ປະມານ 280.000 ໂຕນ (ອີງໃສ່ຍຸດທະສາດການພັດທະນາກາເຟລາວ), ອ້ອຍ ໃຫ້ໄດ້ຫຼາຍ​ກ່ວາ 2,4 ລ້ານໂຕນ, ມັນຕົ້ນ ໃຫ້ໄດ້ປະມານ 1,6 ລ້ານໂຕນ, ຖົ່ວເຫຼືອງ ໃຫ້ໄດ້ປະມານ 52.000 ໂຕນ. ນອກນັ້ນ ກໍສູ້ຊົນ ຜະລິດພືດສິນຄ້າອື່ນໆທີ່ມີທ່າແຮງໄດ້ປຽບ ຕາມທີ່ຕະຫຼາດຕ້ອງການ ເພື່ອເປັນສິນຄ້າພາຍໃນ ແລະ ສົ່ງອອກ.

3) ສຳລັບການລ້ຽງສັດ: ສູ້ຊົນຫັນການລ້ຽງສັດແບບທຳມະຊາດ ໄປສູ່ການລ້ຽງແບບເປັນຟາມ ໃຫ້ສາ ມາດ​ສະໜອງ​ຜົນ​ຜະລິດ ຈາກຟາມ​ໃຫ້ໄດ້ 35% ຂຶ້ນໄປຂອງຜົນ​ຜະລິດ​ສັດ​ທັງໝົດ. ສຸມໃສ່ການລ້ຽງສັດ ພັນ ປັບປຸງ ເພື່ອເປັນສິນຄ້າ ສະໜອງ ຕະຫລາດພາຍໃນ ໃຫ້ພຽງພໍ ແລະ ສູ້ຊົນສືບຕໍ່ສົ່ງອອກສັດໃຫຍ່ ປະເພດ ງົວ, ຄວາຍ ໄປປະເທດໃກ້ຄຽງ ໂດຍຄິດໄລ່ເປັນນ້ຳຫນັກຊີ້ນ ຢ່າງຕໍ່າໃຫ້ໄດ້ 15.000 ໂຕນ ໃນປີ 2025.

---

[1] ແຫຼ່ງຂໍ້ມູນ: ຍຸດທະສາດຄໍ້າປະກັນສະບຽງອາຫານ ສປປລາວ ໄລຍະ 2001-2010 ທີ່ຖືກຮັບຮອງຈາກລັດຖະບານ ໃນວັນທີ 3/2/2004, ຂໍ້ມູນຈາກ: Lao Expenditure and Consumption Survey (2002/03 and 2007/08 LECS) ແລະ ຂໍ້ມູນຈາກອົງການ  FAO.